އައު ވޭރިއެންޓް ރާއްޖެ އައުމުގެ ފުރުސަތު ބޮޑު، ނަމަވެސް އިތުރު ނުރައްކަލެއް ނެތް: އެޗްއީއޯސީ
2 ޖެނުއަރީ 2021 | ހޮނިހިރު 18:44އިނގިރޭސިވިލާތުން އަންނަ ފަރާތްތަކުން ކަރަންޓީން ވާން ޖެހޭ
ރާއްޖެޓީވީގެ ފަލަސުރުހީ ޕްރޮގްރާމްގައި ހެލްތް މިނިސްޓްރީގެ އެސިސްޓެންޓް ޑިރެކްޓަރ އަބްދުﷲ މައުރޫފް ވާހަކަދައްކަވަނީ
ކޮވިޑް-19ގެ އައު ވޭރިއެންޓް ދުނިޔޭގެ އެކި ހިސާބުތަކުން ފެންނަމުންދާއިރު، މިވޭރިއެންޓް ރާއްޖެއަށް އައުމުގެ ފުރުސަތު ބޮޑު ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ބުނެފިއެވެ.
ފަލަސުރުހީ ޕްރޮގްރާމްގައި ''ކޮވިޑްގެ އައު ވޭރިއެންޓާއި ރާއްޖޭގެ ހާލަތާއި ގުޅޭގޮތުން'' ވާހަކަ ދައްކަވަމުން ހެލްތް މިނިސްޓްރީގެ އެސިސްޓެންޓް ޑިރެންޓަރ އަބްދުﷲ މައުރޫފް ވިދާޅުވީ އިނގިރޭސިވިލާތުގެ އިތުރުން ދުނިޔޭގެ އެކި ހިސާބުތަކުން މިފެންނަ އައު ވޭރިންޓާ ބެހޭ ގޮތުން ދިރާސާތައް ކުރެވެމުންދާ ކަމަށެވެ. ކަމާ ބެހޭ ފަންނީ ބޭފުޅުންގެ އިރުޝާދުގެ ދަށުން ކުރިއަށް އޮތްތާގައި ރާއްޖޭގައި ބަލި އިތުރަށް ކޮންޓްރޯލް ކުރުމަށް ކުރެވޭނެ މަސައްކަތްތަކާއި އަޅަން ޖެހޭ ފިޔަވަޅުތައް ބަލަމުންދާ ކަމަށް މައުރޫފް ވިދާޅުވިއެވެ.
އައު ވޭރިއެންޓް ފެނިގެންދިޔައީ ރާއްޖޭގައި ކޭސްތައް އެންމެ މަދުވި ދުވަސްވަރުކަން ފާހަގަކުރައްވައި މައުރޫފް ވިދާޅުވީ މީގެ ދެހަފްތާއެއްހާ ދުވަސް ކުރިން ރާއްޖެއިން ބޭރުން އަންނަ ފަރާތްތައް ކަރަންޓީން ނުވާ ގޮތަށް ހަމަޖެއްސި ކަމަށެވެ. ނަމަވެސް ދެވުނު ލުއިތައް އިތުރަށް ދިރާސާ ކުރުމަށްފަހު މިހާރު އިނގިރޭސިވިލާތުން އަންނަ ފަރާތްތަކުން ކަރަންޓީންވާން ޖެހޭ ގޮތަށް އުސޫލު ބަދަލުކޮށްފައިވާކަން މައުރޫފް ފާހަގަކުރެއްވިއެވެ.
މައުރޫފް ވިދާޅުވީ އައު ވޭރިއެންޓްއާ ގުޅިގެން އިތުރު ނުރައްކަލެއް ނެތް ކަމަށާއި ބަލީގެ ހާލަތު ގޯސްނުވާ ކަމަށެވެ. ވައިރަސް އަކީ އޭގެ ޒާތުގައި ވެސް އުފެދިފައިވާ ގޮތަށް ބަދަލު އަންނަ އެއްޗަކަށްވާއިރު، ކޮވިޑްގެ ވައިރަސްއަށް ވެސް އެފަދަ ބަދަލެއް އައީ ކަމަށް މައުރޫފް ވިދާޅުވިއެވެ.
މައުރޫފް ވިދާޅުވީ މިވޭރިއެންޓްގެ ބަލި ފެތުރޭ މިންވަރު އިތުރުވެގެންދާ ކަމަށާއި، އެކަކުގައިން އަނެކަކު ގައިން ބަލި ފެތުރޭ ނިސްބަތް އިތުރުވެގެންދާލެއް އަވަސް ކަމަށް ކަމާ ބެހޭ މާހިރުން ވިދާޅުވަމުން ގެންދަވާ ކަމަށެވެ.
މައުރޫފް ވިދާޅުވީ ރާއްޖޭގެ ކޭސްތައް މިހާރު މަދުވިކަމުގައި ވީ ނަމަވެސް ބޯޑަރު ހުޅުވާލާ އެކި ގައުމުތަކުން ފަތުރުވެރިން އަންނަމުންދާއިރު، މިވޭރިއެންޓް ރާއްޖެއަށް އައުމުގެ ފުރުސަތު ބޮޑު ކަމަށެވެ. އެހެންކަމުން އެކަމަށް ތައްޔާރުވެ މަސައްކަތް ކުރަމުންދާ ކަމަށް މައުރޫފް ވިދާޅުވިއެވެ.
ބަލީގެ ނުރައްކަލުން ސަލާމަތްވުމަށްޓަކައި މިހާރު ވެސް އަޅާފައިވާ ފިޔަވަޅުތަކާއި އެއްގޮތަށް އަމަލުކުރުމަށް މައުރޫފް ވަނީ އިލްތިމާސް ކުރައްވާފައެވެ.
