ނެޓްބޯޅައަށް ވެފައިވާ އިހުމާލު ބޮޑު، ވަޒީރު ވިދާޅުވީ ޒަމާނީ ފެންވަރުގެ ކޯޓެއް އަޅައިދޭނެ ކަމަށް

ރާއްޖޭގައި އަންހެން އެތުލީޓުން ގިނަ އަދަދަކަށް ކުޅެމުން އަންނަ ނެޓްބޯޅައަށް ޒަމާނުއްސުރެން ވެފައިވާ އިހުމާލު ނިމުމަކަށް ގެނެސް، ދާއިމީކޮށް ނެޓްބޯޅަ ކުޅޭނެ ޒަމާނީ ފެންވަރުގެ ކޯޓެއް އަޅައިދޭނެ ކަމުގެ ޔަގީންކަން ކުޅިވަރާ ބެހޭ ވަޒީރު އަޙްމަދު މަޙްލޫފް ދެއްވާފައިވާ ކަމަށް ނެޓްބޯލް އެސޯސިއޭޝަން އޮފް މޯލްޑިވްސްގެ ރައީސް ފަޒުނާ ޖަލީލް ވިދާޅުވެއްޖެއެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ފަޒުނާ ވިދާޅުވީ މީގެ ކުރިން ނެޓްބޯޅަ އަކީ ވަރަށް ގިނަ އަންހެން އެތުލީޓުން ކުޅެމުން އައި ކުޅިވަރެއް ކަމަށާއި، އެހެން ނަމަވެސް އެކި އިހުމާލުތަކުގެ ސަބަބުން ވަރަށް ބޮޑަށް އަޑިއަޅާލާފައިވާ ކުޅިވަރެއް ކަމަށް ގަބޫލުކުރާ ކަމަށެވެ.

ނެޓްބޯޅަ އަކީ އަމިއްލައަށް ކުޅޭނެ ވަސީލަތެއް ނެތް ކުޅިވަރަކަށްވާތީ ގިނަ ދަތިތަކާ ކުރިމަތިލާން ޖެހިފައިވާއިރު، އެކަމަށް ހައްލެއް ހޯދުމަށް ނެޓްބޯޅަ އެސޯސިއޭޝަނުގެ މިހާރުގެ މެނޭޖުމަންޓުން މަސައްކަތް ކުރަމުންދާ ކަމަށާއި، އެކަމަށް މިހާރުގެ ކުޅިވަރާ ބެހޭ ވަޒީރު އަޙްމަދު މަޙްލޫފުގެ ފަރާތުން ވަރަށް ބޮޑު އެއްބާރުލުމެއް ލިބެމުންދާ ކަމަށްވެސް ފަޒުނާ ވިދާޅުވިއެވެ.

މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ކުޅިވަރާ ބެހޭ ވަޒީރު އަޙްމަދު މަޙްލޫފް ވަނީ މިހާރު ކުރިއަށްގެންދާ މަސައްކަތްތަކުގެ ތެރެއިން ނެޓްބޯޅަ ކޯޓެއް އެޅުމަށް ނިންމާފައިވާ ކަމަށް ވިދާޅުވެފައެވެ.

ނެޓްބޯޅަ އެސޯސިއޭޝަނުގެ ރައީސް ފަޒުނާ ވިދާޅުވީ މީގެ ކުރިން ޒުވާނުންގެ މަރުކަޒުގެ އައުޓްޑޯ ކޯޓުގައި ނެޓްބޯޅަ އެސޯސިއޭޝަނުގެ އެކި މުބާރާތްތައް ބާއްވަމުން އައިރު، އެ ބިމުގެ މައްސަލަތަކެއް އުޅޭތީ ނެޓްބޯޅަ އެތަނުގައ މިހާރު ކުޅެވެން ނެތްއިރު، އެ މައްސަލަ ހައްލުވުމާއެކު އެ ބިންވެސް ނެޓްބޯޅަ ކުޅެން ލިބިގެންދާނެ ކަމުގެ ޔަގީން ވަޒީރު ދެއްވާފައިވާ ކަމަށާއި، އެ ބިން ނުލިބިއްޖެނަމަ، ސްޓޭޑިއަމުގައި މިހާރު ނެޓްބޯޅަ ކުޅެމުން އަންނަ ބިން ތަރައްގީ ކުރުމަށް ނިންމާފައިވާ ކަމަށެވެ.

އަދި ނެޓްބޯޅައަށް މިހާރުވެސް ލިބިފައިވާ ވަސީލަތާއެކު ބޮޑު ކުރިއެރުމެއް ގެނައުމަށް މިހާރުގެ ހިންގާ ކޮމިޓީން ވަރަށް ބޮޑަށް މަސައްކަތް ކުރަމުންދާ ކަމަށާއި، އެގޮތުން މި އަހަރުގެ މާޗު މަހުގެ ތެރޭގައި ނެޓްބޯޅައިގެ ވައިޑީޕީ ފެށުމަށްވެސް ތައްޔާރުވި ކަމަށް ފަޒުނާ ވިދާޅުވިއެވެ.

ކޮވިޑް-19 އާ ގުޅިގެން ކުޅިވަރުގެ ހަރަކާތްތައް މި އަހަރު މެދުކެނޑިފައިވާއިރު، މި އަހަރުގެ ކަލަންޑަރަށް ދެން މަސައްކަތް ކުރާނީ އަންނަ އަހަރު ކަމަށާއި، އެގޮތުން އަތޮޅު ތެރެއަށް ނެޓްބޯޅަ ފުޅާ ކުރުމަށް ހާއްސަ ސަމާލުކަމެއް ދޭނެ ކަމަށްވެސް ފަޒުނާ ވިދާޅުވިއެވެ.

އަތޮޅު ތެރެއަށް ނެޓްބޯޅަ ފުޅާކުރުމަށް ވިސްނާއިރު، އެންމެ އިސްކަމެއް ދޭނީ އިންޓަ ސްކޫލް ނެޓްބޯޅަ މުބާރާތް ކުރިއަށްގެންދިޔުމަށް ކަމަށާއި، ހަތް ޒޯނަކަށް ބަހާލައިގެން މުބާރާތް ކުރިޔަށްގެންދާނެ އުސޫލެއް އެކުލަވާލާފައިވާ ކަމަށް ފަޒުނާ ވިދާޅުވިއެވެ.

ކޮންމެ ޒޯނެއްގައި ކުރިއަށްގެންދާ މުބާރާތުގެ އުމުރުފުރާތަކުގެ ޗެމްޕިއަން އަދި ރަނަރަޕް މާލެ އައިސް މާލޭގައި ކުރިއަށްދާ އުމުރުފުރާތަކުގެ ޗެމްޕިއަން އަދި ރަނަރަޕް ޓީމުތަކާއެކު ގްރޭންޑް ނެޓްބޯޅަ މުބާރާތެއް ބޭއްވުމަށް ނިންމިއިރު، އެ މުބާރާތުގެ ސަބަބުން ނެޓްބޯޅައަށް އޮތް ހީނަރު ކަމަށް ނިމުމެއް އަންނާނެ ކަމަށް ނެޓްބޯޅަ އެސޯސިއޭޝަނުން ބުނެއެވެ.

ނެޓްބޯޅައަށް އޮތީ އުންމީދީ ދުވަސްތަކެއް ކަމަށާއި، މިހާރުގެ ހިންގާ ކޮމިޓީގައި ގާބިލު ޓީމެއް އޮތްއިރު، ނެޓްބޯޅަ ކުރިއަށްގެންދެވޭނެ ވިސްނުން އެބަހުރި ކަމަށާއި، ފަސް އަހަރަށް ވަރަށް ފުރިހަމަ ޕްލޭނެއްވެސް އެކުލަވާލެވިފައިވާ ކަމަށް އެސޯސިއޭޝަނުން ބުނެއެވެ. މިހާތަނަށް އަދި ޕްލޭނުގެ ފަސް އިންސައްތަވެސް ކުރިއަށް ނުގެންދެވޭއިރު، މި އަހަރަކީ މަސައްކަތް ބާރު ސްޕީޑުގައި ކުރިއަށްގެންދަން އަމާޒުހިފި އަހަރު ކަމަށް ނެޓްބޯޅަ އެސިއޭޝަނުން ބުނެއެވެ.

ކޮވިޑް-19 ގެ ސަބަބުން ކުޅިވަރުގެ ހުރިހާ ހަރަކާތްތަކެއް ހުއްޓިފައިވާއިރު، ކުޅިވަރުތައް ފަށަން ހުއްދަ ލިބުނުހާ އަވަހަކަށް ނެޓްބޯޅައިގެ ހަރަކާތްތައްވެސް ފަށައިގަންނާނެ ކަމަށާއި، އެ ސޯސިއޭޝަން އޮތީ އެކަމަށް ތައްޔާރަށް ކަމަށް ނެޓްބޯޅަ އެސޯސިއޭޝަނުން ބުނެއެވެ.