އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ ވަޓްފޯޑް އަތުން ފަސޭހަކަމާއެކު މެންޗެސްޓާ ސިޓީ މޮޅުވެއްޖެއެވެ.

ވަޓްފޯޑްގެ ދަނޑުގައި ކުޅުނު މެޗުން ސިޓީ މޮޅުވީ 4-0 ގެ ނަތީޖާއަކުންނެވެ.

މެޗުގައި ސިޓީން ލީޑު ނެގީ 31 ވަނަ މިނެޓުގައި ރަހީމް ސްޓާލިން ކާމިޔާބުކުރި ލަނޑުންނެވެ. އަދި އޭގެ 11 މިނެޓު ފަހުން ލުބުނު ޕެނަލްޓީއަކުން ސްޓާލިން ވަނީ ސިޓީއަށް ލީޑު ފުޅާކޮށްދީފައެވެ. ސްޓާލިން ފުރަތަމަ ފޮނުވާލި ބޯޅަ ވަޓްފޯޑްގެ ގޯލްކީޕަރު ބެން ފޮސްޓާ މަތަކުރި ނަމަވެސް، އޭނާގެ އަތުގައި ޖެހިފައި ނުކުތުމުން ދެވަނަ ފަހަރުން ސްޓާލިން ވަނީ ބޯޅަ ގޯލުގެ ތެރެއަށް ފޮނުވާލާފައެވެ.

ދެވަނަ ހާފުގައިވެސް ސިޓީން ރަނގަޅު ކުޅުމެއް ދެއްކިއިރު، 63 ވަނަ މިނެޓުގައި ފިލް ފޯޑެން ވަނީ ސިޓީގެ ތިންވަނަ ލަނޑު ކާމިޔާބުކޮށްދީފައެވެ. އަދި އޭގެ ތިން މިނެޓު ފަހުން ސިޓީގެ ހަތަރުވަނަ ލަނޑު ޖަހައިދިނީ އައިމެރިކް ލަޕޯޓެވެ.

މީގެ އިތުރުން ލީގުގައި އަންގާރަ ދުވަހުގެރޭ ކުޅުނު މެޗުން އާސެނަލް ބަލިވީ އެސްޓަން ވިލާ އަތުން 1-0 ންނެވެ.

ވިލާގެ ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 27 ވަނަ މިނެޓުގައި ވިލާއަށް ކާމިޔާބުކޮށްދިނީ މަޙްމޫދު ޓްރެޒެގޭއެވެ.

ރޭގެ ނަތީޖާއާއެކު ރެލިގޭޝަން ޒޯނަށް ބަދަލުތަކެއް އައިރު، ސިޓީ އަތުން ބަލިވި ވަޓްފޯޑް ވަނީ ތާވަލުގެ 18 ވަނައަށް ވެއްޓިފައެވެ. އަދި އާސެނަލް ބަލިކުރި ވިލާ ވަނީ ތާވަލުގެ 17 ވަނައަށް ޖެހިލާފައެވެ. ވިލާ އާއި ވަޓްފޯޑަށްވެސް ކުޅުނު 37 މެޗުން 34 ޕޮއިންޓު ލިބިފައިވާއިރު، ވިލާ ކުރީގައި އޮތީ ލަނޑުގެ ތަފާތުންނެވެ.

އަދި ވިލާ އަތުން ބަލިވި އާސެނަލް އޮތީ ތާވަލުގެ 10 ވަނައިގައި 37 މެޗުން 53 ޕޮއިންޓާއެކުއެވެ. ވަޓްފޯޑް ބަލިކުރި ސިޓީ އޮތީ ތާވަލުގެ ދެވަނައިގައި 37 މެޗުން 78 ޕޮއިންޓާއެކުއެވެ.