އަޔަލެންޑް އަތުން އިންގްލެންޑަށް ފަސޭހަ މޮޅެއް

ޔުއެފާ ނޭޝަންސް ލީގުގެ މެޗުތަކަށް ތައްޔާރުވުމުގެ ގޮތުން ބުރާސްފަތި ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުގައި އަޔަލެންޑް އަތުން ފަސޭހަކަމާއެކު އިންގްލެންޑް މޮޅުވެއްޖެއެވެ.

ވެމްބްލީ ސްޓޭޑިއަމުގައި ކުޅުނު މި މެޗުން އިންގްލެންޑް މޮޅުވީ 3-0 ންނެވެ.

މި މެޗުގައި އިންގްލެންޑުން ލީޑު ނަގާފައިވަނީ މެޗު ފެށިގެން 18 ވަނަ މިނެޓުގައެވެ. ހެރީ ވިންކްސް ނަގައިދިން ހުރަހަކުން މި ލަނޑު އިންގްލެންޑަށް ކާމިޔާބުކޮށްދިނީ ޑިފެންޑަރު ހެރީ މެގުއާއެވެ. އަދި ފުރަތަމަ ހާފު ނިމުމުގެ ކުރިން މެޗުގެ 31 ވަނަ މިނެޓުގައި އިންގްލެންޑުން ވަނީ ލީޑު ފުޅާކޮށްފައެވެ. ޖެކް ގްރީލިޝް ދިން ޕާހަކުން މި ލަނޑު އެ ގައުމަށް ކާމިޔާބުކޮށްދިނީ ފޯވާޑް ޖޭޑަން ސަންޗޯއެވެ.

މި މެޗުގައި އިންގްލެންޑުން ކާމިޔާބުކުރި ތިންވަނަ ލަނޑު ދެވަނަ ހާފު ފަށައިގެން 11 ވަނަ މިނެޓުގައި ޕެނަލްޓީއަކުން ކާމިޔާބުކޮށްދިނީ ފޯވާޑް ޑޮމިނިކް ކަލްވެޓް-ލެވިންއެވެ. މިއީ އޭރިއާ ތެރެއިން އިންގްލެންޑުގެ ބުކަޔޯ ސަކާއަށް އަޔަލެންޑުގެ ސައިރަސް ކްރިސްޓީ ކުރި ފައުލަކަށް ރެފުރީ ދިން ޕެނަލްޓީއެކެވެ.

ބުރާސްފަތި ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުން އިންގްލެންޑް މޮޅުވިއިރު، ވޭލްސް އާއި އެމެރިކާ ބައްދަލުކުރި ބައިނަލްއަގުވާމީ އެކުވެރިކަމުގެ މެޗު ނިމުނީ ދެ ގައުމުން ކުރެ ގައުމަކަށް ލަނޑެއް ކާމިޔާބުނުކުރެވި އެއްވަރުވެގެންނެވެ.