ކޮވިޑުގެ މި ހާލަތުގައި ވެސް ރިޝްގެ އުންމީދަކަށް ބަދަލެއް ނާދޭ!

ރާއްޖެއަށް ދިމާވެފައިވާ ކޮވިޑް-19ގެ ނުރައްކަލާއި ގުޅިގެން ވިޔަފާރިތަކަށް މި ވަނީ ނުރަނގަޅު އަސަރުތަކެއް ކޮށްފައެވެ. ވަޒީފާތައް ގެއްލި އާމްދަނީ ލިބެންހުރި ގޮތްތައް ބަންދުވެފައިވާ މި ދަނޑިވަޅުގައި، ހިތްވަރާއިއެކު މަސައްކަތުގައި ކުރިޔަށްދިޔަ އެއް ފަރާތަކީ، ކުޅަދާނަ މޭކް-އަޕް އާރޓިސްޓެއް ކަމަށްވާ އައިމިނަތު ރިޝްމާއެވެ.

ރ. އަލިފުއްޓަށް އުފަން އައިމިނަތު ރިޝްމާ (ރިޝް) އަކީ، ވަރަށް ޅަ އުމުރުގައި ވެސް މޭކް-އަޕް ކުރުމަށް ޝައުޤުވެރިކަން ހުންނަ ކުއްޖެކެވެ. ކާމިޔާބު މޭކް-އަޕް އާރޓިސްޓަކަށްވުމަކީ، އަބަދުވެސް ދެކެމުން އައި ހުވަފެނެއްކަމުގައި ރިޝް ބުންޏެވެ. ނަމަވެސް، އެއްވެސް ކުރިމަގެއް އަދި ފައިދާއެއް ނެތް ދާއިރާއެއް ކަމަށްބުނެ ޢާއިލާއިން ދެކޮޅު ހެދިކަމުގައި ވީނަމަވެސް، ރިޝް މި ދާއިރާ އިން ކުރިޔަށް ދިއުމަށް ޚިޔާރުކުރީ، ދާއިރާއަށް އޮތް ޝައުޤުވެރިކަމާއި، އަމިއްލަ ނަފްސަށް އޮތް އިތުބާރެއްގެ ބޮޑުކަމުންނެވެ.

ކުޑައިރުއްސުރެ ދެކެމުންއައި ހުވަފެންތަކުގައި ޙަޤީޤީ ކުލަ ޖެހެން ފެށީ އުމުރުން 16 އަހަރުގައި، "ލޭ ކޮކާ" ސެލޫންއަށް މޭކް-އަޕް އާރޓިސްޓުން ތަމްރީނު ކޮށްދިން ކޯހެއްގައި ބައިވެރިވި ހިސާބުންނެވެ. އެއަށްފަހު ސީޒާ، ސްޓައިލޯ އަދި ރޮކް ޕޭޕަރ ސިޒަރ ފަދަ މަޝްހޫރު ސެލޫންތަކުގައި މަސައްކަތްކޮށްފައިވާ، ރިޝް ބުނި ގޮތުގައި ދިމާވި އެންމެ ބޮޑު ގޮންޖެހުމަކީ، ލޮކްޑައުންވުމާއި ގުޅިގެން މަސައްކަތަށް ނުދެވި ގޭގައި ހުންނަން ޖެހުމެވެ.

ނަމަވެސް އުއްމީދު ކަނޑާނުލައި، ގޭގެއަށް ގޮސް މޭކް-އަޕް ކޮށްދިނުމަށްޓަކައި، ފޭސްބުކް ޕޭޖެއް މެދުވެރިކޮށް "ބިއުޓީ އެޓް ޔޯރ ޑޯރ ސްޓެޕްސް" ގެ ނަމުގައި، ރިޝްމާ މި ވަނީ އަމިއްލަ ވިޔަފާރިއެއް ފަށައިފައެވެ. އަމިއްލަ ވިޔަފާރިއެއް ފެށުމަށް ނިންމީ، ލޮކް-ޑައުން ވުމާއި ގުޅިގެން ގިނަ މީހުންނަށް ސެލޫނަށް ދިޔުމަށް ދަތިވުމުގެ އިތުރުން، ތަފާތު ކަމެއް ކުރުމުގެ ބޭނުމުގައެވެ. މި އަހަރުގެ ޖުލައި މަހުން ފެށިގެން ވިޔަފާރި ކުރިޔަށް ގެންދަން ފަށާފައިވާއިރު، އާންމުންގެ ވަރަށް ބޮޑު ތަރުޙީބެއް ލިބެމުންދާކަން ރިޝް ފާހަގަކުރެއެވެ. މި ދުވަސްކޮޅުގެ ގޮތުން ޚިދުމަތް ދެނީ ހަމައެކަނި މާލެ، ހުޅުމާލެ އަދި ވިލިމާލެއަށް ކަމަށްވިޔަސް، ކޮވިޑް-19ގެ ނުރައްކާތެރިކަން ނިމުމާއެކު، އަތޮޅުތެރޭގެ ރަށް ރަށަށް ގޮސްގެން ވެސް ޚިދުމަތް ފުޅާކުރާނެ ކަމަށް ރިޝް ބުންޏެވެ. ބްރައިޑަލް މޭކް-އަޕް އާއި ހެއަރ- ސްޓައިލިންގެ އެންޑް ކަލަރިންގެ މަސައްކަތްތަކަށް ބޮޑަށް ޝައުޤުވެރިކަން ހުރި ނަމަވެސް، އޮކްޓޯބަރ މަހުން ފެށިގެން، އުމުރުން ދުވަސް މީހުންނަށް ފޭޝިއަލްސް، ޕެޑިކިއޮރ ފަދަ ޚިދުމަތްތައް، ބިއުޓީ ޕެކޭޖަށް އިތުރު ކުރުމަށް ނިންމާފައިވާ ކަމަށް ރިޝް ބުންޏެވެ.

މި ދާއިރާގައި 7 އަހަރު ދުވަހުގެ ތަޖުރިބާ ލިބިފައިވާ ރިޝް ބުނި ގޮތުގައި، ޢާއިލާ އާއި ދެކޮޅަށް މި މަސައްކަތް ފެށި ނަމަވެސް، މިހާރު މި ދާއިރާއިން ކުރިއަށް ދިޔުމަށް ލިބޭ އެންމެ ބޮޑު ހިތްވަރަކީ، ލޯބިވާ ޢާއިލާއެވެ. އޭގެ އިތުރުން ރައްޓެހިންނާއި، ކަސްޓަމަރުންގެ ފަރާތުން ލިބޭ ފީޑްބެކް ތަކަކީ ކުރިޔަށް ދިޔުމަށް ލިބޭ ބޮޑު ހިތްވަރެއް ކަމުގައި ރިޝް ބުންޏެވެ.

ހިތްވަރާއި، ޝައުޤުވެރިކަމާއެކު މަސައްކަތް ކޮށްފިނަމަ، މޭކް-އަޕް ކުރުމުގެ ދާއިރާއަކީ ވެސް ކުރިމަގެއް އޮތް، އެކަށީގެންވާ އާމްދަނީއެއް ލިބޭނެ ދާއިރާއެއްކަން ރިޝް މި ވަނީ ސާބިތު ކޮށްދީފައެވެ. އެހެންކަމުން މި ދާއިރާއިން ކުރިއަށް ދިއުމަށް ބޭނުންވާ ކުދިންނަށް ވެސް ރިޝް ދޭން ބޭނުންވާ މެސެޖަކީ، ގޮންޖެހުންތައް ކުރިމަތިވި ނަމަވެސް ކުރާ ހިތުން ކުރާނަމަ ކޮންމެ ކަމެއް ވެސް ވާނެ ކަމަށާއި އެކަމަށް ބީރުކަންފަތެއް ދީ ކުރިއަށް ދާން ބޭނުންވާ ދާއިރާއިން ކުރިއަށް ދިޔުމަށް ރިޝް ވަނީ އެދިފައެވެ.