ކުޅިވަރާ ބެހޭ ވުޒާރާއިން ރާއްޖޭގެ އެކިކަންކޮޅުތަކުގައި އަޅަމުންދާ ފަތާ ޓްރެކުތަކުގެ ތެރެއިން އައްޑޫ ސިޓީ މީދޫގައި އެޅި ފަތާ ޓްރެކުގެ މަސައްކަތް ނިމި ބޭނުން ކުރަން ފަށައިފިއެވެ.
ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ އައްޑޫ ސިޓީ މީދޫގެ ފަތާ ޓްރެކުގެ މަސައްކަތް ނިމިފައިވާ ކަމަށާއި އެކަން ކުރުމަށްޓަކައި އެ ދާއިރާގެ މެމްބަރު ރޮޒޭނާ އާދަމާއި ސްވިމިންގ އެސޯސިއޭޝަން އޮފް މޯލްޑިވްސް އަދި އައްޑޫ ސިޓީ ކައުންސިލުގެ ފަރާތުން ދެއްވި އެއްބާރުލެއްވުމަށް ޝުކުރު އަދާކުރައްވާ ކަމަށެވެ.
ހަމައެހެންމެ އެ ސިޓީގެ ފޭދޫގައި އެޅުމަށް ހަމަޖެހިފައިވާ ފަތާ ޓްރެކުގެ މަސައްކަތް ވަރަށް އަވަހަށް ފެށިގެންދާނެ ކަމަށްވެސް ވަޒީރު ވަނީ ވިދާޅުވެފައެވެ. އެގޮތުން ފޭދޫ ޓްރެކު އެޅުމަށް ބޭނުންވާ ހުރިހާ ސާމާނެއް ވަނީ އެރަށަށް ފޮނުވާފައެވެ.
ފެތުމަކީ ރާއްޖޭގެ ރައްޔިތުންގެ ދިރިއުޅުމާއި ވަރަށް ބޮޑަށް ގުޅިލާމެހިފައިވާ ކުޅިވަރެއްކަން ފާހަގަކުރައްވައި ވަޒީރު ވަނީ ގިނަ އަދަދެއްގެ ބަޔަކު ކުޅިވަރެއްގެ ގޮތުގައި ފެތުމުގައި ޝާމިލުވާތަން މިހާރު ފެންނަމުންދާތީ އުފާކުރައްވާ ކަމަށް ވިދާޅުވެފައެވެ.
ރާއްޖޭގެ އެކި ކަންކޮޅުތަކުގައި ފަތާ ޓްރެކު އެޅުމުގެ މަސައްކަތް ކުޅިވަރާ ބެހޭ ވުޒާރާއިން ކުރިޔަށް ގެންދަނީ ސްވިމިންގ އެސޯސިއޭޝަން އޮފް މޯލްޑިވްސްއާ ގުޅިގެންނެވެ. މިހާތަނަށް ވަނީ ހދ. ކުޅުދުއްފުއްޓާއި ހއ. ދިއްދޫގެ ފަތާ ޓްރެކުތައް ނިންމާލާފައެވެ.
