ގްރީޒްމަނަށް ޕްރިމިއާ ލީގުގެ ތިން ކުލަބަކުން ފާރަލަނީ

ބާސެލޯނާއަށް ކުޅެމުން އަންނަ ފްރާންސް ފޯވާޑް އެންޓޮއިން ގްރީޒްމަން ހޯދުމަށް އިނގިރޭސި ޕްރިމިއާ ލީގުގެ ތިން ކުލަބަލުން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

ގްރީޒްމަން ބާސާއަށް ބަދަލުވީ މިދިޔަ އަހަރުގެ ހޫނު މޫސުމުގައި ކުރީގެ ކުލަބު އެތުލެޓިކޯ މެޑްރިޑާއެކު ހަދާފައިވާ އެއްބަސްވުން އުވާލަން ދައްކަންޖެހޭ 120 މިލިއަން ޔޫރޯ ބާސާއިން ދެއްކުމުންނެވެ. އޭނާ ބާސާއާއެކު ފަސް އަހަރުގެ މުއްދަތަކަށް ސޮއިކުރިއިރު، އެ އެއްބަސްވުން ހަމަވާނީ 2024 ގައެވެ.

އެކަމަކު ބާސާއަށް ބަދަލުވުމަށްފަހު އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން މިހާތަނަށް ބާސާއަށް ކުޅެދިން 48 މެޗުގައި އޭނާއަށް ކާމިޔާބުކުރެވިފައިވަނީ 15 ލަނޑެވެ.

މީގެ ކުރިން މި ޓްރާންސްފާ ބާޒާރުގައި ބާސާއިން ގްރީޒްމަން ވިއްކާލަން މަސައްކަތް ކުރި ނަމަވެސް، ރިޕޯޓުތައް ބުނާ ގޮތުން ބާސާގެ އައު ކޯޗުގެ މަގާމާ ރޮނާލްޑް ކޫމަން ހަވާލުވުމަށްފަހު ވަނީ އެ ޓީމުގެ ކެޕްޓަން ލިއޮނެލް މެސީ ކުޅެމުން އައި ތަނަށް ގްރީޒްމަން ކުޅުވާނެ ކަމަށް ބުނެފައެވެ. އެކަމަކު މެސީ އަންނަ ސީޒަނުގައިވެސް ބާސާގައި މަޑުކުރަން ނިންމުމާއެކު، ބާސާއިން އަނެއްކާވެސް ގްރީޒްމަން ވިއްކާލަން މަސައްކަތް ފަށާފައިވާ ކަމަށް ރިޕޯޓުތައް ބުނެއެވެ.

އިނގިރޭސި މީޑިއާތަކުން ރިޕޯޓުކޮށްފައިވާ ގޮތުގައި އުމުރުން 29 އަހަރުގެ ގްރީޒްމަން ހޯދުމަށް ޕްރިމިއާ ލީގުގެ ތިން ކުލަބަކުން އަންނަނީ މަސައްކަތް ކުރަމުންނެވެ. އެއީ މެންޗެސްޓާ ޔުނައިޓެޑާއި ލިވަޕޫލްގެ އިތުރުން އާސެނަލް ކަމަށްވެސް ރިޕޯޓުތައް ބުނެއެވެ. މީގެ ތެރެއިން ޔުނައިޓެޑުން މީގެ ކުރިންވެސް ވަނީ ގްރީޒްމަން ގަތުމަށް މަސައްކަތް ކޮށްފައެވެ.

ރިޕޯޓުތައް ބުނާ ގޮތުން މި ޓްރާންސްފާގައި ބާސާއިން ގްރީޒްމަން ވިއްކާލަން މަސައްކަތް ކުރަނީ 100 މިލިއަން ޔޫރޯއަށެވެ.

ގްރީޒްމަން ބާސާއަށް ބަދަލުވި ސީޒަނުގައި، ބާސާއިން ހުސްއަތާ ސީޒަން ނިންމާލި ނަމަވެސް، މީގެ ކުރިން އެތުލެޓިކޯއާއެކު ގްރީޒްމަން ވަނީ ގިނަ ކާމިޔާބީތަކެއް ހޯދާފައެވެ. އެގޮތުން ގްރީޒްމަން ވަނީ އެތުލެޓިކޯއާއެކު ޔުއެފާ ޔޫރޮޕާ ލީގާއި، ސްޕެނިޝް ސުޕަ ކަޕް އަދި ޔުއެފާ ސުޕަ ކަޕް ކާމިޔާބުކޮށްފައެވެ. އަދި ގްރީޒްމަން ވަނީ ފްރާންސްގެ ގައުމީ ޓީމާއެކު 2018 ވަނަ އަހަރުގެ ފީފާ ވޯލްޑް ކަޕްވެސް ކާމިޔާބުކޮށްފައެވެ.