އެއް ޓީމަކަށް އެންމެ ގިނަ ލަނޑު ޖަހައިގެން ބްރެޒިލުގެ ލެޖެންޑް ޕެލޭ ހަދާފައިވާ ރިކޯޑު ބާސެލޯނާގެ ކެޕްޓަން ލިއޮނެލް މެސީއަށް މުގުރާނުލެވޭ ކަމަށް ސަންތޯސްއިން ބުނެފިއެވެ.

މީގެ ކުރިން އެއް ޓީމަކަށް އެންމެ ގިނަ ލަނޑު ޖަހައިގެން ޕެލޭ ރިކޯޑު ހަދާފައި އޮތީ ބްރެޒިލުގެ ސަންތޯސްއަށް 1956 ވަނަ އަހަރުން ފެށިގެން 1974 ވަނަ އަހަރުގެ ނިޔަލަށް ކުޅުނު ދުވަސްވަރު 656 މެޗުން 643 ލަނޑު ޖަހައިގެންނެވެ. މެސީ އެ ރިކޯޑު މުގުރާލީ ސްޕެނިޝް ލީގުގައި މިދިޔަ ހަފުތާގެ އަންގާރަ ދުވަހުގެރޭ ރެއާލް ވަޔަޑޮލިޑް އަތުން 3-0 ގެ ނަތީޖާއަކުން ބާސާ މޮޅުވި މެޗުގައެވެ. އެ މެޗުގައި ލަނޑު ޖަހައި މެސީ ވަނީ ބާސާއަށް ކުޅެދިން 749 މެޗުން 644 ލަނޑު ހަމަކޮށްފައެވެ.

އެކަމަކު ސަންތޯސްއިން ނެރުނު ބަޔާނެއްގައި ބުނީ އެކުވެރިކަމުގެ މެޗުތަކާއި އެކި މުބާރާތްތަކުގައި ކުޅުނު މެޗުތައް ލައިގެން ޕެލޭ އެޓީމަށް 1،091 ލަނޑު ޖަހާފައިވާ ކަމަށެވެ. އެހެންކަމުން ޕެލޭ އިތުރަށް ޖަހާފައިވާ 448 ލަނޑު އެއީ ނުވާ ކަމެއްގެ ގޮތުގައި ކަނޑަނޭޅޭނެ ކަމަށާއި، އެ ލަނޑުތަކަކީ ފީފާގެ ހުއްދަ ލިބިގެން ކުޅެފައިވާ މެޗުތަކުގައި ޖަހާފައިވާ ލަނޑުތަކެއް ކަމަށްވެސް މި ބަޔާނުގައި ވަނީ ބުނެފައެވެ.

އެކަމަކު މީގެ ކުރިން ޕެލޭގެ ރިކޯޑާ މެސީ އެއްވަރުކުރުމުން ޕެލޭ އަމިއްލައަށް ވަނީ މެސީއަށް ތާރީފުވެސް ކޮށްފައެވެ. މެސީ ހޯދި ކާމިޔާބީއަށް ތާރީފުކުރަމުން ސޯޝަލް މީޑިއާގައި ހިއްސާކުރި ޕޯސްޓެއްގައި ޕެލޭ ބުނީ މެސީ ހޯދި ކާމިޔާބީއަށް މަރުހަބާ ކިޔާ ކަމަށާއި، ހާއްސަކޮށް ބާސާގައި ވޭތުކުރާ ކާމިޔާބު ކެރިއަރަށް ވަރަށް ބޮޑަށް މަރުހަބާ ކިޔާ ކަމަށެވެ. އަދި އެ ދެ މީހުން ފަދައިން އެއް ކުލަބެއްގައި، އެއް ޖާޒީއެއްގައި އެހާ ދުވަހު ހޭދަކުރާ ވާހަކަ އަކީ ފުޓްބޯޅައިގައި މަދުން ނޫނީ ނުފެންނާނޭ ކަންކަން ކަމަށްވެސް ޕެލޭ ވަނީ ބުނެފައެވެ.

ޕެލޭ ހަދާފައިވާ ރިކޯޑު މެސީ މުގުރާލިއިރު، ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީ ވަނީ އެ ޓީމާއެކު ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ އޭނާ ވަނީ ބާސާއާއެކު ސްޕެނިޝް ލީގު 10 ފަހަރު، އަދި ޔުއެފާ ޗެމްޕިއަންސް ލީގު ހަތަރު ފަހަރު ހޯދާފައެވެ. އަދި މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީ އަކީ މި އެވޯޑް އެންމެ ގިނައިން ހޯދި ކުޅުންތެރިޔާއެވެ.