އިންޑިއާގެ ކެެރެލާ ސްޓޭޓްގައި ކޮވިޑް-19ގެ ކޭސްތަކުގެ ސާޖެއް އައިސްފައިވާއިރު، ބަލި ޖެހިގެން މަރުވާ މީހުން އިތުރުވެދާނެ ކަމުގެ އިންޒާރު އެ ސްޓޭޓްގެ ހެލްތް މިނިސްޓަރު ކޭކޭ ޝައިލަޖަ ދެއްވައިފިއެވެ.

ބުރާސްފަތި ދުވަހު އެކަނިވެސް ކެރެލާ ސްޓޭޓުން 3349 މީހަކު ވަނީ ބައްޔަށް ޕޮޒިޓިްވްވެފައެވެ. އެއާއި އެކު ޕޮޒިޓިވް ކޭސްތަކުގެ އަދަދު ވަނީ 26،229 އަށް ޖެހިލާފައެވެ. އަދި 1657 މީހަކު ވަނީ ބަލިން ފަސޭހަވެފައެެވެ. ކެރެލާ އިން މިހާތަނަށް ކޮވިޑުގެ ބަލީގައި 396 މީހަކު ވަނީ މަރުވެފައެވެ.

ބުރާސްފަތި ދުވަހު އޮންލައިންކޮށް ބޭއްވި ރަސްމިއްޔާތެއްގައި ވާހަކަ ދައްކަވަމުން ކެރެލާގެ ހެލްތް މިނިސްޓަރު ވިދާޅުވީ، ކެރެލާ މިސްރާބު ޖަހާފައިވަނީ ކޮވިޑުގެ އެންމެ ގޯސް ހާލަތާ ދިމާލަށް ކަމަށެވެ. އެހެންކަމުން ބަލީގައި މަރުވާ މީހުންގެ އަދަދު މައްޗަށް ގޮސްދާނެ ކަމުގެ އިންޒާރު އޭނާ ދެއްވިއެެވެ. ބަލިޖެހޭ މީހުންގެ ނިސްބަށް އިތުރުވަމުންދާ ވަރަކަށް ވެންޓިލޭޓަރުތަކުގެ ދަތިކަން ކުރިމަތިވެދާނެ ކަމަށް މިނިސްޓަރު ވިދާޅުވިއެވެ. ތޮއްޖެހިގެން ތަންތަނުގައި ދިރިއުޅޭ މީހުން ބޮޑަށް ސަމާލުވުމަށް އޭނާ ވަނީ އިލްތިމާސް ކުރައްވާފައެވެ.

ހިންދޫން ފާހަގަކުރާ ''އޮނަމް'' އަށް ފަހު ކެރެލާއިން ދުވާލެއްގެ މައްޗަށް ރިޕޯޓް ކުރެވޭ ކޮވިޑުގެ ކޭސްތަކުގެ އަދަދު 10،000 ގައި އުޅޭނެ ކަމަށް ތަޖުރިބާކާރުން ވަނީ ލަފާކޮށްފައެވެ. ކޮވިޑުގެ ބަލި މީހުންނަށް ފަރުވާދޭ މަރުކަޒުތަކުގައި 50،000 އަށް ވުރެ ގިނަ އެނދުތައް ވަނީ ބަހައްޓާފައެވެ. އަދި 1000 އެނދުގެ އައިސީޔޫ ފެސިލިޓީ އެއް ވަނީ ގާއިމްކޮށްފައެވެ.