އަންނަ އަހަރުގެ މުޅި ބަޖެޓްގެ 11 އިންސައްތަ ވަނީ ތައުލީމީ ދާއިރާއަށް ހާއްސަކޮށްފައި: އެޑިއުކޭޝަން މިނިސްޓަރ

2021 އަށް ކަނޑައަޅާފައިވާ ބަޖެޓަށް ބަލާއިރު މުޅި ބަޖެޓްގެ 11 އިންސައްތަ ހާއްސަކޮށްފައިވަނީ ތައުލީމީ ދާއިރާއަށް ކަމަށާއި މިއީ އުއްމީދީ ބަޖެޓެއް ކަމަށް އެޑިއުކޭޝަން މިނިސްޓަރ އައިޝަތު އަލީ ވިދާޅުވެއްޖެ އެވެ.

ރާއްޖެޓީވީގެ 'ބަޖެޓް 2021' ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ އެޑިއުކޭޝަން މިނިސްޓްރީއަށް ހަމަ އެކަނި ބެލިނަމަވެސް ބަޖެޓުގައި 3 ބިލިއަން އެމިނިސްޓްރީއަށް ކަނޑައަޅާފައިވާ ކަމަށެވެ.

Advertisement

އަދި އަންނަ އަހަރަށް ކުރަން ނިންމާފައިވާ ކަންކަން ކުރުމަށް ބޭނުންވާ ވަރަށް ބަޖެޓް ލިބިފައިވާކަން ފާހަގަ ކުރައްވަމުން މިނިސްޓަރ ވިދާޅުވީ ސަރުކާރުގެ އެންމެ ބޮޑު އެއް އަމާޒަކީ ހުރިހާ ހިދުމަތްތަކެއް ލާމަރުކުރުން ކަމަށާއި ތައުލީމީ ހިދުމަތްތައް ފަސް ސަރަހައްދެއްގައި ތަރައްގީ ކުރުމަށް އިސްކަމެއް ދީގެން ބަޖެޓް ކޮށްފައިވާ ކަމަށެވެ.

މިސަރަހަދުތައް ތަރައްގީ ކުރުމަށް ވިސްނާފައިވާ ގޮތް ކިޔައި ދެއްވަމުން މިނިސްޓަރ ވިިދާޅުވީ އެ މިނިސްޓްރީގެ ވިސްނުމަކީ މިހާރު އެ ހިސާބުތަކުގައިވާ ވަސީލަތްތައް އިތުރަށް ތަރައްގީކުރުން ކަމަށެވެ.

މިނިސްޓަރ ވިދާޅުވީ ހާއްސަ އެހީއަށް ބޭނުންވާ ކުދިންނަށް އަމާޒުކޮށްގެން ރާއްޖޭގެ އެކި ކަންކޮޅުތަކުގައި 9 ހަބް ސްކޫލެއް ގާއިމް ކުރެއްވުމުގެ މަސައްކަތް ކުރިއަށް ދާކަމަށެވެ. އަދި މާލޭ ސަރަހައްދުގެ ސްކޫލްތަކުގައި ކުރެވެމުން ދާ މަސައްކަތުގެ ތެރެއިން ދަރުމަވަންތަ ސްކޫލުގެ މަސައްކަތް މިހާރުވެސް ކުރެވެމުން ދާކަމަށް މިނިސްޓަރ ވިދާޅުވި އެވެ. މީގެ އިތުރުން ހުޅުމާލޭގައި އިތުރު އާ ސްކޫލެއް ގާއިމް ކުރުމުގެ މަސައްކަތް ކުރެވެމުން ދާކަމަށާ އިންޓަރނޭޝަނަލް ޕާޓީ އަކުން ބައިލެންގުއަލް ސްކޫލެއް އެޅުމަށް ތައްޔާރުވަމުން ދާކަން މިނިސްޓަރ ހާމަ ކުރެއްވި އެވެ.

އިތުރަށް ވާހަކަ ދައްކަވަމުން މިނިސްޓަރ ވިދާޅުވީ މިހާރުވެސް ކުރިއަށްދާ ނާސްތާ ޕްރޮގްރާމް އަންނަ އަހަރުވެސް ބަދަލުތަކަކާއި އެކު ހިންގުމަށް ބަޖެޓް ކުރެވިފައިވާކަމަށާއި، ބަދަލު އަންނާނީ މެނޫއަށް ކަމަށެވެ. އަދި ކޮވިޑް-19 އާއި ގުޅިގެން ސާފުތާހިރު ކަން ދެމެހެއްޓޭނެ ފަދަ ގޮތަކަށް މި މެނޫ ހެދުމުގެ މަސައްކަތް ކުރަމުންދާކަން މިނިސްޓަރ ފާހަގަކުރެއްވި އެވެ.

މީގެއިތުރުން މިނިސްޓަރ ވަނީ އެންމެ ބޮޑު އެއް ކާމިޔާބީއެއްގެ ގޮތުގައި ތައުލީމީ ގާނޫނު ހެދުން ފާހަގަ ކުރައްވާފައެވެ. އަދި ކޮވިޑް- 19 ގެ ދަތި އުނދަގޫތަކާއި އެކުވެސް ދަރިވަރުންގެ ކިޔެވުން ކުރިއަށް ގެންދެވުނުކަން ވަނީ ފާހަގަ ކުރައްވާފަ އެވެ.

އެގޮތުން ޔުނިސެފްގެ އެހީގައި މިހާތަނަށް 4 ހާހަށް ވުރެ ގިނަ މުދައްރިސުންނަށް އޮންލައިން ޕްލެޓްފޯމްތަކަށް އަހުލުވެރިވުމުގެ ގޮތުން ޓްރެއިނިންގ ދީފައިވާކަމަށް މިނިސްޓަރ ވިދާޅުވި އެވެ. އަދި މުދައްރިސުންގެ އަމިއްލަ ވަގުތުތަކުގައި ހިންގުނު އެކިއެކި ތަމްރީނުގެ ޕްރޮގްރާމްތަކުގައި ބައިވެރިވެފައިވާކަން މިނިސްޓަރ ހާމަކުރެއްވި އެވެ.

މިނިސްޓަރ ވިދާޅުވީ ސްކޫލަށް ދަރިވަރުން މިހާރު ގެންދަން ފަށާފައިވާއިރު އެންމެ ބޮޑު އިސްކަމެއް ދީފައިވަނީ ދަރިވަރުންނާއި މުދައްރިސުންގެ ރައްކާތެރިކަން ކަށަވަރު ކުރުމަށް ކަމަށެވެ.

މީގެ އިތުރުން މުދައްރިސުން ޓްރާންސްފަރ ކުރުމުގައި އެންމެ ބޮޑު އިސްކަމެއް ދީފައިވަނީ އެ މުދައްރިސަކު ދާން ބޭނުންވާ ސްކޫލެއްގައި އެ މުދައްރިސެއްގެ މަގާމު އޮތްތޯ ބެލުމަށް ކަމަށާއި މިނިސްޓްރީއަށް މުދައްރިސުން ޓްރާންސްފަރ ކުރުމުގައި ވެވެން އޮތް މިންވަރަކުން އެހީވަމުން އަންނަ ކަމަށް މިނިސްޓަރ އައިޝަތު އަލީ ވިދާޅުވި އެވެ.

އަދި އާކުދިން، މުދައްރިސުންގެ ގޮތުގައި މުޖުތަމައުއަށް ނެރުމުގެ މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ. އެގޮތުން ކުދިން މިދާއިރާއަށް ޝައުގުވެރި ކުރުމުގެ ގޮތުން ކެމްޕެއިންތަކެއް ހިންގަމުންދާކަމަށާއި މުދައްރިސުންގެ އަޑު، މުޖްތަމައުއަށް އިއްވުމަށް މަސައްކަތް ކުރަމުން ގެންދާކަމަށް މިނިސްޓާރ ވިދާޅުވި އެވެ.