ބޭސްފަރުވާއަށް ރާއްޖެއިން ބޭރަށް ދިޔަ ދިވެހިންތަކެއް ކޮވިޑަށް ޕޮޒިޓިވްވެއްޖެ
ކިމްސް ހޮސްޕިޓަލަށް ދިޔަ ދެ މީހެއް ކޮވިޑަށް ޕޮޒިޓިވްވެފައިވޭ
އަމްރިތާ ހޮސްޕިޓަލަށް ދިޔަ ދިވެހިންތަކެއް ވެސް ވަނީ ކޮވިޑަށް ޕޮޒިޓިވްވެފައި
ބޭސްފަރުވާއަށް ރާއްޖެއިން ބޭރަށް ދިޔަ ދިވެހިންތަކެއް ކޮވިޑަށް ޕޮޒިޓިވްވެއްޖެއެވެ.
މިކަމާއި ގުޅިގެން މީޑިއާތަކަށް މައުލޫމާތު ދެމުން އާސަންދަ އިން ބުނީ 29 ޖުލައި ގައި ކިމްސް ހޮސްޕިޓަލަށް ދިޔަ ބަލި މީހަކާއި އެހެން ބަލި މީހެއްގެ އެހީތެރިޔެއް ކޮވިޑަށް ޕޮޒިޓިވްވެފައިވާ ކަމަށެވެ.
ޕޮޒިޓިވްވި އެހީތެރިޔާއާ އެކީ ދިޔަ ބަލި މީހާގެ ފަރުވާ ނިމިފައިވީ ނަމަވެސް، އެހީތެރިޔާ ޕޮޒިޓިވްވުމާއި ގުޅިގެން އެގައުމުގައި 14 ދުވަހު ކަރަންޓީނުވާން ޖެހޭ ކަމަށް އާސަންދައިން ބުނެއެވެ. އަދި ޕޮޒިޓިވްވި ބަލި މީހާގެ ފަރުވާ މެދުނުކެނޑި ކުރިއަށްދާ ކަމުގެ ޔަގީންކަން އެކުންފުނިން ވަނީ ދީފައެވެ.
މީގެ އިތުރުން، މިދިޔަ މަހުގެ 14 ވަނަ ދުވަހު އިންޑިއާގެ އަމްރިތާ ހޮސްޕިޓަލަށް ދިޔަ 1 ބަލި މީހަކާއި ތިން އެހީތެރިން ކޮވިޑަށް ޕޮޒިޓިވްވެފައިވާ ކަމަށް އާސަންދައިން ބުންޏެވެ. އޭގެ ތެރެއިން ތިން މީހަކު ބަލިން ރަނގަޅުވެފައިވާ ކަމަށާއި އެމީހުންގެ ނަތީޖާ ނެގެޓިވްވެފައިވާ ކަމަށް ވެސް ބުންޏެވެ. އަދި ބަލިން ރަނގަޅު ނުވަނީ އެހީތެރިއެއް ކަމަށް ވެސް އާސަންދައިން ވަނީ ބުނެފައެވެ.
