ރާއްޖޭގައި މިހާތަނަށް ބޭއްވުމަށް ނިންމާފައިވާ އެންމެ ބޮޑު ކުޅިވަރުގެ ހަރަކާތް ކަމަށްވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ރާއްޖޭގައި ބޭއްވުމުގެ ފުރުސަތު ހަނިވެފައިވާ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެ އެވެ.

ރާއްޖޭގައި އައިއޯއައިޖީ ބޭއްވުމަށް ހަމަޖެހިފައިވަނީ 2023 ވަނަ އަހަރެވެ.

ވަޒީރު ވިދާޅުވީ އައިއޯއައިޖީއަށް ކުރަންޖެހޭ މަސައްކަތް މިހާރު ދެ ގުނަވެފައިވާއިރު، ގޭމްސް ބާއްވަން ކުރަންޖެހޭ މަސައްކަތަށް ދެން އޮތީ ދެ އަހަރު ކަމަށެވެ. ރާއްޖޭގައި ގޭމްސް ބާއްވާނަމަ އެކަން ކުރަންޖެހޭނީ 2023 ވަނަ އަހަރުގެ މާޗު ނޫނީ އެޕްރީލް މަހު ކަމަށާއި، ގައުމުގެ އިޤުތިޞާދާއި މިހާރު މިއޮތް ވަގުތައް ބަލާއިރު އެ ފުރުސަތު ވަރަށް ބޮޑަށް ހަނިވެފައިވާ ކަމަށް އައިއޯއައިޖީގެ ބިޑު ރާއްޖެއަށް ކާމިޔާބުކޮށްދިނުމުގައިވެސް މުހިންމު ދައުރެއް އަދާކުރި ވަޒީރު ވިދާޅުވިއެވެ.

މިހާރުގެ ހަލަތާއެކު ބޮޑު ހޭދަކޮށް މިވަރުގެ ބޮޑު ގޭމްސްއެއް ބޭއްވުމަކީ ކުރެވޭނެ ކަމެއްތޯ އަމިއްލަ ހިތާއި ސުވާލު ކުރެވޭއިރު، އެސޯސިއޭޝަންތަކުގެ ވެރިންގެ ހިތުގައިވެސް މިހާރު މި ސުވާލު އެބައޮތް ކަމަށް ވަޒީރު ވިދާޅުވިއެވެ.

މި ގޭމްސްގެ ކަންކަން ކުރަން ބަލާއިރު ފެށުމުގެ ރަސްމިއްޔާތާއި ނިންމުގެ ރަސްމިއްޔާތައް އެކަނި ބެލި ނަމަވެސް 50 މީހުންގެ 50 ބަސް ބޭނުންވާނެ ކަމަށާއި، ގޭމްސްއަށް އެކަނިވެސް ރާއްޖެއަށް 3،500 އެތުލީޓުން އަންނާނެ ކަމަށް ވަޒީރު ވިދާޅުވިއެވެ.

މިހާތަނަށް ވިސްނުން ގެންގުޅުނީ ގޭމްސްގެ ކަންކަންކޮށްފައިވާ ތަޖުރިބާކާރަކު ރާއްޖެ ގެނެސް އޭނާ ބަހައްޓައިގެން އޭނާގެ ލަފާގެ މަތިން ހުރިހާ ކަމެއް ކުރިއަށް ގެންދިޔުން ކަމަށާއި، އެހެން ނަމަވެސް މިހާރުުގެ ހާލަތާއެކު މިކަމާއި ގުޅޭ އެންމެ ފަހުގެ ނިންމުން ނިންމާނީ ރައީސުލްޖުމުހޫރިއްޔާ އުފައްދާފައިވާ މިނިސްޓީރިއަލް ކޮމިޓީން ކަމަށްވާއިރު، އެ ކޮމިޓީގެ ބައްދަލުވުން ވަރަށް އަވަހަށް ބޭއްވިގެންދާނެ ކަމަށް ވަޒީރު ވިދާޅުވިއެވެ.

ގޭމްސް ރާއްޖޭގައި ނުބާއްވަން ނިންމި ނަމަވެސް، އެތުލީޓުންނަށް ރަނގަޅު ވަސީލަތް ގާއިމުކުރުމަށް ވެފައިވާ ވައުދު ކުރިއަށްދާނެ ކަމަށާއި، އޭރުން ހަމަޖެހިލައިގެން އެކަން ކުރެވިގެންދާނެ ކަމަށް ކުޅިވަރާ ބެހޭ ވަޒީރު ވިދާޅުވިއެވެ.

އައިއޯއައިޖީއަކީ މިހާތަނަށް ރާއްޖޭގައި ބާއްވަން ފުރުސަތު ލިބުނު ބައިނަލްއަގުވާމީ ފުރަތަމަ ކުޅިވަރު ގޭމްސްއެވެ. ރާއްޖޭގައި ރަސްމީކޮށް ކުޅިވަރު ކުޅެންފެށިތާ 88 ވުރެން ގިނަ އަހަރުވެފައިވާއިރު، އައިއޯއައިޖީގެ ބިޑު ކާމިޔާބުވުމަކީ ދިވެހި ކުޅިވަރަށް ލިބުނު އެންމެ ބޮޑު ޝަރަފަށެވެ.

އެންމެ ފަހުން 2019 ވަނަ އަހަރު މޮރިޝަސްގައި ބޭއްވި އައިއޯއައިޖީ ބާއްވަން 2015 ވަނަ އަހަރު ރާއްޖޭން ޝައުގުވެރިކަން ފާޅުކުރި ނަމަވެސް، އޭރުގެ ސަރުކާރުގެ އެއްބާރުލުމެއް ނުލިބުމުން މޯލްޑިވްސް އޮލިމްޕިކް ކޮމިޓީން އެކަން ހުއްޓާލިއެވެ. އެހެން ނަމަވެސް މި ސަރުކާރުން އަައިއޯއައިޖީގެ ބިޑު ކާމިޔާބުކޮށްފައިވާއިރު، ބައިނަލްއަގުވާމީ ކުޅިވަރު މުބާރާތްތައް ރާއްޖޭގައި ބޭއްވުމަކީ މި ސަރުކާރުގެ ރިޔާސީ ވައުދުތަކުގެ ތެރޭގައި ހިމެނޭ ކަމެކެވެ.

ރާއްޖޭން އައިއޯއައިޖީ ބޭއްވުމުގެ ބިޑު ކާމިޔާބުކުރީ މި ސަރަހައްދުގެ އެންމެ ބޮޑު ޖަޒީރާ ކަމަށްވާ މަޑަގަސްކަރަ އާއި ކޮމޮރޯސްއާ ވާދަކޮށްގެންނެވެ. އައިއޯއައިޖީގެ ބާއްވާ ގައުމެއް ކަނޑައަޅަން ނެގި ވޯޓުގައި ރާއްޖެއަށް ހަތަރު ގައުމެއްގެ ތާއީދު ލިބުނުއިރު، މަޑަގަސްކަރަ އާއި ކޮމޮރޯސް އަށް، ކޮންމެ ގައުމަކަށް ލިބުނީ އެއް ވޯޓެވެ.