ޕެލަސް އަތުން ޗެލްސީއަށް ފަސޭހަ މޮޅެއް

އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކްރިސްޓަލް ޕެލަސް އަތުން ޗެލްސީ ފަސޭހަ މޮޅެއް ހޯދައިފިއެވެ.

އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 4-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައިނުވާއިރު، މި ހާފުގައި ދެ ޓީމުގެ ފަރާތުންވެސް ފެނިގެންދިޔައީ އާދައިގެ ކުޅުމެކެވެ. އެކަމަކު ދެވަނަ ހާފުގައި ޗެލްސީން ރަނގަޅު ކުޅުމެއް ދެއްކިއިރު، މި ހާފު ފަށައިގެން ފަސްވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ބެން ޗިލްވެލްއެވެ. މިއީ މި ޓްރާންސްފާ ބާޒާރުގައި ލެސްޓާ ސިޓީ ދޫކޮށް ޗެލްސީއާ ގުޅުނު ޗިލްވެލް އެ ޓީމަށް ކާމިޔާބުކޮށްދިން ފުރަތަމަ ލަނޑެވެ.

މި މެޗުގައި ޗެލްސީން ލީޑު ފުޅާކުރީ 66 ވަނަ މިނެޓުގައެވެ. ޗިލްވެލް ނަގައިދިން ހުރަހަކުން މި ލަނޑު ޗެލްސީއަށް ކާމިޔާބުކޮށްދިނީ ޑިފެންޑަރު ކާޓް ޒޫމާއެވެ. އަދި މެޗުގެ 78 ވަނަ މިނެޓުގައި ލިބުނު ޕެނަލްޓީއަކުން މިޑްފީލްޑަރު ޖޯޖީނިއޯ ވަނީ ޗެލްސީގެ ތިންވަނަ ލަނޑު ޖަހާފައެވެ. މިއީ އޭރިއާ ތެރެއިން ޗެލްސީގެ ފޯވާޑް ޓެމީ އަބްރަހަމަށް ޕެލަސްގެ ޓީރިކް މިޗެލް ކުރި ފައިލަކަށް ރެފުރީ ދިން ޕެނަލްޓީއެކެވެ.

މި މެޗުގައި ޗެލްސީން ކާމިޔާބުކުރި ހަތަރުވަނަ ލަނޑުވެސް ޖަހާފައިވަނީ ލިބުނު ޕެނަލްޓީއަކުންނެވެ. މެޗުގެ 82 ވަނަ މިނެޓުގައި ލިބުނު މި ޕެނަލްޓީވެސް އެ ޓީމަށް ކާމިޔާބުކޮށްދިނީ ޖޯޖީނިއޯއެވެ. މިއީ އޭރިއާ ތެރެއިން ޗެލްސީގެ ޒުވާން ތަރި ކައި ހަވާޓްޒަށް ޕެލަސްގެ ޑިފެންޑަރު މަމަދޫ ސަކޯ ކުރި ފައުލަކަށް ދިން ޕެނަލްޓީއެކެވެ.

މި މޮޅާއެކު ޗެލްސީ އޮތީ ތާވަލުގެ ހަތަރުވަނައިގައި ކުޅުނު ހަތަރު މެޗުން ލިބުނު ހަތް ޕޮއިންޓާއެކުއެވެ. ޗެލްސީ އަތުން ބަލިވި ޕެލަސް އޮތީ ތާވަލުގެ އަށްވަނައިގައި ހަތަރު މެޗުން ހަ ޕޮއިންޓާއެކުއެވެ.