އާސެނަލް ބަލިކޮށް ސިޓީ ސެމީއަށް

އިނގިރޭސި ލީގު ކަޕުގެ ކުއާޓާފައިނަލުގައި އަންގާރަ ދުވަހުގެރޭ އާސެނަލް ބަލިކޮށް އެންމެ ފަހުގެ ޗެމްޕިއަން މެންޗެސްޓާ ސިޓީ މުބާރާތުގެ ސެމީ ފައިނަލުން ޖާގަ ހޯދައިފިއެވެ.

އާސެނަލުގެ ދަނޑުގައި ކުޅުނު މި މެޗުން ސިޓީ މޮޅުވީ 4-1 ގެ ނަތީޖާއަކުންނެވެ.

މި މެޗުގެ ވަރަށް ކުރީކޮޅު ސިޓީން ވަނީ ލީޑު ނަގާފައެވެ. މެޗު ފަށައިގެން ތިންވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ގަބްރިއެލް ޖީސޫސްއެވެ. އެކަމަކު ފުރަތަމަ ހާފު ނިމުމުގެ ކުރިން އާސެނަލުން ވަނީ ނަތީޖާ އެއްވަރުކޮށްފައެވެ. މެޗުގެ 32 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފޯވާޑް އަލެކްސަންޑަ ލަކަޒޭޓެވެ.

މެޗުގައި ސިޓީން ދެވަނަ ފަހަރަށް ލީޑު ނެގީ ދެވަނަ ހާފު ފަށައިގެން 10 ވަނަ މިނެޓުގައި ފޯވާޑް ރިޔާދު މާރޭޒް ކާމިޔާބުކުރި ލަނޑުންނެވެ. އަދި އޭގެ ހަތަރު މިނެޓު ފަހުން ޒުވާން މިޑްފީލްޑަރު ފިލް ފޯޑެން ވަނީ ސިޓީއަށް ލީޑު ފުޅާކޮށްދީފައެވެ. މެޗުގައި ސިޓީން ކާމިޔާބުކުރި ހަތަރުވަނަ ލަނޑު 73 ވަނަ މިނެޓުގައި އެ ޓީމަށް ކާމިޔާބުކޮށްދިނީ ޑިފެންޑަރު އައިމެރިކް ލަޕޯޓެވެ.

މި މޮޅާއެކު އިނގިރޭސި ލީގު ކަޕުގެ ސެމީން ސިޓީން ޖާގަ ހޯދިއިރު، އަންގާރަ ދުވަހުގެރޭ ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި ވާދަކުރަމުން އަންނަ ބްރެންޓްފޯޑް ވަނީ އަމިއްލަ ދަނޑުގައި 1-0 ން ނިއުކާސަލް ޔުނައިޓެޑް ބަލިކޮށް ސެމީން ފުރުސަތު ހޯދާފައެވެ. މިއީ ބްރެންޓްފޯޑުގެ ތާރީޚުގައި ބޮޑު މުބާރާތެއްގެ ސެމީން އެ ޓީމު ޖާގައެއް ހޯދި ފުރަތަމަ ފަހަރެވެ.

އިނގިރޭސި ލީގު ކަޕުގެ އަނެއް ދެ ކުއާޓާފައިނަލް މެޗު ބުދަ ދުވަހުގެރޭ ކުޅޭއިރު، ފުރަތަމަ މެޗުގައި ސްޓޯކް ސިޓީ ނުކުންނާނީ ޓޮޓެންހަމް ހޮޓްސްޕާއާ ދެކޮޅަށެވެ. އަދި ފަހު ކުއާޓާގައި އެވަޓަން ބައްދަލުކުރާނީ މެންޗެސްޓާ ޔުނައިޓެޑާއެވެ.