ސައުތު އެފްރިކަން ޕްރިމިއާ ޑިވިޝަނުން ހަތް ކުޅުންތެރިއަކު ކޮރޯނާވައިރަހަށް ޕޮޒިޓިވް ވެއްޖެ

ސައުތު އެފްރިކާގައި ކުޅެމުން އަންނަ އެންމެ އަގުބޮޑު ފުޓްބޯޅަ ލީގު ކަމަށްވާ ސައުތު އެފްރިކަން ޕްރިމިއާ ޑިވިޝަން (އޭބީއެސްއޭ ޕްރިމިއާޝިޕް) ން ހަތް ކުޅުންތެރިއަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެއެވެ.

އޭބީއެސްއޭ ޕްރިމިއާޝިޕްގެ ކުޅުން ހުއްޓާލީ ކޮރޯނާވައިރަސް (ކޮވިޑް-19) ގެ ނުރައްކާ ބޮޑުވެ އެ ގައުމު ލޮކްޑައުން ކުރުމާއި ގުޅިގެން މާޗު މަހުގެ ތެރޭގައެވެ. އޭބީއެސްއޭ ޕްރިމިއާޝިޕްގެ އިތުރުން ރަގްބީ އާއި ކްރިކެޓް ފަދަ ބޮޑެތި ކުޅިވަރުތައްވެސް ވަނީ ހުއްޓިފައެވެ.

އެކަމަކު ދާދި ފަހުން ސައުތު އެފްރިކާގެ ސަރުކާރުން ވަނީ ލީގު އަލުން ފެށުމުގެ ހުއްދަ ދީފައެވެ. އެއާއެކު ކްލަބުތަކުން މިހާރު ވަނީ ފަރިތަކުރުންތައް ފަށާފައެވެ. ފަރިތަކުރުންތައް ފެށުމުގެ ކުރިން ކްލަބުތަކުން ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރިއިރު، ހަތަރު ކްލަބަކުން ހަތް ކުޅުންތެރިއަކު ކޮވިޑް-19ށް ޕޮޒިޓިވް ވެފައިވާ ކަމަށް އެ ގައުމުގެ މީޑިއާތަކުން ވަނީ ހާމަކޮށްފައެވެ.

އޭބީއެސްއޭ ޕްރިމިއާޝިޕް އަލުން ފެށުމަށް ތައްޔާރުވަމުންދާއިރު، ގިނަ ކްލަބުތަކަށް ބާކީ ކުޅެން އޮތީ އެންމެ ނުވަ މެޗެވެ. އެކަމަކު ފީފާއިން މި ސީޒަން ނިންމުމަށް ކަނޑައަޅައިފައިވާ ތާރީޚު ކަމަށްވާ ޖުލައި 31ށް ސީޒަން ނިންމުމާމެދު ހިޔާލު ތަފާތުވެފައިވާއިރު، ބޮޑަށް ބެލެވެނީ ސީޒަން އެ ތާރީޚަށްވުރެ ދިގު ދެމިގެންދާނެ ކަމަށް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުން އޭބީއެސްއޭ ޕްރިމިއާޝިޕް އަލުން ފަށާނީ ސަޕޯޓަރުން ނުވައްދައި މެޗުތައް ކުޅޭ ގޮތަށެވެ. އަދި ލީގުގެ ހުރިހާ މެޗެއް ވަކި ދަނޑުތަކެއްގައި ކުޅެން ނިންމާނެ ކަމަށްވެސް ވަނީ ރިޕޯޓުކޮށްފައެވެ.

ސައުތު އެފްރިކާއަށް ވެސް ކޮވިޑް-19 ގެ އަސަރު ކޮށްފައިވާއިރު، އެ ގައުމުން މިހާތަނަށް 131،000 ށްވުރެ ގިނަ މީހުން ކޮވިޑް-19ށް ޕޮޒިޓިވް ވެފައެވެ. އަދި މި ވައިރަސް ޖެހިގެން އެގައުމުން 2،400 ށްވުރެ ގިނަ މީހުން ވަނީ މަރުވެފައެވެ.