މި އަހަރުގެ ފުރަތަމަ 6 މަސް ދުވަހުގެ ތެރޭގައި 427 ލަފައެއް އޭޖީ އޮފީހުން ދީފި
1 ޖުލައި 2020 | ބުދަ 14:17ޖޫން މަހުގެ ނިޔަލަށް ދައުލަތުގެ މުއައްސަސާތަކުން 440 ކަމަކާ ގުޅޭ ގޮތުން ޤާނޫނީ ލަފަޔަށް އެދިފައިވޭ
އެޓާނީ ޖެނެރަލް އިބްރާހިމް ރިއްފަތު؛ މިދިޔަ މަހުގެ ނިޔަލަށް 400ށް ވުރެ ގިނަ ލަފައަށް އެދިފައިވޭ
މި އަހަރުގެ ޖެނުއަރީ މަހުން ފެށިގެން ޖޫން މަހުގެ ނިޔަލަށް އެކި ކަންކަމާއި ގުޅޭގޮތުން 427 ލަފައެއް އެޓާނީ ޖެނެރަލްގެ އޮފީހުން ދީފިއެވެ.
އެޓާނީ ޖެނެރަލްގެ އޮފީހުން ނެރިފައިވާ ތަފާސްހިސާބުތައް ދައްކާގޮތުން ޖެނުއަރީ މަހުން ފެށިގެން ޖޫން މަހުގެ ނިޔަލަށް ދައުލަތުގެ މުއައްސަސާތަކުން 440 ކަމަކާ ގުޅޭ ގޮތުން ޤާނޫނީ ލަފަޔަށް އެދިފައި ވެއެވެ. އަދި މި މުއްދަތުގެ ތެރޭގައި 427 ކަމަކާ ގުޅޭ ގޮތުން އެޓަރނީ ޖެނަރަލްގެ އޮފީހުން ޤާނޫނީ ލަފާދީފައިވާނެ ކަމަށް އޭޖީ އޮފީހުން ބުނެއެވެ.
މީގެ ތެރޭގައި ހިމެނެނީ ބިލު ތަޞްދީގު ކުރުމާ ގުޅޭ ގޮތުން ދެވުނު 4 ލަފަޔަކާއި، އެއްބަސްވުންތަކާ ގުޅޭ ގޮތުން ދެވުނު 156 ލަފަޔަކާއި، ގަވާއިދުތަކާ ގުޅޭ ގޮތުން ދެވުނު 55 ލަފާ އަދި އުޞޫލުތަކާ ގުޅޭ ގޮތުން 30 ލަފާ ވަނީ ދީފައެވެ.
މީގެ އިތުރުން މުޢާހަދާތަކާ ގުޅޭ ގޮތުން 6 ލަފާ ދީފައިވާ އިރު، އެހެނިހެން ކަންކަމާ ގުޅޭ ގޮތުން 176 ލަފައެއް ވަނީ މި މުއްދަތުގެ ތެރޭގައި ދީފައެވެ.
