ބަކާ ޔުނައިޓެޑް ވިކްޓަރީއަށް

ކުލަބު ގްރީން ސްޓްރީޓްސްއަށް ކުޅެމުން އައި ގައުމީ ފުޓްބޯޅަ ޓީމުގެ މިޑްފީލްޑަރު މުޙައްމަދު އާރިފް (ބަކާ) ޔުނައިޓެޑް ވިކްޓަރީ (ޔޫވީ) އަށް ސޮއިކޮށްފިއެވެ.

ޔޫވީން ބަކާގެ ސޮއި ހޯދިއިރު، ދާދި ފަހުން އޭނާ ވަނީ އޭއެފްސީ ކަޕަށް މާޒިޔާ ސްޕޯޓްސް އެންޑް ރެކްރިއޭޝަނުން ތައްޔާރުވިއިރު، އެ ޓީމާއެކު ފަރިތަކޮށްފައެވެ. އޭއެފްސީ ކަޕަށް މާޒިޔާއާ ގުޅެން ބަކާ ނިންމި ނަމަވެސް، މިއަހަރުގެ އޭއެފްސީ ކަޕް ފަހުން ވަނީ ކެންސަލް ކޮށްފައެވެ. އެހެންކަމުން އަންނަ ސީޒަނަށް ބަކާ ވަނީ ޔޫވީއަށް ސޮއިކޮށްފައެވެ.

ގައުމީ ފުޓްބޯޅަ ޓީމަށް އަދިވެސް ކުޅެމުން އަންނަ އުމުރުން 35 އަހަރުގެ ބަކާ އަކީ ރާއްޖޭގައި އުފެދުނު އެންމެ މޮޅު މިޑްފީލްޑަރުންގެ ތެރޭގައި ހިމެނޭ އެކަކެވެ. އައިލެންޑް އެފްސީން 2004 ވަނަ އަހަރު ވިދާލި ބަކާ ވަނީ ކުލަބު ވެލެންސިއާ، ވީބީ އައްޑޫ އެފްސީ، ނިއުރޭޑިއަންޓް ސްޕޯޓްސް ކުލަބު، ވިކްޓަރީ ސްޕޯޓްސް ކުލަބު، މާޒިޔާ ސްޕޯޓްސް އެންޑް ރެކްރިއޭޝަން، ކުލަބު އީގަލްސް އަދި ގްރީން ސްޓްރީޓްސްއަށް ކުޅެފައެވެ. މީގެ އިތުރުން ބަކާ ވަނީ މިޔަންމާ ލީގުގައި ވާދަކުރި ކޭބީޒެޑަށްވެސް އެއް އަހަރު ކުޅެފައެވެ.

ބަކާގެ އެންމެ ފާހަގަކޮށްލެވޭ އެއް ކާމިޔާބީއަކީ ސާފް ޗެމްޕިއަންޝިޕް ދެ ފަހަރު ކާމިޔާބުކުރުމެވެ. އެގޮތުން ރާއްޖެއިން ސާފް ޗެމްޕިއަންޝިޕް 2008 އާއި 2018 ގައި ކާމިޔާބުކުރިއިރު އެ ދެ ފަހަރުވެސް ބަކާ ވަނީ ގައުމީ ފުޓްބޯޅަ ޓީމުގައި ހިމެނިފައެވެ.

ޔޫވީން އަންނަ ސީޒަނަށް ބަކާގެ ސޮއި ހޯދިއިރު، މިހާތަނަށް އެޓީމުން ވަނީ އީގަލްސްގެ އިސްމާއިލް ފަރުހާދު (ފަރޭ) އާއި އަޙްމަދު ނިޒާމް (ކުޑަ ނިޒާމްބެ) ގެ ސޮއި ހޯދާފައެވެ.

އައު ސީޒަނުގެ ދިވެހި ޕްރިމިއާ ލީގަށް ޔޫވީން ތައްޔާރުވަމުން އައި ނަމަވެސް، އައު ސީޒަން ފަށާނެ ތާރިޚެއް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަނޑައަޅާފައެއް ނުވެއެވެ. އެކަމަކު މިއަހަރުގެ ޑިސެމްބަރު މަހު ފުޓްބޯޅަ ސީޒަން އަލުން ފަށަން އެފްއޭއެމުން މަސައްކަތް ކުރި ނަމަވެސް، ދާދި ފަހުން އެފްއޭއެމުގެ ރައީސް ބައްސާމް އަދީލް ޖަލީލް ވަނީ ފުޓްބޯޅަ ސީޒަން ފެށުން ޑިސެމްބަރު މަހަށްވުރެ ލަސްވުން އެކަށީގެންވާ ކަމަށް ވިދާޅުވެފައެވެ.