ވުލްވްސް ބަލިކޮށް ޔުނައިޓެޑް ދެވަނައަށް

އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ ވުލްވްސް ބަލިކޮށް ތާވަލުގެ ދެވަނައަށް މެންޗެސްޓާ ޔުނައިޓެޑް ޖެހިލައިފިއެވެ.

އަމިއްލަ ދަނޑުގައި ކުޅުނު މި މެޗުން ޔުނައިޓެޑް މޮޅުވީ ފަހު ވަގުތު 1-0 ގެ ނަތީޖާއަކުންނެވެ.

ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ވުލްވްސްއިން ވަނީ ތިން ހަމަލާއެއް އުފައްދާފައެވެ. އެގޮތުން އޭރިއާ ބޭރުން ވުލްވްސްގެ ވިޓީނިއާ ފޮނުވާލި ހަމަލާއެއް ޔުނައިޓެޑުގެ ގޯލްކީޕަރު ޑޭވިޑް ޑެ ހެއާ ދިފާއުކުރިއިރު، އޭގެ ފަހުން ވުލްވްސްގެ ރޯމެއިން ސައިސް ބޮލުން ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އަދި މި ހާފުގައި ސައިސް ފޮނުވާލި އިތުރު ހަމަލާއެއް ޔުނައިޓެޑުގެ ގޯލްކީޕަރު ވަނީ ދިފާއުކޮށްފައެވެ. މި މެޗުގެ ފުރަތަމަ ހާފުގައި ޔުނައިޓެޑުގެ މޭސަން ގްރީންވުޑް ނަގައިދިން ހުރަހަކުން އެ ޓީމުގެ ބްރޫނޯ ފެނާންޑޭސް ނުރައްކާތެރި ހަމަލާއެއް އުފެއްދި ނަމަވެސް، އެ ހަމަލާ ވުލްވްސްގެ ގޯލްކީޕަރު ރުއީ ޕެޓްރީޝިއޯ ވަނީ މަތަކޮށްފައެވެ.

މެޗުގެ ދެވަނަ ހާފުގައި ޔުނައިޓެޑުގެ އެޑިންސަން ކަވާނީ ލަނޑެއް ޖެހި ނަމަވެސް، އޭނާ އޮފްސައިޑުގައި ހުރުމުން އެ ލަނޑު ބަލައިގެންފައެއް ނުވެއެވެ. އަދި މި ހާފުގައި ވުލްވްސްގެ އައިޓް-ނޫރީ ފޮނުވާލި ހަމަލާއެއް ޔުނައިޓެޑުގެ ގޯލްކީޕަރު ވަނީ މަތަކޮށްފައެވެ. މި މެޗުން ޔުނައިޓެޑް މޮޅުވީ މެޗުގެ އިތުރު ވަގުތުގައި މާކަސް ރަޗްފޯޑް ކާމިޔާބުކޮށްދިން ލަނޑުންނެވެ. އޭނާ މި ލަނޑު ކާމިޔާބުކުރީ ފެނާންޑޭސް ދިން ޕާހަކުންނެވެ.

މި މޮޅާއެކު ޔުނައިޓެޑް ތާވަލުގެ ދެވަނައަށް ޖެހިލީ ކުޅުނު 15 މެޗުން ލިބުނު 30 ޕޮއިންޓާއެކުއެވެ. ލީގުގެ އެއްވަނައިގައި އޮތް ލިވަޕޫލަށް 15 މެޗުން ވަނީ 32 ޕޮއިންޓް ލިބިފައެވެ. އަދި ޔުނައިޓެޑް އަތުން ބަލިވި ވުލްވްސް އޮތީ ތާވަލުގެ 12 ވަނައިގައި 16 މެޗުން 21 ޕޮއިންޓާއެކުއެވެ.

މީގެ އިތުރުން ޕްރިމިއާ ލީގުގައި އަންގާރަ ދުވަހުގެރޭ އާސެނަލް ވަނީ ރަށުން ބޭރުގައި ބްރައިޓަން އަތުން 1-0 ގެ ނަތީޖާއަކުން މޮޅުވެފައެވެ.

މި މެޗުގެ ފުރަތަމަ ހާފުގައި ބްރައިޓަނުން ރަނގަޅު ކުޅުމެއް ދެއްކިއިރު، މި ހާފުގައި އެ ޓީމުން ވަނީ ނުރައްކާތެރި ގިނަ ހަމަލާތަކެއް އުފައްދާފައެވެ. އެގޮތުން އެ ޓީމުގެ އެލެކްސިސް މެކް އެލިސްޓާ އާއި ޖަހަންބަޚްޝްއަށް ވަނީ ލީދު ނަގަން ރަނގަޅު ފުރުސަތުތަކެއް ލިބި ބޭކާރުވެފައެވެ.

މެޗުގެ ދެވަނަ ހާފުގައި އާސެނަލުގެ ކެޕްޓަން ޕިއޭ-އެމެރިކް އޮބާމަޔަން ނުރައްކާތެރި ހަމަލާއެއް އުފެއްދި ނަމަވެސް، މި ހަމަލާ ބްރައިޓަނުގެ ގޯލްކީޕަރު ރޮބާޓް ސަންޗޭޒް ވަނީ މަތަކޮށްފައެވެ. މި މެޗުގެ ހަމައެކަނި ލަނޑު 66 ވަނަ މިނެޓުގައި އާސެނަލަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އަލެކްސަންޑަ ލަކަޒޭޓެވެ. އޭނާ މި ލަނޑު ކާމިޔާބުކުރީ ކުޅެން އެރިތާ 21 ސިކުންތުގެ ތެރޭގައެވެ.

މި މޮޅާއެކު އާސެނަލް އޮތީ ތާވަލުގެ 13 ވަނައިގައި 16 މެޗުން 20 ޕޮއިންޓާއެކުއެވެ. އަދި އާސެނަލް އަތުން ބަލިވި ބްރައިޓަން އޮތީ ތާވަލުގެ 17 ވަނައިގައި 16 މެޗުން 13 ޕޮއިންޓާއެކުއެވެ.