ފްރެންޗް ލީގުގައި ހުކުރު ދުވަހުގެރޭ އެންޖާސް އަތުން ފަސޭހަކަމާއެކު އެންމެ ފަހުގެ ޗެމްޕިއަން ޕީއެސްޖީ މޮޅުވެއްޖެއެވެ.

ޕީއެސްޖީގެ ދަނޑުގައި ކުޅުނު މި މެޗުން އެ ޓީމު މޮޅުވީ 6-1 ގެ ތަފާތު ބޮޑު ނަތީޖާއަކުންނެވެ.

މި މެޗުގައި ޕީއެސްޖީން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗުގެ ހަތްވަނަ މިނެޓުގައި މި ލަނޑު ޕީއެސްޖީއަށް ކާމިޔާބުކޮށްދިނީ އަލެސަންދްރޯ ފްލޮރެންޒީއެވެ. އަދި ފުރަތަމަ ހާފު ނިމުމުގެ ކުރިން ޕީއެސްޖީގެ ތަރި ނޭމާ ވަނީ އެ ޓީމަށް ލީޑު ފުޅާކޮށްދީފައެވެ.

ދެވަނަ ހާފުގައިވެސް ޕީއެސްޖީން ގިނަ ހަމަލާތަކެއް އުފެއްދިއިރު، މި ހާފު ފަށައިގެން ދެވަނަ މިނެޓުގައި ނޭމާ ވަނީ އެ ޓީމުގެ ތިންވަނަ ލަނޑު ޖަހާފައެވެ. އެކަމަކު އޭގެ ފަަސް މިނެޓު ފަހުން އެންޖާސްއިން ވަނީ ލަނޑެއް ޖަހާ ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އިސްމާއިލް ޓްރައޯރޭއެވެ.

އެންޖާސްއިން ލަނޑެއް ޖަހާ ފަރަގު ކުޑަކުރި ނަމަވެސް، އޭގެ ހަތަރު މިނެޓު ފަހުން ޕީއެސްޖީން ވަނީ އިތުރު ލަނޑެއް ޖަހާފައެވެ. މި ލަނޑު އެ ޓީމަށް ކާމިޔާބުކޮށްދިނީ ހޫލިއަން ޑްރެކްސްލާއެވެ. އަދި މެޗުގެ 71 ވަނަ މިނެޓުގައި އިދްރީސާ ގަނާ ގޭ ޕީއެސްޖީގެ ފަސްވަނަ ލަނޑު ޖެހިއިރު، މެޗުގައި އެ ޓީމުން ކާމިޔާބުކުރި ހަވަނަ ލަނޑު މެޗު ނިމެން ހަ މިނެޓަށް ވެފައިވަނިކޮށް ޖަހައިދިނީ ޒުވާން ފޯވާޑް ކީލިއަން އެމްބާޕޭއެވެ.

އެންޖާސް އަތުން ފަސޭހަކަމާއެކު ޕީއެސްޖީ މޮޅުވިއިރު، އެ ޓީމު މިހާރު ވަނީ ލީގު ތާވަލުގެ ދެވަނައަށް ޖެހިލާފައެވެ. އެގޮތުން ޕީއެސްޖީ ދެވަނައިގައި އޮތީ ކުޅުނު ހަ މެޗުން ލިބުނު 12 ޕޮއިންޓާއެކުއެވެ. ޕީއެސްޖީ އަތުން ބަލިވި އެންޖާސް އޮތީ ތާވަލުގެ އަށްވަނައިގައި ހަ މެޗުން ނުވަ ޕޮއިންޓު ހޯދައިގެންނެވެ.