ކޮވިޑް-19 އާއި ދެކޮޅަށް މަސައްކަތް ކުރުމަށް ގެންނަން މަސައްކަތް ކުރި ވެންޓިލޭޓަރުގެ ތެރެއިން ދުބާއީގެ އެގްޒެކިއުޓަރސް ޖެނެރަލް ޓްރޭޑިންއާއި ހަވާލުކުރި ވެންޓިލޭޓަރު ނުލިބިއްޖެ ނަމަ، އެ ފައިސާ ހޯދަން އާބިޓްރޭޝަނަށް ހުށަހަޅުއްވާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

ރާއްޖެ ޓީވީގެ ފަލަސުރުހީގައި ވާހަކަދައްވަމުން މިނިސްޓަރ އަމީރު ވިދާޅުވީ ވެންޓިލޭޓަރު ނުލިބިއްޖެ ނަމަ އެކަމަށް ހަރަދު ކުރި ފައިސާ ހޯދުމުގެ މަސައްކަތް ކުރައްވާނެ ކަމަށެވެ. މިނިސްޓަރ ވިދާޅުވީ ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވެސް އެކަމާއި ގުޅޭގޮތުން މަޝްވަރާ ކޮށްފައިވާނެ ކަމަށާއި، އެގޮތުން ވެންޓިލޭޓަރުގެ މައްސަލައިގައި އާބިޓްރޭޝަނަށް ދާން ޖެހިއްޖެ ނަމަވެސް އެކަން ކުރައްވާނެ ކަމަށެވެ.

އެގޮތުން މި މައްސަލައިގައި އެޓާނީ ޖެނެރަލް އާއި ވާހަކަ ދައްކާ ފައިސާ ހޯދޭނެ ގޮތަކާއި މަޝްވަރާ ކުރައްވާނެ ކަމަށާއި، އެގްޒެކިއުޓަރސް ނިސްބަތްވާ ގައުމު ކަމަށްވާ ޔޫއޭއީއާ ވެސް ވާހަކަ ދައްކާ މައްސަލަ ހައްލު ކުރުމުގެ މަސައްކަތް ކުރައްވާނެ ކަމަށެވެ. މީގެ އިތުރުން ވެންޓިލޭޓަރުގެ މައްސަލައިގައި ހެލްތް މިނިސްޓްރީން އަދިވެސް މަސައްކަތް ކުރައްވަމުން ގެންދަނީ ވެންޓިލޭޓަރު ހޯދުމަށް ކަމަށެވެ.

މިނިސްޓަރު އަމީރު ވިދާޅުވީ މި މަސް ނިމުމުގެ ކުރިން ބައެއް ވެންޓިލޭޓަރު ގެނެވޭނެކަމުގެ މައުލޫމާތު ކުރިން ލިބިވަޑައިގެންފައިވާ ކަމަށާއި، އެކަންކަން ވެސް ބައްލަވަމުން ގެންދަވާ ކަމަށެވެ. ވެންޓިލޭޓަރު މައްސަލައިގައި އެންމެ ފަހު ކަމެއްގެ ގޮތުގައި ކަމާއި ބެހޭ ފަރާތްތަކާއި އެކު މަޝްވަރާ ކުރުމަށް ފަހު ވެންޓިލޭޓަރު ގަތުމަށް ހޭދަ ކުރި ފައިސާ އަނބުރާ ހޯދުމަށް މަސައްކަތް ފަށާނެ ކަމަށް ވެސް މިނިސްޓަރު އަމީރު ވިދާޅުވިއެވެ.

ދުބާއީގެ އެގްޒެކިއުޓަރސްއަށް 75 ވެންޓިލޭޓަރު ގެނައުމަށް ހަވާލުކޮށްފައިވަނީ 34 މިލިއަން ރުފިޔާ އަށެވެ. އަދި 30.6 މިލިއަން ރުފިޔާ އެ ކުންފުންޏަށް އެޑްވާންސް ފައިސާގެ ގޮތުގައި ދައްކާފައެވެ. މިހާތަނަށް ރާއްޖެއަށް 10 ވެންޓިލޭޓަރު ގެނައި ނަމަވެސް، މިންގަނޑަށް ނުފެތޭތީ ހެލްތް މިނިސްޓްރީން އެ ވެންޓިލޭޓަރުތައް ބަލައެއް ނުގަތެވެ.

އެގްޒެކިއުޓާރސް ޖެނެރަލް ޓްރޭޑިންއަކީ، ވެންޓިލޭޓަރު ގެންނަން ހަވާލުކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުންޏެވެ. އެމީހުން ރާއްޖެއަށް ވެންޓިލޭޓަރެއް ފޯރުކޮށްދޭނެ އަގެއް ކަމަށް ނބުނެފައިވަނީ، 32،500 ޑޮލަރަށެވެ. އެ ކުންފުންޏާ މަސައްކަތް ހަވާލުކުރީ 34 މިލިއަން ރުފިޔާ އަށް ކަމަށް ވާއިރު އަގުގެ 90 ޕަސެންޓަށްވާ 30.9 މިލިއަން ރުފިޔާ ސަރުކާރުން ވަނީ ދައްކައިފައެވެ.

މިދިޔަ އޭޕްރީލް މަހުގެ ދެވަނަ ދުވަހު، ވެންޓިލޭޓަރުތައް ގެނައުމުގެ އެގްރީމަންޓްގައި ސޮއިކޮށްފައިވާއިރު، އެޑްވާންސަށް 30.9 މިލިއަން ރުފިޔާވެސް ވަނީ ދައްކާފައެވެ. އެގްރީމަންޓްގައި 14 ދުވަހުގެ ތެރޭގައި ވެންޓިލޭޓަރުތައް ރާއްޖެ ގެނެވޭނެ ކަމަށް ބުނެފައިވާއިރު، މިހާތަނަށް އެ ވެންޓިލޭޓަރުތައް ލިބިފައެއް ނުވެއެވެ.