ކޮވިޑް-19 އާއިއެކު އަންހެނުންގެ ވަޒީފާތަކަށް ތަފާތު ބޮޑުކޮށް އަސަރުކުރި!

ކޮވިޑް-19 ގެ ސަބަބުން ވަޒީފާ އަދާކުރާ އާބާދީއަށް ކުރި އަސަރު އަންހެނުންގެ ވަޒީފާތަކަށް ކޮށްފައި ވަނީ ތަފާތުބޮޑުކޮށްކަމަށް އިކޮނޮމިކް މިނިސްޓްރީގެ ރިޕޯޓުން ދައްކައިފިއެވެ.

އިކޮނޮމިކް މިނިސްޓްރީ އާއި ޔޫއެންޑީޕީ ގުޅިގެން ކުރިއަށް ގެންދިޔަ ރެޕިޑް ލައިވްލިހޫޑް އެސެސްމެންޓް ރިޕޯޓްގައިވާ ގޮތުން އިކޮނިމިކް މިނިސްޓްރީގެ ޖޮބްސެންޓަރުގެ ތަފާސްހިސާބުތައް ދައްކާގޮތުން ފިރިހެނުންނަށް ވުރެ އަންހެނުންނަށް ލިބޭ އާމްދަނީ ދަށެވެ. މީގެ ސަބަބަކީ އަންހެނުންގެ މަސައްކަތުގެ ތަޖުރިބާ މަދުވެފައި އާމްދަނީ މަދުން ލިބޭ ވަޒީފާތަކުގައި އަންހެނުން ވަޒީފާ އަދާކުރާވަރު ގިނަވުމުންކަމަށް މިނިސްޓްރީގެ ރިޕޯޓްގައި ވަނީ ފާހަގަކޮށްފައެވެ. އަދި ރިޑަންޑެންސީ އާއި އާމްދަނީ ގެއްލުމުގެ މައްސަލަވެސް ފިރިހެނުންނަށް ވުރެ އަންހެނުންގެ ގިނަ ކަމަށްވެއެވެ.

Advertisement

ފިރިހެނުންގެ ތެރެއިން 47 އިންސައްތަ މީހުން ރިޑަންޑަންޓްވީއިރު، އަންހެނުންގެ ތެރެއިން 55 އިންސައްތަ މީހުން ރިޑަންޓްވެފައިވާ ކަމަށާއި ހާއްސަކޮށް ފަތުރުވެރިކަމުގެ ސިނާއަތުގައި މިތަފާތު އިތުރަށް ބޮޑުކަމަށް ރިޕޯޓްގައި ވަނީ ފާހަގަކޮށްފައެވެ. އެގޮތުން 65 އިންސައްތަ އަންހެނުންނަށް ރިޑަންޑެންސީއާއި ކުރިމަތިލާން ޖެހުނުއިރު، ފަތުރުވެރިކަމުގެ ސިނާއަތުން ފިރިހެނުންގެ ތެރެއިން ރިޑަންޑެންސީ އާއި ކުރިމަތިލާން ޖެހުނީ 54 އިންސައްތަ ފިރިހެނުންނަށެވެ.

މިނިސްޓްރީ އިން ވަނީ މި ތަފާސްހިސާބުތަކުން ދައްކައިދެނީ ޒުވާން ފިރިހެނުންނަށްވުރެ ޒުވާން އަންހެނުންނަށް ވަޒީފާގެ ޔަގީންކަން ނެތުމުގެ ނުރައްކާ ބޮޑުކަންކަމަށާއި މުސްތަގުބަލުގައި އަންހެނުންގެ އާމްދަނީގެ މިނިވަންކަމާއި މާލީ ރައްކާތެރިކަން ހޯދުމަށް ކޮންމެހެން ބޭނުންވާ މަސައްކަތުގެ ތަޖުރިބާއާއި ފަންނީ ކުރިއެރުމަށް އޮތް ވަގުތު ގެއްލުމުގެ ފުރުސަތު އޮތްކަން ކަމަށެވެ. އަދި ރިޑަންޑެންސީގެ ސަބަބުން ޒުވާން އަންހެނުން ވަޒީފާގެ ބާޒާރުން މުޅިން ނުކުތުމުގެ ފުރުސަތު އެބައޮތްކަމަށް ފާހަގަކޮށްފައެވެ.

މީގެ އިތުރުން ކޮވިޑް-19 ގެ ސަބަބުން ބޮޑަށް އަސަރު ކުރި ވަޒީފާތަކުގައި ތިބީ އަންހެނުން ކަމަށާއި ބަލިމަނޑުކަމުގެ ސަބަބުން ވަޒީފާއަށް އަސަރުކުރި އަންހެނުންގެ ތެރޭގައި ދެ އަހަރަށް ވުރެ ކުރު މުއްދަތަކަށް ވަޒީފާގައި އުޅުނު އަންހެނުންނާއި ދެ އަހަރަށް ވިރެ ދިގު މުއްދަތެއްގައި ވަޒީފާގައި އުޅުނު ޒުވާން އަންހެންކުދިން ހިމޭނޭ ކަމަށް ރިޕޯޓްގައިވެއެވެ. އެގޮތުން ތައުލީމީ ދާއިރާއިން އަސަރު ކުރި ކޮންމެ 10 މީހަކުން އަށް މީހަކީ އަންހެނުން ކަމަށާއި، ސިއްހީ ދާއިރާ، ގޭތެރޭގެ މަސައްކަތްތައް އަދި ފަންނީ ހިދުމަތުގެ ދާއިރާގައި މަސައްކަތްކުރާ މީހުންގެ ތެރެއިން ވެސް ގިނައިން އަސަރުކޮށްފައި ވަނީ އަންހެނުންނަށެވެ. އެހެންނަމަވެސް ދަނޑުވެރިކާމާއި މަސްވެރިކަން އަދި ފަތުރުވެރިކަމާއި ކާބޯތަކޭތީގެ ހިދުމަތްދޭ ދާއިރާއިން ބޮޑަށް އަސަރުކޮށްފައި ވަނީ ފިރިހެނުންނަށެވެ.

ރިޕޯޓްގައި ވަނީ ކޮވިޑް-19 ގެ ސަބަބުން އަސަރުކުރި މީހުންގެ ތެރެއިން ހުރިހާ ދާއިރާއެއް ގައިވެސް އަންހެނުންނަށްވުރެ ފިރިހެނުންނަށް އަސަރުކޮށްފައިވާ ވަރު ނިސްބަތުން ބޮޑުކަމަށް ފާހަގަކޮށްފައެވެ. އަދި ޖިންސީ ނިސްބަތުން މި ތަފާތު އެންމެ ކުޑައީ އޮފީސް މަސައްކަތްތަކާއި ސަޕޯޓްމަސައްކަތްކުގައި ކަމަށާއި ޖިންސީ ނިސްބަތުން މި އެކުލަވާލުންތަކަކީ ހުރިހާ މަސައްކަތްތަކާއި ދާއިރާތަކުގައި ޖިންސުގެ ނިސްބަތުން ތަފާތުތައް ހުރި މިންވަރު އަންގައިދޭ ކަމެއް ކަމަށް މިނިސްޓްރީއިން ފާހަގަކުރެއެވެ.