ކޮވިޑް-19 އަށް ކުޅުންތެރިންތަކެއް ޕޮޒިޓިވްވުމުން އިޓާލިއަން ލީގުގައި މި މަހުގެ ހަތަރުވަނަ ދުވަހު ޔުވެންޓަސްއާ ދެކޮޅަށް ކުޅެން ހަމަޖެހިފައި އޮތް މެޗަށް ނާޕޮލީން ހާޒިރުނުވުމުން، އެ މެޗުން ޔުވެންޓަސް މޮޅުވި ކަމަށް ނިންމައިފިއެވެ.

ޔުވެންޓަސްގެ ދަނޑުގައި ކުޅެން ހަމަޖެހިފައި އޮތް މި މެޗަށް ނާޕޮލީގެ ކުޅުންތެރިން ހާޒިރުނުވުމުން 45 މިނެޓު ފަހުން ރެފުރީ ވަނީ މެޗު ނިންމާލާފައެވެ.

މި މެޗަށް ނާޕޮލީ ހާޒިރުނުވީ މެޗުގެ ކުރިން އެ ޓީމުގެ ދެ ކުޅުންތެރިން ކަމަށްވާ ޕިއޮޓްރޭ ޒިއެލިންސްކީ އާއި އެލިފް އެލްމާސް ކޮވިޑް-19 އަށް ޕޮޒިޓިވްވުމުންނެވެ. އަދި އެއާއެކު ނާޕޮލީގެ މުޅި ޓީމު އައިސޮލޭޓް ވާން ނޭޕްލްސް ސިއްހީ އިދާރާއިން އެންގުމާ ގުޅިގެންނެވެ.

ނާޕޮލީގެ ދެ ކުޅުންތެރިން ކޮވިޑް-19 އަށް ޕޮޒިޓިވްވުމާއެކު މީގެ ކުރިން އެ ޓީމުން ވަނީ މި މެޗު ފަސްކޮށްދިނުމަށްވެސް އެދެފައެވެ. އެކަމަކު އެގޮތަށް އިޓާލިއަން ލީގުން ނިންމާފައިނުވާތީ، ޔުވެންޓަސްއިން ވަނީ މެޗަށް ހާޒިރުވެފައެވެ.

އެކަމަކު އިޓާލިއަން ލީގުން ބުދަ ދުވަހުގެރޭ ނެރުނު ބަޔާނުގައި ވަނީ ކޮވިޑް-19 ގެ އުސޫލުތަކާ ނާޕޮލީ ޚިލާފުވި ކަމަށް ނިންމާ، އެ މެޗުން 3-0 ން ޔުވެންޓަސް މޮޅުވި ކަމަށް ނިންމާފައެވެ. އަދި މެޗަށް ހާޒިރުނުވުމުން ނާޕޮލީގެ ޕޮއިންޓެއް އުނިކުރަންވެސް ވަނީ ނިންމާފައެވެ.

މި މެޗުން ޔުވެންޓަސް މޮޅުވި ކަމަށް ނިންމުމުން، އެންމެ ފަހުގެ ޗެމްޕިއަނުން މިހާރު ވަނީ ތާވަލުގެ ހަތަރުވަނައަށް ޖެހިލާފައެވެ. އެ ޓީމަށް ވަނީ ކުޅުނު ތިން މެޗުން ހަތް ޕޮއިންޓް ލިބިފައެވެ. އަދި ނާޕޮލީ އަތުން ޕޮއިންޓެއް އުނިކުރުމާއެކު އެ ޓީމު ވަނީ ތާވަލުގެ އަށްވަނައަށް ވެއްޓިފައެވެ. ނާޕޮލީއަށް ކުޅުނު ތިން މެޗުން ލިބިފައިވަނީ ފަސް ޕޮއިންޓެވެ.