މާފުށީގައި ހުރި އެމްޑީޕީގެ ބޮޑުދިދަ ފުލުހުން ގެންގޮސްފި
22 އެޕްރީލު 2017 | ހޮނިހިރު 23:46ދިދަ ގެންދިޔައީ ކޯޓު އަމުރެއްގެ ދަށުން
މާފުށީގައި ހުރި ދިދަ ގެންދިއުމުގައި ފުލުހުން ހަރަކާތްތެރިވަނީ
ކ. މާފުށީގައި ދިވެހި ރައްޔިތުންގެ ޑިމޮކްރެޓިކް ޕާޓިން ނަގާފައި ހުރި އެ ޕާޓީގެ ބޮޑު ދިދަ ފުލުހުން ގެންގޮސްފިއެވެ.
މައުލޫމާތު ލިބިފައިވާ ގޮތުގައި، އެމްޑީޕީން ހޮނިހިރު ދުވަހުގެރޭ މާފުށީގައި ބޭއްވި ޖަލްސާއަށް ތައްޔާރުވަމުން ދަނިކޮށް، މި ދިދަ ކަނޑާލައިގެން ތިރިކޮށް، ފުލުހުން ދިދަ ގެންގޮސްފައިވަނީ، އެ ދިދަ ނަގާފައި ހުރި ދަނޑި މާ ދިގު ކަމަށް ބުނެއެވެ.
ފުލުހުންގެ މީޑިއާ އޮފިޝަލް ވިދާޅުވީ، މާފުށީގައި ހުރި އެމްޑީޕީގެ ދިދަ ފުލުހުންގެ ބެލުމުގެދަށަށް ގެންގޮސްފައިވަނީ، ހޯމް މިނިސްޓްރީއިން އާންމުކޮށްފައިވާ "ދިވެހި ޤައުމީ ދިދަ ބޭނުންކުރުމާ ގުޅޭ އުސޫލު" އާއި ޚިލާފަށް އެ ދިދަ ނަގާފައި ހުރުމުން، އެކަން އިސްލާހު ކުރުމަށް ތަކުރާރުކޮށް އެންގުމުންވެސް އިސްލާހު ނުކުރުމުން، ކޯޓު އަމުރެއްގެ ދަށުން ކަމަށެވެ.
ހޮނިހިރު ދުވަހުގެރޭ މާފުށީގައި ބޭއްވި އެމްޑީޕީގެ ކެމްޕެއިން ޖަލްސާ ގައި، ފުލުހުން މި ދިދަ ގެންދިޔަ ގެންދިއުމާއި ގުޅޭގޮތުން ވާހަކަދައްކަވަމުން، ރައްޔިތުންގެ މަޖިލީހުގެ އައްޑޫ ސިޓީ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ، ހަމައެކަނި އެމްޑީޕީގެ ދިދަ ފުލުހުން ގެންދަންޖެހޭ ސަބަބެއް ނެތް ކަމަށާ، އެ ރަށުގައި އެއަށްވުރެ ބޮޑު ދިދަދެއް ޕީޕީއެމް އިންވެސް ނަގާފައިވާކަމަށެވެ. އެހެންކަމުން ފުލުހުން ޤާނޫނާއި ޤަވާއިދާއި އުސޫލު ތަންފީޒު ކުރަނީ އިންސާފުން ނޫންކަމަށް ތުޙުމަތުމަތުކުރައްވާ ރޮޒައިނާ ވަނީ ފުލުހުންނަށް ފާޑުވިދާޅުވެފައެވެ.
"ދިވެހި ޤައުމީ ދީދަ ބޭނުންކުރުމާ ގުޅޭ އުސޫލު" އާއި ޚިލާފުވުމުން މާފުށީގައި ހުރި އެމްޑީޕީގެ ބޮޑު ދިދަ ފުލުހުން ގެންދިޔައިރު، ހަމަ އެ އުސޫލުގެ ދަށުން ކަމަށް ބުނެ ފުލުހުން މީގެ ކުރިން ވަނީ ވެރިކަންކުރާ ޕީޕީއެމްގެ އިންތިޚާބީ ރައީސް، އަދި ކުރީގެ ރައީސުލްޖުމްހޫރިއްޔާ އަލްއުސްތާޛް މައުމޫން ޢަބްދުލްޤައްޔޫމްގެ އޮފީހުގައި ހުރި ޤައުމީ ދިދަވެސް ގެންގޮސްފައެވެ.
