އިނގިރޭސި ޕްރިމިއާ ލީގުގެ ތަށި ޗެމްޕިއަން ލިވަޕޫލުން އުފުލާލައިފިއެވެ.

ލިވަޕޫލުން ލީގު ތަށި އުފުލާލީ ބުދަ ދުވަހުގެރޭ އަމިއްލަ ދަނޑުގައި ޗެލްސީ އަތުން 5-3 ން މޮޅުވި މެޗަށްފަހުއެވެ.

މި ސީޒަނުގެ ޕްރިމިއާ ލީގުގެ ޗެމްޕިއަންކަން ލިވަޕޫލުން ހޯދިއިރު، މިއީ އެޓީމުން 1989-1990 ގެ ސީޒަނުގެ ފަހުން އިނގިރޭސި ޗެމްޕިއަންކަން ހޯދި ފުރަތަމަ ފަހަރެވެ. އަދި އެ ޓީމުން އިނގިރޭސި ޗެމްޕިއަންކަން ހޯދި ޖުމްލަ 19 ވަނަ ފަހަރެވެ. އެކަމަކު މިއީ 1992 ވަނަ އަހަރު އިނގިރޭސި ފުރަތަމަ ޑިވިޝަން، ޕްރިމިއާ ލީގަށް ރިބްރޭންޑްކުރި ފަހުން އެ ޓީމުން ޗެމްޕިއަންކަން ހޯދި ފުރަތަމަ ފަހަރެވެ.

ލިވަޕޫލުން މި ސީޒަނުގެ ޕްރިމިއާ ލީގު ކާމިޔާބުކުރިއިރު، ކޯޗު ޔާގެން ކްލޮޕްގެ އިރުޝާދުގެ ދަށުން މޮޅު ކުޅުމެއް ދައްކަމުން އަންނަ ލިވަޕޫލުން މިހާތަނަށް ވަނީ ޕްރިމިއާ ލީގުގެ އިތުރުން ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ކްލަބު ވޯލްޑް ކަޕްވެސް ކާމިޔާބުކޮށްފައެވެ.

އަނިޔާގެ ސަބަބުން ލިވަޕޫލްގެ ކެޕްޓަން ޖޯޑަން ހެންޑަސަން ކުޅުމާ ދުރުގައި ހުރި ނަމަވެސް، ލީގު ތަށި އުފުލާލުމުގެ ޝަރަފު އޭނާއަށް ވަނީ ދީފައެވެ.

ލިވަޕޫލްގެ ދަނޑުގައި ބުދަ ދުވަހުގެރޭ ޗެލްސީއާ ދެކޮޅަށް ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީވެސް އެޓީމުންނެވެ. މެޗުގެ 23 ވަނަ މިނެޓުގައި މި ލަނޑު ލިވަޕޫލަށް ކާމިޔާބުކޮށްދިނީ ނަބީ ކެއިޓާއެވެ.

އަދި މެޗުގެ 38 ވަނަ މިނެޓުގައި ހިލޭ ޖެހުމަކުން ޓްރެންޓް އަލެކްސަންޑަ-އާނޯލްޑް ލިވަޕޫލަށް ލީޑު ފުޅާކޮށްދިންއިރު، އޭގެ ފަސް މިނެޓު ފަހުން ޖޯޖީނިއޯ ވައިނަލްޑަމް ވަނީ ލިވަޕޫލްގެ ތިންވަނަ ލަނޑު ކާމިޔާބުކޮށްފައެވެ. އެކަމަކު ފުރަތަމަ ހާފުގެ އިތުރު ވަގުތުގައި އޮލިވިއޭ ޖިރޫޑް ވަނީ ޗެލްސީއަށް ފަރަގު ކުޑަކޮށްދީފައެވެ.

ދެވަނަ ހާފު ފަށައިގެން 10 ވަނަ މިނެޓުގައި ރޮބާޓް ފިރްމީނޯ ލިވަޕޫލްގެ ހަތަރުވަނަ ލަނޑު ޖެހި ނަމަވެސް، 61 ވަނަ މިނެޓުގައި ޓަމީ އަބްރަހަމް ވަނީ ޗެލްސީއަށް ލަނޑެއް ކާމިޔާބުކޮށްދީފައެވެ. އަދި 73 ވަނަ މިނެޓުގައި ކްރިސްޓިއަން ޕުލިސިޗްގެ ލަނޑުން ނަތީޖާ އެއްވަރުކުރުމާ ގާތަށް ޗެލްސީ ޖެހިލި ނަމަވެސް، މެޗު ނިމެން ހަ މިނެޓަށް ވެފައިވަނިކޮށް އެލެކްސް އޮކްސްލޭޑް-ޗެމްބަލައިން ވަނީ ލިވަޕޫލަށް އަލުން ލީޑު ފުޅާކޮށްދީފައެވެ.

މި މެޗުން ލިބުނު މޮޅާއެކު ލިވަޕޫލް އެއްވަނައިގައި އޮތީ 18 ޕޮއިންޓުގެ ލީޑަކާއެކުއެވެ. ލިވަޕޫލަށް ކުޅުނު 37 މެޗުން 96 ޕޮއިންޓު ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 37 މެޗުން ލިބިފައިވަނީ 78 ޕޮއިންޓެވެ. ލިވަޕޫލް އަތުން ބަލިވި ޗެލްސީ އޮތީ ތާވަލުގެ ހަތަރުވަނައިގައި 37 މެޗުން 63 ޕޮއިންޓާއެކުއެވެ.

ލީގުގައި ބުދަ ދުވަހުގެރޭ މެންޗެސްޓާ ޔުނައިޓެޑް ވަނީ ވެސްޓް ހޭމް ޔުނައިޓެޑާ 1-1 ން އެއްވަރުކޮށް ތާވަލުގެ ތިންވަނައަށް ޖެހިލާފައެވެ. ޔުނައިޓެޑަށްވެސް 37 މެޗުން 63 ޕޮއިންޓު ލިބިފައިވާއިރު، އެޓީމަށް ކުރި ލިބެނީ ލަނޑުގެ ތަފާތުންނެވެ.