ހިޖުރީ އައު އަހަރާއެކު އެންމެހައި ނުބައި އަމަލުތަކުން ދުރުވެ ތިބުމަށް ޚުތުބާގައި ގޮވާލައިފި
21 އޯގަސްޓު 2020 | ހުކުރު 08:20ރަސޫލާ މައްކާއިން މަދީނާއަށް ކުރެއްވި ހިޖުރައާ މެދު ފުންކޮށް ވިސްނާލުމަކީ މިއަދު ކުރަން ޖެހިފައިވާ ކަމެއް
މިއަދު ހުކުރު ޚުތުބާ އިއްވާފައިވަނީ \'\'ހިޖުރައިގެ ދަރުސްތަކުގެ ތެރެއިން\'\' މި މައުޟޫއަށް
ހިޖުރީ އައު އަހަރާއެކު އެންމެހައި ނުބައި އަމަލުތަކުން ދުރުވެ ތިބުމަށް ހުކުރު ޚުތުބާގައި ގޮވާލާއިފިއެވެ.
''ހިޖުރައިގެ ދަރުސްތަކުގެ ތެރެއިން'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ އިއްޔެ އަކީ ހިޖުރީ އައު އަހަރެއް ފެށުނު ދުވަސް ކަމަށާއި، ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައާ މެދުފުންކޮށް ވިސްނާލުމަކީ މިއަދު ކުރަން ޖެހިފައިވާ ކަމެއް ކަމަށެވެ.
ހިޖުރައިގެ މާނައަކީ، ތިމާގެ އަމިއްލަ ވަޒަން ދޫކޮށް އެހެން ރަށަކަށް ދިއުމަށްވުރެ މާ ފުޅާ މާނައެއް އޮތްކަމެއްކަން ފާހަގަކޮށް ޚުތުބާގައި ބުނީ ހިޖުރައިގެ އެންމެ މަތިވެރި މާނައަކީ ނުބައި ކަންތައް ދޫކޮށް ހެޔޮކަމުގެ މަގަށް ރުޖޫއަވުން ކަމަށެވެ.
އެހެންކަމުން އައު އަޒުމަކާއެކު މަސައްކަތްކޮށް އެންމެހާ ފާފަތަކުން ދުރުވުމަށް ޚުތުބާގައި ވަނީ ގޮވާލާފައެވެ.
ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައިގައި ތަފާތު ފިލާވަޅުތަކާއި އިބްރަތްތަކަށް އަލިއަޅުވާލައި ޚުތުބާގައި ބުނީ ދީނަށްޓަކައި ގުރުބާންވުމުގެ މަތިވެރި ފިލާވަޅު ލިބިގެންދާ ކަމަށެވެ. އަދި ކަމެއް ކާމިޔާބުވުމުގެ އެންމެ މުހިންމު ބަޔަކީ ކަމެއް ފެށުމުގެ ކުރިން އެކަމެއް ފުރިހަމައަށް ރޭވުމާއި، ކަންކަން ކުރާނެ ފަރާތްތައް ކަނޑައަޅައި ފުރިހަމައަށް ހަމަޖައްސާފައިވުން ކަމަށް ޚުތުބާގައި ބުނެފައިވެއެވެ.
މީގެ އިތުރުން ޚިތުބާގައި ބުނީ ކަންކަމުގައި މާތް ﷲ އަށް ވަކީލު ކުރަންޖެހޭ ކަމީ، ހިޖުރައިގެ މި މަތިވެރި ހާދިސާއިން ލިބޭ މުހިންމު ފިލާވަޅެއް ކަމަށާއި، ﷲ އަށް ވަކީލު ކުރުމަކީ، އެއްވެސް ޙާލެއްގައި، ވަކީލުކޮށްފީމޭ ބުނެ ދެއަތް އުރާލައިގެން ތިބުން ނޫން ކަމަށެވެ. އަދި ވަކީލު ކުރުމަކީ، ކަންކަން ކުރުމަށް ހުރި ވަސީލަތްތަކުގެ ބޭނުން ހިފުމާއެކު، ﷲ ގެ ޙަޟްރަތުން ރައްކާތެރިކަން ލިބޭނެ ކަމަށް ޔަގީން ކޮށްގެން ތިބުން ކަމަށް ޚުތުބާގައި ބުނެފައިވެއެވެ.
އެހެންކަމުން މިއަދު މެދުވެރިވެފައި މިވާ ކޮވިޑް-19 ގެ ޙާލަތުން އަރައިގަތުމަށް ވެސް، ހިޖުރައިގެ މަތިވެރި ހާދިސާ އިން ލިބިގަންނަން ޖެހޭ އެންމެ މުހިންމު އެއް ފިލާވަޅަކީ ހައްގު ގޮތުގައި ﷲ އަށް ވަކީލު ކުރުން ކަމަށް ޚުތުބާގައި ބުނެފައިވެއެވެ.
