ސްޓްރަސްބޯގް އަތުން ޕީއެސްޖީއަށް ފަސޭހަ މޮޅެއް

ފްރެންޗް ލީގުގައި ބުދަ ދުވަހުގެރޭ ކުޅުނު މެޗުން ސްޓްރަސްބޯގް އަތުން އެންމެ ފަހުގެ ޗެމްޕިއަން ޕީއެސްޖީ ފަސޭހަކަމާއެކު މޮޅުވެއްޖެއެވެ.

އަމިއްލަ ދަނޑުގައި ކުޅުނު މި މެޗުން ޕީއެސްޖީ މޮޅުވީ ފަސޭހަކަމާއެކު 4-0 ގެ ނަތީޖާއަކުންނެވެ.

މި މެޗުގައި ޕީއެސްޖީގެ ފަރާތުން ގިނަ ހަމަލާތަކެއް ފެނިގެންދިޔައިރު، މެޗުގެ 18 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޒުވާން ޑިފެންޑަރު ޓިމޮތީ ޕެމްބެލޭއެވެ. އަދި މެޗުގެ 79 ވަނަ މިނެޓުގައި އެންހެލް ޑި މާރިއާގެ އެހީއާއެކު ޒުވާން ތަރި ކީލިއަން އެމްބާޕޭ ވަނީ ޕީއެސްޖީއަށް ލީޑު ފުޅާކޮށްދީފައެވެ.

މެޗުގައި ޕީއެސްޖީން ކާމިޔާބުކުރި ތިންވަނަ ލަނޑު އެ ޓީމުން ޖަހާފައިވަނީ މެޗު ނިމެން ދެ މިނެޓަށް ވެފައި ވަނިކޮށެވެ. ޖޫލިއަން ޑްރެކްސްލާގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ މިޑްފޫލްޑަރު އިދްރީސާ ގޭއެވެ. އަދި އޭގެ ތިން މިނެޓު ފަހުން އެވަޓަނުގެ ލޯނު އެއްބަސްވުމެއް ދަށުން ކުޅެމުން އަންނަ ފޯވާޑް މޮއިސް ކީން ވަނީ ޕީއެސްޖީގެ ހަތަރުވަނަ ލަނޑު ޖަހާފައެވެ.

މި މޮޅާއެކު ކުޅުނު 17 މެޗުން 35 ޕޮއިންޓް ހަމަކޮށްގެން ޕީއެސްޖީ އޮތީ ތާވަލުގެ ތިންވަނައިގައެވެ. ތާވަލުގެ އެއްވަނައިގައި އޮތް ލިޔޯނާއި ދެވަނައިގައި އޮތް ލިލްއަށް 17 މެޗުން ވަނީ 36 ޕޮއިންޓް ލިބިފައެވެ.