އިނގިރޭސި ޕްރިމިއާ ލީގުގައި އާދީއްތަ ދުވަހުގެ ހަވީރު ކުޅުނު މެޗުން ވެސްޓް ބްރޮމް އަތުން ފަހު ވަގުތު ޓޮޓެންހަމް ހޮޓްސްޕާ މޮޅުވެއްޖެއެވެ.

ރަށުން ބޭރުގައި ކުޅުނު މި މެޗުން ޓޮޓެންހަމް މޮޅުވީ 1-0 ގެ ނަތީޖާއަކުންނެވެ.

ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ލަނޑު ޖަހަން އެންމެ ހުސް ފުރުސަތެއް ލިބުނީ ޓޮޓެންހަމުގެ ސޮން ހުއެން-މިންއަށެވެ. އެކަމަކު އޭރިއާ ތެރޭގައި ހުރެ ސޮން ފޮނުވާލި ބޯޅަ ވެސްޓް ބްރޮމުގެ ޑިފެންޑަރުން ވަނީ ދިފާއުކޮށްފައެވެ.

އަދި ދެވަނަ ހާފުގައި ޓޮޓެންހަމުގެ ޖިއޮވާނީ ލޮ ސެލްސޯއަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ. މި ހާފުގައި ވެސްޓް ބްރޮމުގެ ކާލަން ގްރާންޓް ބޮލުން ނުރައްކާތެރި ހަމަލާއެއް ފޮނުވާލި ނަމަވެސް، ޓޮޓެންހަމުގެ ގޯލްކީޕަރު ހޫގޯ ލޮރިސް ވަނީ ހުށިޔާރުކަމާއެކު އެ ހަމަލާ ދިފާއުކޮށްފައެވެ.

މި މެޗުން ޓޮޓެންހަމް މޮޅުވީ މެޗު ނިމެން ދެ މިނެޓަށް ވެފައި ވަނިކޮށް ހެރީ ކޭން ކާމިޔާބުކުރި ލަނޑުންނެވެ. އޭނާ މި ލަނޑު ކާމިޔާބުކުރީ މެޓް ޑޮހަޓީ ނަގައިދިން ހުރަހަކުންނެވެ. މި ލަނޑަކީ ޕްރިމިއާ ލީގުގައި ކޭން ކާމިޔާބުކުރި 150 ވަނަ ލަނޑެވެ. އެއާއެކު އޭނާ ވެފައިވަނީ ޕްރިމިއާ ލީގުގެ ތާރީޚުގައި 150 ލަނޑު ހަމަކުރި 10 ވަނަ ކުޅުންތެރިޔާއަށެވެ.

މި މޮޅާއެކު ޓޮޓެންހަމް އޮތީ ތާވަލުގެ ދެވަނައިގައި އަށް މެޗުން 17 ޕޮއިންޓާއެކުއެވެ. އަދި ޓޮޓެންހަމް އަތުން ބަލިވި ވެސްޓް ބްރޮމް އޮތީ ތާވަލުގެ ފުލުން ތިންވަނައިގައި އަށް މެޗުން ތިން ޕޮއިންޓާއެކުއެވެ.