ނިއުކާސަލް ބަލިކޮށް ޗެލްސީ އެއްވަނައަށް

ނިއުކާސަލް ޔުނައިޓެޑް ބަލިކޮށް އިނގިރޭސި ޕްރިމިއާ ލީގުގެ އެއްވަނައަށް ޗެލްސީ ޖެހިލައިފިއެވެ.

ލީގުގައި ހޮނިހިރު ދުވަހުގެރޭ ކުޅުނު މެޗުން ޗެލްސީ މޮޅުވީ 2-0 ގެ ނަތީޖާއަކުންނެވެ. މިއީ ޗެލްސީން ޖެހިޖެހިގެން ހޯދި ފަސްވަނަ މޮޅެވެ.

ނިއުކާސަލްގެ ދަނޑުގައި ކުޅުނު މި މެޗުގެ ވަރަށް ކުރީކޮޅު ޗެލްސީން ވަނީ ލީޑު ނަގާފައެވެ. މެޗު ފަށައިގެން 10 ވަނަ މިނެޓުގައި ޗެލްސީން ލީޑު ނެގިއިރު، މި ލަނޑަކީ ނިއުކާސަލްގެ ފެޑެރީކޯ ފެނާންޑޭޒް އަތުން ބައިކޮޅަށް ވަން ލަނޑެކެވެ. އޭގެ ފަހުން ފުރަތަމަ ހާފުގައި ޗެލްސީން ގިނަ ހަމަލާތަކެއް އުފެއްދިއިރު، އެ ހަމަލާތަކުގެ ހުރަހަކަށްވީ މެޗުގައި މޮޅު ކުޅުމެއް ދެއްކި ނިއުކާސަލްގެ ގޯލްކީޕަރު ކާލް ޑާލޯއެވެ.

މި މެޗުގައި ޗެލްސީން ލީޑު ފުޅާކޮށްފައިވަނީ 65 ވަނަ މިނެޓުގައެވެ. ޓިމޯ ވާނާ ދިން ޕާހަކުން މި ލަނޑު ޗެލްސީއަށް ކާމިޔާބުކޮށްދިނީ ފޯވާޑް ޓެމީ އަބްރަހަމެވެ. އޭގެ ފަހުން މި މެޗުގައި ނިއުކާސަލުން އެންމެ ރަނގަޅު ފުރުސަތެއް ތަނަވަސްކުރީ އެ ޓީމުގެ މިޑްފީލްޑަރު ސީން ލޯންގްސްޓާފެވެ. އެކަމަކު އޭރިއާ ބޭރުން އޭނާ ފޮނުވާލި ބާރު ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

މި މެޗުގައި ޗެލްސީ ކޮޅަށް ލަނޑެއް ވަދެފައިނުވާއިރު، މިއީ މި ނިމުނު ޓްރާންސްފާގައި ޗެލްސީއާ ގުޅުނު ގޯލްކީޕަރު އެޑޮއާޑް މެންޑީ އެ ޓީމަށް ކުޅެދިން ނުވަ މެޗުގެ ތެރެއިން ހާސިލުކުރި ހަތްވަނަ ކްލީންޝީޓެވެ. ޕްރިމިއާ ލީގުގައި މިހާތަނަށް އޭނާ ފަސް މެޗު ކުޅެފައިވާއިރު، މެންޑީ ކޮޅަށް ވަދެފައިވަނީ އެންމެ ލަނޑެކެވެ.

ނިއުކާސަލް އަތުން ހޯދި މޮޅާއެކު ޗެލްސީ ތާވަލުގެ އެއްވަނައަށް ޖެހިލީ ކުޅުނު ނުވަ މެޗުން ލިބުނު 18 ޕޮއިންޓާއެކުއެވެ. ދެވަނައިގައި އޮތް ލެސްޓާ ސިޓީއަށް އަށް މެޗުން 18 ޕޮއިންޓް ލިބިފައިވާއިރު، ތިންވަނައިގައި އޮތް ޓޮޓެންހަމް ހޮޓްސްޕާ އާއި ހަތަރުވަނައިގައި އޮތް ލިވަޕޫލަށް އަށް މެޗުން ލިބިފައިވަނީ 17 ޕޮއިންޓެވެ.