އުމުރުން 18 އަހަރު ނުފުރޭ ކުޑަކުއްޖަކު ބަލިވެއިން މައްސަލަ އެއް ބަލަން ފަށާފައިވާ ކަމަށް ފުލުހުން ބުނެފިއެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ، 18 އަހަރު ނުފުރޭ ކުޑަކުއްޖަކު ބަލިވެއިން މައްސަލައެއް ޖެންޑަރ މިނިސްޓްރީން އެ އިދާރާ އަށް ހުށައަޅާފައިވާ ކަމަށެވެ.
ފުލުހުން ބުނީ، އެ މައްސަލަ ބަލަނީ ކުޑަކުއްޖަކު ރޭޕްކޮށްފައިވާ މައްސަލައެއްގެ ގޮތުގައި ކަމަށެވެ. ކުޑަކުދިންނަށް ކުރާ އަނިޔާގެ މައްސަލަތަކަކީ ސީރިޔަސް މައްސަލަތަކެއްގެ ގޮތުގައި ބަލަމުންދާ މައްސަލަތަކެއް ކަމަށްވާތީ, ކުއްޖާގެ ވަނަވަރު ރައްކާތެރި ކުރުމަށްޓަކައި ކުއްޖާގެ އަތޮޅާއި ރަށް ހާމަނުކުރަން ފުލުހުން ވަނީ ނިންމާފައެވެ.
ކުޑަކުއްޖަކު ބަލިވެ އިން މައްސަލައެއް ފުލުހުން ބަލަން ފަށާފައިވާއިރު، އުމުރުން 17 އަހަރުގެ އަންހެން ކުއްޖަކު ބަލިވެއިން މައްސަލައެއްވެސް ފުލުހުން ދަނީ ބަލަމުންނެވެ. މި ފަހަކަށް އައިސް ކުޑަކުދިންނަށް ޖިންސީ ގޯނާކުރާ މައްސަލަތައް ތިލަވަމުންދާ އަދަދު ދަނި އިތުރުވަމުންނެވެ. މައްސަލަތައް އެންމެ އެކަށީގެންވާ ހަލުވި މިނުގައި ނުބެލޭތީ ފުލުހުންނަށާއި، އިދާރާތަކަށް ފާޑުކިޔުން ވަނީ އިންތިހާއަށް ގިނަވެފައެވެ.
