ޕެވީލިއަންގެ ސްޓަރަކްޗަރ ވީރާނާއެއް ނުވޭ، މައްސަލަ ދަނީ ކޯޓުގައި ހިނގަމުން: ޝާހު
6 އޯގަސްޓު 2020 | ބުރާސްފަތި 00:12ރައްޔިތުންނަށް ފައިދާވާ ގޮތަށް ޚިދުމަތް ދޭން ބޭނުންވޭ
ރަސްފަންނުގައި ހެދި ޕެވީލިއަން، އެތަން ވަނީ ވަރަށް ބޮޑަށް ހަލާކުވެފައި
ރަސްފަންނުގައި ހެދި ޕެވީލިއަން ސްޓަރަކްޗަރ ވީރާނާ ނުވާ ކަމަށާއި، އެތަނުގެ މަސައްކަތްތެއް ނުކުރެވެނީ ކޯޓުގައި މައްސަލަ ހިނގަމުންދާތީ ކަމަށް މާލެ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިން ޑިރެކްޓަރު ހަސަން ޝާހު ވިދާޅުވެއްޖެއެވެ.
ރާޢްޖެޓީވީގެ ފަލަސުރުހީ މެނޭޖިން ޑިރެކްޓަރު ހަސަން ޝާހު ވިދާޅުވީ ޕެވީލިއަން ވީރާނާވާން ދޫކޮށްލަން ބޭނުންވާ ނުވާ ކަމަށާއި، ބޭނުންވަނީ ރައްޔިތުންނަށް އެންމެ ފައިދާވާ ގޮތަށް އެތަނުން ޚިދުމަތް ދެވިގެން ދިއުން ކަމަށެވެ. ޕެވީލިއަންގައި މިހާރު އެއްވެސް ރެސްޓައުރެންޓްއެއް ނުހިންގާ އެތަން ވީރާވާން ދޫކޮށްލާފައިވާ މައްސަލައަށް އިޝާރާތް ކުރައްވާ ޝާހު ވިދާޅުވީ އެމްޑަބްލިއުއެސްސީއާ ހަވާލުވިއިރު ވެސް އެމައްސަލަ ބޯޑުގެ ލެވަލްގައި ބަލަމުންދާ ކަމަށެވެ.
ޝާހު ވިދާޅުވީ އެމްޑަބްލިއުއެސްސީއާ މިތަން ހަވާލުކޮށްފައިވަނީ ކުރީގެ ހައުސިން މިނިސްޓްރީން ކަމަށާއި، ހަވާލުކުރީ އިންޓަނޭޝަނަލް ބްރޭންޑެޑް ފުޑް ޗެއިންއެއް ތައާރަފްކޮށްގެން އެޚިދުމަތްތައްދޭ ގޮތަށް ކަމަށެވެ.
ޝާހު ވިދާޅުވީ އެމްޑަބްލިއުއެސްސީން ދޭންޖެހޭ ހުއްދަ ސިބްކޯއަށް ނުލިބުމުގެ ސަބަބުން މޯލްޑިވްސް ޑްރަގް އޮތޯރިޓީން ސިބްކޯއަށް ލިބެން ޖެހޭ ހުއްދަތައް ނުލިބޭ ކަމަށް މައުލޫމާތު ލިބިފައިވާ ކަމަށެވެ. އަދި ހުއްދަ ނުލިބުމުގެ ސަބަބުން އެފަރާތުން ކުއްޔަށްދޭ އިންޓަނޭޝަނަލް ބްރޭންޑެއްގެ ތަންތަނަށް މައްސަލަ ކުރިމަތިވާ ކަމަށް ޝާހު ވިދާޅުވިއެވެ.
އިންޓަނޭޝަނަލް ބްރޭންޑަކީ ވަކި ގޮތަކަށް ވަކި ފެންވަރެއްގެ ޚިދުމަތްދޭ ތަންތަނަށްވާތީ ދިމާވި ބައެއް މައްސަލަތަކުން ހުއްޓުމަކަށް އައީ ކަމަށެވެ. އަދި އެދުވަސްވަރު އައިޖީއެމްއެޗް ކައިރިންނާއި، ސޯޝަލް ސެންޓަރު ސަރަހައްދުގެ މަގު ބަންދުކުރާތީ މިތަނުގައި ރެސްޓައުރެންޓް ހިންގާ ފަރާތްތަކުން ޝަކުވާ ކުރާކަން ޝާހު ފާހަގަކުރެއްވިއެވެ.
މީގެ އިތުރުން ޝާހު ވިދާޅުވީ ވިޔަފާރި ނުވާކަމަށް ބުނެ ސިބްކޯއިން އެމްޑަބްލިއުއެސްސީއަށް ދައްކަން ޖެހޭ ކުލި ނުދައްކާ ކަމަށެވެ. އަދި އެއީ މަހަކު ދެލައްކަ ފަންސާސްހާސް ރުފިޔާ ކުލި ލިބެންޖެހޭ ތަނެއްކަން ޝާހު ފާހަގަކުރެއްވިއެވެ.
އެމްޑަބްލިއުއެސްސީން މިމައްސަލަ ސިވިލް ކޯޓަށް ވައްދާފައިވާކަން ފާހަގަކުރައްވައި ޝާހު ވިދާޅުވީ ސިބްކޯއާ އެމްޑަބްލިއުއެސްސީއާ ދެމެދު ހަދާފައިވާ އެއްބަސްވުން އެއްކޮށް ހުއްޓާލުމަށް ހުކުމް ކޮށްފައިވާ ކަމަށެވެ. ސިވިލް ކޯޓުން އެއްގޮތަށް ހުކުމް ކުރިކަމުގައި ވިޔަސް ސިބްކޯއިން ހައިކޯޓުގައި އެމައްސަލަ އެޕީލް ކޮށްފައިވާ ކަމަށް ޝާހުު ވިދާޅުވިއެވެ.
ޝާހު ވިދާޅުވީ ދެކޯޓުގައި މިމައްސަލަ ހިނގަމުންދަނިކޮށް އެއްވެސް މަސައްކަތެއް ކުރިއަށް ނުގެންދެވޭނެ ކަމަށެވެ. ޝާހު ވިދާޅުވީ ތަން ވީރާނާވެގެން ދިޔަ ނަމަވެސް އެތަނުގެ ސްޓަރަކްޗަރ ކުރީ ރަނގަޅަށް ކަމަށާއި، ޕެވީލިއަންގެ މިމައްސަލައަށް މަޝްވަރާކޮށްގެން ވެސް ހައްލު ކުރެވޭނެ ކަމަށް ގަބޫލުކުރާ ކަމާށެވެ. އަދި އެމަސައްކަތް ކުރުމަށް ކުރަންޖެހޭ ކަންކަން ކުރާކަން ޝާހު ފާހަގަކުރެއްވިއެވެ.
މީގެ އިތުރުން ޝާހު ވިދާޅުވީ ޕެވީލިއަން އަލުން މަރާމާތު ކުރުމަށް ވެސް އެހާ ބޮޑު ހަރަދެއް ނުހިނގާނެ ކަމަށެވެ. އަދި ކޯޓުގެ މަރުހަލާ ނިމި ދެން އެތަން ބަޔަކާ ހަވާލުކުރާނީ ދެދެފަރާތަށް ފައިދާވާ ގޮތަށް ބެލުމަށްފަހު ކަމަށާއި، އެގްރިމެންޓަށް ބަދަލުތަކެއް ގެންނާނެ ކަމަށް ޝާހު ވިދާޅުވިއެވެ.
ޝާހު ވިދާޅުވީ އެތަން ދެން ހަވާލުކުރާއިރު، އެތަނުގައި ހަދަން ނިންމާފައިވާ ފަސް ފާހާނާ ބަރިއާއި، މޫދަށް އެރޭ މީހުން ފެންވަރާނެ ތަނެއްގެ އިތުރުން ލުއި ކާނާ ފަދަ ތަކެތި ވިއްކާ ފިހާރައެއް ވެސް ހަދަން ހަވާލުކުރާނެ ކަމަށެވެ.
ޕެވީލިއަންގެ އެންމެ ތިރީ ބުރީގައި މިތަންތަން ހަދަން ނިންމާފައި އޮތް ނަމަވެސް މިމަސައްކަތް ކޮށްފައިނުވެއެވެ. ހަމައެކަނި ހަދާފަ ހުރީ މީހުން އިށީންނާނެ ތަނެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި މާޒިޔާ ކޮންސްޓްރަކްޝަނާ ހަވާލުކޮށްގެން ހަދާފައިވާ ޕެވީލިއަންއަށް 13.9 މިލިއަން ރުފިޔާ ޚަރަދުކޮށްފައިވެއެވެ. 2018 ވަނަ އަހަރު ހުޅުވި ޕެވީލިއަން ވީރާނާވާން ދޫކޮށްލާފައިވާތީ ގިނަ ބަޔަކު ދަނީ އެކަމާ ކަންބޮޑުވުން ފާޅުކުރަމުންނެވެ.
