ކ. ތިލަފުށީ ފަޅުގައި އޮތް ދެ ދޯންޏެއްގައި ހިނގި އަލިފާނުގެ ހާދިސާގައި ފިހުނު ދިވެހި ފިރިހެން މީހާއަށް ފަރުވާ ދެމުންދަނީ އައިސީޔޫގައި ކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނެފިއެވެ.
"ރާއްޖެއެމްވީ" އަށް އައިޖީއެމްއެޗްގެ މީޑީއާ އޮފިޝަލް ވިދާޅުވީ އަލިފާނުގެ ހާދިސާގައި ފިހިގެން ދެމީހަކަށް ފަރުވާ ދިނުމަށް ހޮސްޕިޓަލަށް ގެނެސްފައިވާ ކަމަށެވެ. އެއީ ދިވެއްސެއްގެ އިތުރުން ބިދޭސީއެއް ކަމަށް އެނާ ވިދާޅުވިއެވެ.
އޮފިޝަލް ވިދާޅުވީ ދިވެހި ފިރިހެން މީހާއަށް މިހާރު ފަރުވާ ދެމުންދަނީ އައިސީޔޫގައި ކަމަށާއި، އެމީހާ ހަށިގަނޑުގެ 20 އިންސައްތަ ފިހިފައިވާ ކަމަށެވެ. ބިދޭސީ މީހާއަށް އިމަޖެންސީގައި ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށް ވެސް އޮފިޝަލް ވިދާޅުވިއެވެ.
މިއަލިފާނުގެ ހާދިސާއާ ގުޅިގެން އެމްއެންޑީއެފުން ބުނީ މިހާދިސާ ހިނގީ ދޯންޏަށް ތެޔޮއަޅަން އުޅުމުގެ ތެރޭގައި ކަމަށެވެ. ވިލާ ސައިޓްގެ ފަޅުތެރޭގައި އޮތް މިދޯނި ވަނީ ބޭނުން ނުކުރެވޭ ވަރަށް އަދާފައެވެ.
މި އަލިފާނުގެ ހާދިސާ ހިނގީ މިމަހުގެ 24ވީ ބުރާސްފަތި ދުވަހުގެ ހަވީރުގެ 16:39 ހާއިރުއެވެ. އަލިފާންގަނޑު ކޮންޓްރޯލް ކުރެވުނީ 17:37 ހާއިރުއެވެ
