ވިޔަފާރި ބަނގުރޫޓުވަނީ، މައްސަލަ ހައްލުނުވާ ނަމަ ސިލްސިލާ މުޒާހަރާތައް ކުރާނަން: ވިޔަފާރިވެރިން
23 އޯގަސްޓު 2020 | އާދީއްތަ 09:51ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާގެ އިސްތިއުފާއަށް ގޮވާލާފައިވޭ
އާދިއްތަ ދުވަހު ކުރިއަށް ދިޔަ މުޒަހާރާގެ ތެރެއިން
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ކޮވިޑް-19 ފެތުރުން ކޮންޓްރޯލްކުރުމަށްޓަކައި އަޅަމުންދާ ފިޔަވަޅުތަކާ ގުޅިގެން ވިޔަފާރީތައް ބަގުރޫޓްވާ ކަމަށް ބުނެ، ބައެއް ވިޔަފާރިވެރިން މުޒާހަރާކޮށްފިއެވެ.
އާދިއްތަ ދުވަހު އެޗްއީއޯސީގެ މަސައްކަތްތައް ހިންގަމުންދާ ދަރުބާރުގޭ ކުރިމަތީގައި ފެށި މުޒާހަރާގައި ކުދި އަދި މެދު ފަންތީގެ ވިޔަފާރި ހިންގާ ފަރާތްތަކާއި، ރެސްޓޯރެންޓް, ކެފޭ އަދި ހޮޓާ ހިންގާ ބައެއް މީހުން ވަނީ އަޑުއުފުލާފައެވެ. ކޮވިޑް-19އާ ގުޅިގެން ފޫނުބެއްދޭވަރުގެ ބޮޑެތި ގެއްލުންތައް ލިބިފައިވާއިރު، ވިޔަފާރި ނުހިންގި ގިނަ އަދަދެއްގެ ކާބޯތަކެތި އުކާލަން ޖެހިފައިވާ ކަމަށް އެމީހުން ބުނެއެވެ. މިހާލަތުގައި އެޗްޕީއޭއިން އަޅަމުންދާ ފިޔަވަޅުތަކުގެ ސަބަބުންވެސް ވިޔަފާރި ބަންދުކުރަން ޖެހިދާނެކަމަށް ވަނީ ބުނެފައެވެ.
ސަރުކާރުގެ ބައެއް ފަރާތްތަކުގެ އިސްތިއުފާއަށް ގޮވާލާ މުޒާހަރާގެ ބައިވެރިން ބުނެފައިވަނީ ކޮވިޑް-19 ކޮންޓްރޯލްކުރުމަށް ހެލްތް މިނިސްޓްރީ، އެޗްޕީއޭ އަދި ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)އަށް ވެސް ހަރުދަނާ ފިޔަވަޅެއް ނާޅާ ކަމަށެވެ. އަދި އެފިޔަވަޅުތަކުގެ ސަބަބުން ރައްޔިތުން ނިކަމެތިވަމުންދާ ކަމަށް ވަނީ ބުނެފައެވެ.
މީގެއިތުރުން މުޒާހަރާގެ ބައިވެރިން ބުނީ ކޮވިޑް-19 ކޮންޓްރޯލް ކުރުމަށް ހެލްތް މިނިސްޓްރީ އޮވެ ކުރަމުންދާ މަސައްކަތުގެ ތެރެއިން ކޮރަޕްޝަނަށް މަގުފަހިވާ ގޮތަށް ގިނަ ކަންތައްތަކެއް ކުރަމުންދާ ކަމަށާއި، މިހާރު ތިލަވެފައިވާ ބައެއް މައްސަލަތަކުން ވެސް އެކަން ހާމަވެގެންދާ ކަމަށެވެ. އަދި އެޗްޕީއޭ ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރުގެ ކުފޫ ހަމަނުވާ ކަމަށް ބުނެ އިސްތިއުފާއަށް ވެސް މުޒާހަރާގެ ބައިވެރިން ވަނީ ގޮވާލާފައެވެ.
ސަރުކާރުން މިމައްސަލަތަކަށް ހައްލު ހޯދައިނުދީފި ކަމުގައިވާނަމަ ސިލްސިލާ ގޮތެއްގައި މުޒަހާރާތައް މާލެސިޓީގައި ކުރިއަށް ގެންދާނެ ކަމަށް އެމީހުން ބުނެއެވެ. އަދި ސަރުކާރުގެ ފަރާތުން އާންމުންނާއި ބައްދަލުކުރުމަށްވެސް ވަނީ ގޮވާލާފައެވެ. ނަމަވެސް ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާ މިހާލަތުގައި މުޒަހަރާ ކުރުމަކީ މަނާ ކަމެކެވެ.
އާދިއްތަ ދުވަހުގެ ރޭގަނޑު އަށަކުން ފަތިހު ފަހަކާއި ހަމައަށް މާލެ ސަރަހައްދުގައި އެއްގަމު އުޅަނދު ދުއްވުުން މަނާކުރީ ޒުވާނުންގެ އެއްވުންތައް މަދުކުރުމަށް ކަމަށް އެޗްޕީއޭ ވަނީ ބުނެފައެވެ. ހެނދުނު 9:00 އިން ރޭގަނޑު 9:30 ށް ވިޔަފާރި ހިންގާ ފަރާތްތަކާއި، ރެސްޓޯރެންޓް, ކެފޭ އަދި ހޮޓާތަކަށް ޚިދުމަތް ދެވެއެވެ. އަދި ރޭގަނޑު 9:30 ގެ ފަހުން އެއްވެސް ޚިދުމަތެއް ނުދެވޭއިރު، މިވަގުތުތަކުގައި ޑެލިވަރީގެ ޚިދުމަތްތައް ދިނުމަކީ ވެސް މަނާ ކަމެކެވެ.
