ޑަބްލިއުއެޗްއޯ އާއި އީޔޫއިން ރާއްޖެއަށް 1 މިލިއަން ޔޫރޯގެ އެހީ ދީފި
6 ޖެނުއަރީ 2021 | ބުދަ 04:33ޑަބްލިއުއެޗްއޯގެ ފަރާތުން ހެލްތު މިނިސްޓްރީއާއެކު ވަރަށް ގާތުން މަސައްކަތް ކުރަމުންދޭ
ޑަބްލިއުއެޗްއޯ އާއި އީޔޫ އިން ރާއްޖެއަށް އެހީތެރިކަން ފޯރުކޮށްދެނީ
ކޮވިޑް-19 ގެ ބަލިމަޑުކަމުން އަރައިގަތުމަށް ރާއްޖެއިން ކުރަމުން އަންނަ މަސައްކަތަށް އެހީތެރިކަން ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އާއި ޔޫރަޕިއަން ޔޫނިއަން (އީޔޫ) އިން ރާއްޖެއަށް އެއް މިލިއަން ޔޫރޯގެ އެހީ ދީފިއެވެ.
ޑަބްލިއުއެޗްއޯ އާއި އީޔޫއިން ވެދީފައިވާ މި އެހީ އާއި ގުޅޭގޮތުން ހެލްތް މިނިސްޓަރު އަހުމަދު ނަސީމް ކުރެއްވި ޓްވީޓުގައި ވިދާޅުވެފައި ވަނީ ކޮވިޑް-19 ގެ ބަލިމަޑުކަމުގައި ޑަބްލިއުއެޗްއޯގެ ފަރާތުން ހެލްތު މިނިސްޓްރީއާއެކު ވަރަށް ގާތުން މަސައްކަތް ކުރަމުންދާ ކަމަށާއި، ރާއްޖޭގައި ކޮވިޑް-19 ފެތުރުން ކޮންޓްރޯލް ކުރުމުގައި ޑަބްލިއުއެޗްއޯ އާއި އީޔޫ އަދި އަވަށްޓެރި ގައުމުތަކުން ދެމުންދާ އެހީތެރިކަމުން މުހިންމު ދައުރެއް އަދާކުރަމުންދާ ކަމަށެވެ.
މި އެހީއާއި ގުޅޭގޮތުން އީޔޫން ބުނީ މިއީ، ރާއްޖޭގެ ކޮވިޑް-19 ހާލަތު މެނޭޖް ކުރުމަށް ވެދިން އެހީތެރިކަމެއް ކަމަށެވެ. އެގޮތުން މި އެހީގެ ސަބަބުން ކޮވިޑް-19 އާ ދެކޮޅަށް ކުރާ މަސައްކަތަށް ބޭނުންވާ ބޭހާއި، ރީޖަނަލް ކޮވިޑް އައިސީޔޫ ފެސިލިޓީތަކަށް ބޭނުންވާ ސާމާނު ފޯރުކޮށްދިނުމަށް ހަމަޖެހިފައިވާ ކަމަށެވެ. މީގެ އިތުރުން، މި އެހީގެ ސަބަބުން ރީޖަނަލް އައިސީޔޫއެއް ގާއިމުކުރާނެ ކަމަށްވެސް ބުނެފައި ވެއެވެ.
ކޮވިޑް-19 ގެ ހާލަތާއި ގުޅިގެން ދުނިޔޭގެ އެކި ޖަމިއްޔާތަކާއި ގައުމުތަކުން އަންނަނީ މެދުނުކެނޑި ރާއްޖެއަށް އެހީތެރިކަން ފޯރުކޮށްދެމުންނެވެ. މީގެ ތެރޭގައި ޔޫރަޕާއި އޭޝިއާގެ ގައުމުތައްވެސް ހިމެނެއެވެ.
