އެތުލެޓިކް ބިލްބާއޯ ބަލިކޮށް ސްޕެނިޝް ލީގުގެ އެއްވަނަ މަގާމަށް އަލުން ބާސެލޯނާ ޖެހިލައިފިއެވެ.

އެންމެ ފަހުގެ ޗެމްޕިއަން ބާސާއިން އަންގާރަ ދުވަހުގެރޭ ކުޅުނު މެޗުން މޮޅުވީ 1-0 ގެ ނަތީޖާއަކުންނެވެ.

ބާސާގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. މި މެޗުގައި ބާސާއަށް އެންމެ އެދެވޭ ކުޅުމެއް ނުދެއްކުނުއިރު، އެޓީމަށް އެތުލެޓިކް ބިލްބާއޯގެ ގޯލާ އަމާޒުކޮށް ފޮނުވާލެވުނީ ހަ ހަމަލާއެކެވެ. އަދި މުޅި މެޗުގައިވެސް އެތުލެޓިކް ބިލްބާއޯއަށް ބާސާގެ ގޯލާ އަމާޒުކޮށް ހަމަލާއެއް އުފެއްދިފައެއް ނުވެއެވެ.

މެޗުގައި ބާސާއިން ޖެހި ހަމައެކަނި ލަނޑު އެޓީމުން ކާމިޔާބުކުރީ 71 ވަނަ މިނެޓުގައެވެ. ކެޕްޓަން ލިއޮނެލް މެސީ ތަނަވަސްކޮށްދިން ފުރުސަތަކުން ބާސާއަށް ލީޑު ނަގައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އިވާން ރަކިޓިޗެވެ. އޭނާ މި ލަނޑު ކާމިޔާބުކުރީ ކުޅެން އެރިތާ ހަވަނަ މިނެޓުގައެވެ.

މެޗަށްފަހު ބާސާގެ ކޯޗު ކިކޭ ސެޓިއެން ބުނީ މެޗު އުނދަގޫވާނެކަން ކުރިންވެސް އެނގޭ ކަމަށާއި، ހާލަތުގެ ގޮތުން ގޯހެއް ހަދައިގެން ފަރުޖެހެން ނެތުމުން ކުޅުންތެރިންގެ ހާސްކަން ބޮޑު ކަމަށެވެ.

މި މޮޅާއެކު ބާސާ އަލުން އެއްވަނައަށް އެރީ ކުޅުނު 31 މެޗުން 68 ޕޮއިންޓާއެކުއެވެ. ދެވަނައަށް ވެއްޓުނު ރެއާލް މެޑްރިޑަށް 30 މެޗުން ލިބިފައިވަނީ 65 ޕޮއިންޓެވެ. އެހެންކަމުން ލީގުގައި ބުދަ ދުވަހުގެރޭ މަޔޯކާ އަތުން މޮޅުވެ ރެއާލަށް އަލުން އެއްވަނައަށް އެރޭނެއެވެ.

މީގެ އިތުރުން ލީގުގައި އަންގާރަ ދުވަހުގެރޭ އެތުލެޓިކޯ މެޑްރިޑް ވަނީ ލެވަންޓޭ އަތުން 1-0 ން މޮޅުވެފައެވެ. މި މެޗުގައި އެތުލެޓިކޯއިން ކާމިޔާބުކުރި ހަމައެކަނި ލަނޑަކީ މެޗުގެ 15 ވަނަ މިނެޓުގައި ލެވަންޓޭގެ ބްރުނޯ އަތުން ބައިކޮޅަށް ވަން ލަނޑެކެވެ. މި މޮޅާއެކު އެތުލެޓިކޯ އޮތީ 55 ޕޮއިންޓާއެކު ތާވަލުގެ ތިންވަނައިގައެވެ.