ޔޫވީ އަތުން ވެލެންސިއާއަށް ފަސޭހަ މޮޅެއް

ދިރާގު ދިވެހި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުން ޔުނައިޓެޑް ވިކްޓަރީ (ޔޫވީ) އަތުން ފަސޭހަކަމާއެކު ކުލަބު ވެލެންސިއާ މޮޅުވެއްޖެއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗުން ވެލެންސިއާ މޮޅުވީ 4-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ދެ ޓީމުންވެސް ވަނީ ރަނގަޅު ހަމަލާތަކެއް އުފައްދާފައެވެ. އެގޮތުން މެޗުގެ ކުރީކޮޅު ވެލެންސިއާގެ ހުސައިން ނިޔާޒް މުޙައްމަދު (ބޮކުރީ) އާއި އަލީ ފާސިރު (ސެންޓޭ) ފޮނުވާލި ހަމަލާތައް ޔޫވީގެ ގޯލްކީޕަރު ރުސްލާން އާމިރޯފް ވަނީ ދިފާއުކޮށްފައެވެ. އަދި އޭގެ ފަހުން މެޗުގެ 22 ވަނަ މިނެޓުގައި ޔޫވީގެ އިސްމާޢީލް އީސަ (މެސީ) އަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ވެލެންސިއާގެ ގޯލްކީޕަރު މުޙައްމަދު ޝަފީއު ވަނީ މަތަކޮށްފައެވެ.

ދެ ޓީމުގެ ފަރާތުންވެސް ފުރަތަމަ ހާފުގައި ވާދަވެރި ކުޅުމެއް ފެނިގެންދިޔައިރު، މެޗުގެ 32 ވަނަ މިނެޓުގައި ވެލެންސިއާގެ ކެޕްޓަން އަލީ އަޝްފާގު (ދަގަނޑޭ) ވަނީ ނުރައްކާތެރި ހަމަލާއެއް އުފައްދާފައެވެ. މި ހަމަލާވެސް ޔޫވީގެ ގޯލްކީޕަރު ވަނީ ދިފާއުކޮށްފައެވެ. އެކަމަކު ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް ވެލެންސިއާއިން ވަނީ މެޗުގައި ލީޑު ނަގާފައެވެ. ދަގަނޑޭ ދިން ޕާހަކުން މި ލަނޑު ވެލެންސިއާއަށް ކާމިޔާބުކޮށްދިނީ ސެންޓޭއެވެ. އަދި ދެވަނަ ހާފު ފަށައިގެން ހަވަނަ މިނެޓުގައި ބޮކުރީ ނަގައިދިން ހުރަހަކުން ދަގަނޑޭ ވަނީ ވެލެންސިއާއަށް ލީޑު ފުޅާކޮށްދީފައެވެ.

އޭގެ ފަހުންވެސް ދެވަނަ ހާފުގައި ވެލެންސިއާއިން ރަނގަޅު ހަމަލާތަކެއް އުފެއްދިއިރު، މެޗުގެ 69 ވަނަ މިނެޓުގައި އެ ޓީމުން ވަނީ ތިންވަނަ ލަނޑެއް ޖަހާފައެވެ. ދަގަނޑޭ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ފުރަތަމަ ލަނޑުވެސް ޖެހި ސެންޓޭއެވެ. އަދި ވެލެންސިއާއިން ޖެހި ހަތަރުވަނަ ލަނޑު މެޗު ނިމެން 10 މިނެޓަށް ވެފައި ވަނިކޮށް ކާމިޔާބުކޮށްދިނީ އަބްދުﷲ މިދުހަތު ފަހުމީ (ބިޗަޑް) އެވެ.

މެޗަށްފަހު ވެލެންސިއާގެ ކޯޗު މުޙައްމަދު އާތިފް (އާތީ) ބުނީ ގޭމް ޕްލޭނާ އެއްގޮތަށް ކުޅެ، ދެ މެޗުން ހަ ޕޮއިންޓް ހޯދުމުން ހިތްހަމަޖެހޭ ކަމަށާއި އެކަމަކު އަދި ޓީމުގެ ކުޅުންތެރިންގެ ފިޓްނަސް ރަނގަޅުކުރަން ޖެހޭ ކަމަށެވެ.

ޔޫވީގެ ކޯޗު މުޙައްމަދު އާދަމް ބުނީ ފަރިތަކުރުންތަކުގައި ބޭނުންކުރި ފޯވާޑަށް އަނިޔާވުމުން މި މެޗުގައިވެސް އޭނާ ބޭނުން ނުކުރެވުނު ކަމަށާއި، އެކަމުގެ ސަބަބުން އުނދަގޫތަކެއް ކުރިމަތިވި ކަމަށެވެ. އެހެންކަމުން ކުރިއަށް އޮތް މެޗުތަކުގައި ފޯމޭޝަން ބަދަލުކޮށްގެންވެސް ނަތީޖާ ނެރެން މަސައްކަތްކުރާނެ ކަމަށްވެސް އޭނާ ބުންޏެވެ.

އެއް އަހަރުގެ މެދުކެނޑުމަކަށްފަހު ދިރާގު ދިވެހި ޕްރިމިއާ ލީގުގައި ވެލެންސިއާ ވާދަކުރަމުން އަންނައިރު، މި މޮޅާއެކު އެ ޓީމުން ވަނީ ލީގުގައި ކުޅުނު ދެ މެޗުންވެސް މޮޅުވެ ހަ ޕޮއިންޓް ހަމަކޮށްފައެވެ. އެގޮތުން ލީގުގައި ކުޅުނު ފުރަތަމަ މެޗުން ވެލެންސިއާ މޮޅުވީ ކުލަބު ގްރީން ސްޓްރީޓްސް އަތުން 1-0 ގެ ނަތީޖާއަކުންނެވެ. އަދި ޔޫވީ ވަނީ ލީގުގައި މިހާތަނަށް ކުޅުނު ދެ މެޗުންވެސް ބަލިވެފައެވެ.