2017 ވަނަ އަހަރު ގަވާއިދާ އެއްގޮތަށް ފައިސާ ބަލަހައްޓާފައި ނުވާ ތަންތަނުގެ ތެރޭގައި ގއ އަތޮޅުގެ ސިއްހީ ހިދުމަތްދޭ ހުރިހާތަނެއް!

2017 ވަނަ އަހަރު ސިއްހީ ހިދުމަތްދޭ ތަންތަނުން މާލިއްޔަތު ގަވާއިދާ އެއްގޮތަށް ފައިސާ ބަލަހައްޓާފައި ނުވާ ކަމަށާއި، އޭގެ ތެރެއިން ވެސް ގއ. އަތޮޅު ހޮސްޕިޓަލް އެންމެ ކުރީގައި ހިމެނޭ ކަމަށް ހެލްތް މިނިސްޓްރީގެ2017 ވަނަ އަހަރުގެ އޮޑިޓް ރިޕޯޓުންދައްކައިފިއެވެ.

އޮޑިޓަރ ޖެނެރަލްގެ އޮފީހުން އާންމުކޮށްފައިވާ ހެލްތް މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓުގައި ބުނެފައިވަނީ ދައުލަތުގެ އާމްދަނީގެ ގޮތުގައި ބަލައިގަންނަ ފައިސާ މިނިސްޓްރީ އޮފް ފިނޭންސަށް ދެއްކުމަށްޓަކައި މޯލްޑިވްސް މަނިޓަރީ އޮތޯރިޓީގައި އޮންނަ ޕަބްލިކް ބޭންކް އެކައުންޓަށް ޖަމާކުރަމުން ގެންދިއުމަށް ދައުލަތުގެ މާލިއްޔަތުގެ ގަވާއިދުގެ 5.22 ވަނަ މާއްދާގައި ބަޔާންކޮށްފައިވާ ކަމަށެވެ.

Advertisement

ނަމަވެސް، މިނިސްޓްރީ އޮފް ހެލްތުގެ ދަށުން ހިނގާ 12 އިދާރާއަކުން އާމްދަނީގެ ގޮތުގައި ބަލައިގަނެފައިވާ ޖުމުލަ 6,607,631 (ހަ މިލިއަން ހަ ސަތޭކަ ހަތް ހާސް ހަ ސަތޭކަ ތިރީސް އެކެއް) ރުފިޔާ 31 ޑިސެންބަރު 2017 ގެ ނިޔަލަށް ވެސް މޯލްޑިވްސް މަނިޓަރީ އޮތޯރިޓީގައި އޮންނަ ޕަބްލިކް ބޭންކް އެކައުންޓަށް ޓްރާންސްފަރ ކޮށްފައިނުވާކަން އޮޑިޓް ރިޕޯޓުގައި ފާހަގަކޮށްފައިވެއެވެ.

މި 12 ތަނުގެ ތެރޭގައި އެންމެ ގިނަ ފައިސާ ޖަމާކޮށްފައި ނުވަނީ ގއ. ވިލިނގިލިގައި ހުންނަ ގއ. އަތޮޅު ހޮސްޕިޓަލުންނެވެ. އަދި އެ ހޮސްޕިޓަލުގެ ދަށުން ބަލަހައްޓަމުން އަންނަ އެ އަތޮޅުގެ ހުރިހާ ރަށެއް ހިމެނެއެވެ.

މާލިއްޔަތު ގަވާއިދާ އެއްގޮތަށް ފައިސާ ބަލަހައްޓާފައި ނުވާ 12 ތަނުގެ ތެރޭގައި ހިމެނެނީ؛

- ގއ. އަތޮޅު ހޮސްޕިޓަލް - 4،324،010 (ހަތަރު މިލިއަން ތިންލައްކަ ސައުވީސް ހާސް ދިހަ ރުފިޔާ)

- ގއ. ކޮލަމާފުށީ ހެލްތް ސެންޓަރ – 129،030 (އެއްލައްކަ ނަވާވީސް ހާސް ތިރީސް ރުފިޔާ) - ގއ. ދެއްވަދޫ ހެލްތް ސެންޓަރ – 83،523 (އަށްޑިހަ ތިންހާސް ފައްސަތޭކަ ތޭވީސް ރުފިޔާ)

- ގއ. ދާންދޫ ހެލްތް ސެންޓަރ – 191،335 (އެއްލައްކަ ނުވަދިހަ އެއް ހާސް ތިންސަތޭކަ ތިރީސް ފަސް ރުފިޔާ)

- ގއ. މާމެންދޫ ހެލްތް ސެންޓަރ – 94،328 – (ނުވަދިހަ ހަތަރުހާސް ތިންސަތޭކަ އަށާވީސް ރުފިޔާ)

- ގއ. ކޮނޑޭ ހެލްތް ސެންޓަރ – 55،650 – (ފަންސާސް ފަސްހާސް ހަސަތޭކަ ފަންސާސް ރުފިޔާ)

- ގއ. ނިލަންދޫ ހެލްތް ސެންޓަރ – 75،028 – (ހަތްދިހަ ފަސްހާސް އަށާވީސް ރުފިޔާ)

- ގއ. ގެމަނަފުށި ހެލްތް ސެންޓަރ - 96،504 – (ނުވަދިހަ ހަހާސް ފައްސަތޭކަ ހަތަރު ރުފިޔާ)

- ގއ. ކަނޑުހުޅުދޫ ހެލްތް ސެންޓަރ – 69،493 – (ފަސްދޮޅަސް ނުވަހާސް ހަތަރުސަތޭކަ ރުފިޔާ) ނުވަދިހަ ތިން ރުފިޔާ)

- މ. މުލީ ރީޖަނަލަ ހޮސްޕިޓަލް – 1،021،074 – (އެއް މިލިއަން އެކާވީސްހާސް ހަތްދިހަ ހަތަރު ރުފިޔާ)

- ފުވައްމުލަކު އަތޮޅު ހޮސްޕިޓަލް – 405،690 – (ހަތަރުލައްކަ ފަސްހާސް ހަސަތޭކަ ނުވަދިހަ ރުފިޔާ ރުފިޔާ)

- ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) – 61،912 – (ފަސްދޮޅަސް އެއްހާސް ނުވަސަތޭކަ ބާރަ ރުފިޔާ)

މި މައްސަލަ އިސްލާހުކުރުމަށް އޮޑިޓަރ ޖެނެރަލް ލަފާ ދެއްވާފައިވަނީ މާލިއްޔަތުގެ ގަވާއިދުގެ 5.22 ވަނަ މާއްދާގައި ބަޔާންކޮށްފައިވާ ގޮތަށް އާމްދަނީގެ ގޮތުގައި ބަލައިގަންނަ ފައިސާ މޯލްޑިވްސް މަނިޓަރީ އޮތޯރިޓީގައި އޮންނަ ޕަބްލިކް ބޭންކް އެކައުންޓަށް ޓްރާންސްފަރ ކުރަމުން ގެންދިއުމަށެވެ.