އިތުރު ވަގުތުގައި ހަވީ މާޓިނޭޒް ކާމިޔާބުކުރި ލަނޑާއެކު ޔޫރޮޕާ ލީގުގެ ޗެމްޕިއަން ސެވިއްޔާ ބަލިކޮށް ޗެމްޕިއަންސް ލީގުގެ ޗެމްޕިއަންކަން ހޯދި ބަޔާން މިއުނިކުން ޔުއެފާ ސުޕަ ކަޕް ކާމިޔާބުކޮށްފިއެވެ.

ޔޫރަޕުގެ ސީޒަން ހުޅުވާ މެޗު ބަޔާނުން ކާމިޔާބުކުރީ 2-1 ގެ ނަތީޖާއަކުންނެވެ. ހަންގޭރީގެ ވެރިރަށް ބުޑަޕެސްޓްގެ ޕުސްކަސް އެރީނާގައި ބުރާސްފަތި ދުވަހުގެރޭ ކުޅުނު މި މެޗު ބަލަން 30 އިންސައްތަ ސަޕޯޓަރުން ވައްދަން ޔުއެފާއިން ނިންމުމާއެކު، މެޗު ބަލަން 15،180 ސަޕޯޓަރުން ވަނީ ދަނޑަށް ވަދެފައެވެ. މިއީ ކޮވިޑް-19 ގެ ބްރޭކަށްފަހު ޔުއެފާގެ މެޗަކަށް ސަޕޯޓަރުން ދަނޑަށް ވެއްދި ފުރަތަމަ ފަހަރެވެ.

މި މެޗުގައި ބަޔާނުން ގިނަ ހަމަލާތަކެއް އުފެއްދި ނަމަވެސް، ސެވިއްޔާއިން ވަނީ މޮޅު ކުޅުމެއް ދައްކާ ބަޔާން ހިފަހައްޓާފައެވެ. އެގޮތުން މެޗުގައި ފުރަތަމަ ލަނޑު ޖަހާ ލީޑު ނެގީވެސް ސެވިއްޔާއިންނެވެ. މެޗުގެ 13 ވަނަ މިނެޓުގައި ލިބުނު ޕެނަލްޓީއަކުން މި ލަނޑު ސެވިއްޔާއަށް ކާމިޔާބުކޮށްދިނީ ލޫކަސް އޮކަމްޕޯސްއެވެ. މިއީ އޭރިއާ ތެރެއިން ސެވިއްޔާގެ މިޑްފީލްޑަރު އިވާން ރަކިޓިޗަށް ބަޔާނުގެ ޑިފެންޑަރު ޑޭވިޑް އަލަބާ ކުރި ފައުލަކަށް ރެފުރީ ދިން ޕެނަލްޓީއެކެވެ.

އޭގެ ފަހުން މި މެޗުގައި ބަޔާނުން ގިނަ ހަމަލާތަކެއް އުފެއްދިއިރު، ފުރަތަމަ ހާފު ނިމުމުގެ ކުރިން އެޓީމުން ވަނީ ނަތީޖާ އެއްވަރުކޮށްފައެވެ. ފޯވާޑް ރޮބަޓް ލެވަންޑޯސްކީގެ އެހީއާއެކު މެޗުގެ 34 ވަނަ މިނެޓުގައި މި ލަނޑު ބަޔާނަށް ކާމިޔާބުކޮށްދިނީ މިޑްފީލްޑަރު ލެއޯން ގޮރެޓްޒްކާއެވެ.

ދެވަނަ ހާފުގައިވެސް ބަޔާނުން ރަނގަޅު ކުޅުމެއް ދެއްކިއިރު، މި ހާފު ފަށައިގެން ހަވަނަ މިނެޓުގައި ލެވަންޑޯސްކީ ވަނީ ލަނޑެއް ޖަހާފައެވެ. އެކަމަކު ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ރެފުރީ ވަނީ ލެވަންޑޯސްކީ އޮފްސައިޑުގައި ހުރުމުން އެ ލަނޑު ބާތިލުކޮށްފައެވެ. މެޗުގެ ދެވަނަ ހާފު ނިމެން ދަނިކޮށް ލީޑު ނަގަން އެންމެ ހުސް ފުރުސަތެއް ލިބުނީ ސެވިއްޔާގެ ޔޫސުފް ނަސީރަށެވެ. އެކަމަކު ހުހަށް ހުރެ އޭނާ ފޮނުވާލި ހަމަލާ ބަޔާނުގެ ގޯލްކީޕަރު މެނުއެލް ނޯޔާ ވަނީ ދިފާއުކޮށްފައެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވެފައި އޮތުމުން ނަތީޖާ ނެރުމަށް ކުޅުނު އިތުރު ވަގުތުގެ ފުރަތަމަ ހާފުގައި ބަޔާނުން ވަނީ ލީޑު ނަގާފައެވެ. މި ހާފު ނިމެން މިނެޓަކަށް ވެފައިވަނިކޮށް ބަޔާނަށް ލީޑު ނަގައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ހަވީ މާޓިނޭޒެވެ.

ސެވިއްޔާ ބަލިކޮށް ބަޔާނުން ސުޕަ ކަޕްގެ ތަށި އުފުލާލިއިރު، އެ ޓީމުން ވަނީ މިދިޔަ ސީޒަނުގެ ތިން ތަށި ކާމިޔާބުކޮށްފައެވެ. ޗެމްޕިއަންސް ލީގުގެ އިތުރުން ބަޔާނުން ވަނީ މިދިޔަ ސީޒަނުގެ ޖަރުމަން ލީގާއި ޖަރުމަން ކަޕްވެސް ކާމިޔާބުކޮށްފައެވެ. އަދި ސުޕަ ކަޕަކީ ބަޔާނުގެ ކޯޗުގެ މަގާމާ މިދިޔަ އަހަރުގެ ޑިސެމްބަރު މަހު ހަވާލުވި ހަންސީ ފްލިކުގެ ހަތަރުވަނަ ކާމިޔާބީއެވެ.

ފްލިކް ހަވާލުވި ފަހުން މިހާތަނަށް ބަޔާން ބަލިވެފައިވަނީ އެންމެ ތިން މެޗުންނެވެ. މެޗަކުން ބަލިނުވެ ބަޔާނުން މިހާތަނަށް 32 މެޗު ހަމަކޮށްފައިވާއިރު، އެ ޓީމު އެންމެ ފަހުން މެޗަކުން ބަލިވެފައިވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ.