ޔުނައިޓެޑް ޔޫރޮޕާ ލީގަށް، ޕީއެސްޖީ މެޗު ސަސްޕެންޑް

ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ރަށުން ބޭރުގައި އާރްބީ ލެއިޕްޒީގް އަތުން ބަލިވެ މުބާރާތުގެ ގްރޫޕް ސްޓޭޖުން މެންޗެސްޓާ ޔުނައިޓެޑް ކަޓައިފިއެވެ.

އަންގާރަ ދުވަހުގެރޭ ކުޅުނު މެޗުން ޔުނައިޓެޑް ބަލިވީ 3-2 ގެ ނަތީޖާއަކުންނެވެ.

ލެއިޕްޒީގުގެ ދަނޑުގައި ކުޅުނު މި މެޗުގެ ވަރަށް ކުރީކޮޅު އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ ދެވަނަ މިނެޓުގައި ލެއިޕްޒީގަށް ލީޑު ނަގައިދިނީ އެންޖެލީނިއޯއެވެ. އަދި މެޗުގެ 13 ވަނަ މިނެޓުގައި އަމަދޫ ހައިދާރާ ވަނީ ލެއިޕްޒީގަށް ލީޑު ފުޅާކޮށްދީފައެވެ. އޭގެ ފަހުން މެޗުގެ ފުރަތަމަ ހާފުގައި ލެއިޕްޒީގުގެ ވިލީ އޯބާން ލަނޑެއް ޖެހި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެ ލަނޑު އޮފްސައިޑް ކަމަށް ނިންމާފައެވެ.

މި މެޗުގައި ލެއިޕްޒީގުން ކާމިޔާބުކުރި ތިންވަނަ ލަނޑު މެޗުގެ 69 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޖަސްޓިން ކްލައިވަޓެވެ. އެކަމަކު އޭގެ ފަހުން މެޗުގެ 80 ވަނަ މިނެޓުގައި ލިބުނު ޕެނަލްޓީއަކުން ބްރޫނޯ ފެނާންޑޭސް ވަނީ ޔުނައިޓެޑަށް ލަނޑެއް ޖަހައިދީފައެވެ. އަދި އޭގެ ދެ މިނެޓު ފަހުން ޕައުލް ޕޮގްބާ ވަނީ ޔުނައިޓެޑަށް ފަރަގު ކުޑަކޮށްދީފައެވެ.

މި މެޗުން ބަލިވެ މި ސީޒަނުގެ ޔުއެފާ ޔޫރޮޕާ ލީގަށް ޔުނައިޓެޑެޑް ވެއްޓުނުއިރު، މިއީ 2015-2016 ވަނަ އަހަރުގެ ސީޒަނަށްފަހު ޔުނައިޓެޑް ޗެމްޕިއަންސް ލީގުގެ ގްރޫޕް ސްޓޭޖުން ކެޓި ފުރަތަމަ ފަހަރެވެ.

ދެން މި ގްރޫޕުގައި ހިމެނޭ ޕީއެސްޖީ އާއި އިސްތަންބޫލް ބަޝަކްޝެހީރް އަންގަރަ ދުވަހުގެރޭ ބައްދަލުކުރި މެޗު ސަސްޕެންޑް ކުރީ ނަސްލީ ތަފާތު ކުރުމުގެ މައްސަަލައަކާ ގުޅިގެންނެވެ.

މި މެޗު ހުއްޓާލަން ޖެހުނީ މެޗުގެ ހަތަރުވަނަ އޮފިޝަލް ކަމަށްވާ ސަބެސްޓިއަން ކޮލްޓެސްކޫ ބަޝަކްޝެހީރުގެ އެސިސްޓަންޓް ކޯޗު ޕިއޭރޭ ވެބޯއާ ނަސްލީ ގޮތުން ދިމާކުރުމުންނެވެ. މެޗުގެ ހަތަރުވަނަ އޮފިޝަލް ކޮލްޓެސްކޫ ދިން ލަފައަކަށް ބަލައި ރެފުރީ ވަނީ ވެބޯއަށް ރަތް ކާޑު ދައްކާފައެވެ. ރިޕޯޓުތައް ބުނާ ގޮތުން ހަތަރުވަނަ އޮފިޝަލް ކޮލްޓެސްކޫ ބަޝަކްޝެހީރުގެ އެސިސްޓަންޓް ކޯޗަށް އިޝާރާތްކޮށް "ކަޅު މީހާ" މި ބަސް ވަނީ ބޭނުން ކޮށްފައެވެ. އެއާއެކު ކޮލްޓެސްކޫ ދެއްކި ވާހަކަތައް ބަޝަކްޝެހީރުގެ ބެންޗުގައި އިން ފޯވާޑް ޑެމްބަ ބާ އާއި ޕީއެސްޖީގެ އޮފިޝަލުން ވަނީ ރެފުރީގެ ސަމާލުކަމަށް ގެނެސްފައެވެ.

އަދި ކޮލްޓެސްކޫ ލައިގެން މެޗު ކުރިއަށްގެންދަން ބޭނުންނުވާތީ މެޗުގެ 14 މިނެޓު ކުޅެފައި ވަނިކޮށް ބަޝަކްޝެހީރުގެ ކުޅުންތެރިން ވަނީ ދަނޑުން ފާބާފައެވެ. އެއާއެކު ޕީއެސްޖީގެ ކުޅުންތެރިންވެސް ވަނީ ދަނޑުން ފާބާފައެވެ.

މި މައްސަލައިގައި ޔުއެފާއިން ނެރުނު ބަޔާނެއްގައި ވަނީ ކޮލްޓެސްކޫގެ މައްސަލަ ތަހުގީގުކުރާނެކަން ހާމަކޮށްފައެވެ. އަދި ޕީއެސްޖީ އާއި ބަޝަކްޝެހީރް ބައްދަލުކުރާ މެޗުގެ ހޯމަ ދުވަހުގެރޭ 14 މިނެޓުން ފަށައިގެން އަލުން ކުޅުމަށްވެސް ޔުއެފާއިން މިހާރު ވަނީ ތާވަލުކޮށްފައެވެ.

މި މެޗުން ކޮންމެ ނަތީޖާއެއް ނުކުން ނަމަވެސް، ގްރޫޕް އެޗްގައި ހިމެނޭ ލެއިޕްޒީގާއި ޕީއެސްޖީ މިހާރު ވަނީ ދެވަނަ ބުރަށް ކޮލިފައިވެފައެވެ. މި ގްރޫޕުގެ އެއްވަނައިގައި ލެއިޕްޒީގް އޮތީ ހަ މެޗުން 12 ޕޮއިންޓާއެކުއެވެ. ދެވަނައިގައި އޮތް ޕީއެސްޖީއަށް ފަސް މެޗުން ނުވަ ޕޮއިންޓް ލިބިފައިވާއިރު، ތިންވަނައިގައި އޮތް ޔުނައިޓެޑަށް ހަ މެޗުން ލިބިފައިވަނީ ނުވަ ޕޮއިންޓެވެ. އެހެންކަމުން ޕީއެސްޖީއަށް ކުރި ލިބެނީ ހެޑް-ޓު-ހެޑް ގަވާއިދުންނެވެ. އަދި މި ގްރޫޕުގެ ފުލުގައި ބަޝަކްޝެހީރް އޮތީ ފަސް މެޗުން ތިން ޕޮއިންޓް ހޯދައިގެންނެވެ.