ކޮރޯނާވައިރަސް (ކޮވިޑް-19) އާ ގުޅިގެން މެދުކެނޑިފައިވާ ކުޅިވަރުގެ ހަރަކާތްތައް ފެށުމަށް ލުއިތަކެއް ދިނުމާއި ގުޅިގެން، ފުރަތަމަ ފަރިތަކުންތައް ފަށާ ޓީމަކަށް ގައުމީ ކްރިކެޓް ޓީމު ވެއްޖެއެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ކުޅިވަރާ ބެހޭ ވުޒާރާ އަދި ސްޕޯޓްސް ކޮމިޝަނުގެ އިރުޝާދާއެކު ގައުމީ ކްރިކެޓް ޓީމުގެ ފަރިތަކުންތައް ހޮނިހިރު ދުވަހުގެ ހަވީރު ފެށުމަށް ނިންމާފައިވާއިރު، ފުރަތަމަ ދެ ހަފުތާއަށް ކުރިއަށްދާނީ ފިޒިކަލް ޓްރޭނިންގ ކަމަށް ކްރިކެޓް ބޯޑުން ބުނެއެވެ.

ޖިމް އާއި، ފެތުމާއި، ދުވުމާއެކު ކުރިއަށްގެންދާ ފިޒިކަލް ފިޓްނަސް ޕްރޮގްރާމުގައި ހަ ކޯޗުން ތިބޭއިރު ކޮންމެ ކޯޗެއްވެސް ގެންގުޅެނީ ފަސް ކުޅުންތެރިން ކަމަށާއި، މިހާރު އެކުލަވާލާފައިވާ 25 ކުޅުންތެރިންގެ ސްކޮޑު މި ތަމްރީނުތަކުގައި ބައިވެރިވާނެ ކަމަށް ކްރިކެޓް ބޯޑުން ބުނެއެވެ.

ތަމްރީނުތައް މާލޭގައި ފެށުމަށް ހަމަޖެހިފައިވާއިރު، ކްރިކެޓްގެ ޑިވޮލަޕްމަންޓް ޕްރޮގްރާމު ފުޅާދާއިރާއެއްގައި ކުރިއަށްގެންދާ ފުވައްމުލަކާއި ލ. ކުނަހަންދޫގައި ވެސް ހޮނިހިރު ދުވަހު ހަވީރު ތަމްރީނުތައް ފެށިގެންދާނެ ކަމަށް ކްރިކެޓް ބޯޑުން ބުނެއެވެ.

މި ދެ ރަށުގައި ވެސް ތަމްރީނުތައް ކުރިއަށްގެންދާނީ މާލޭގައި ވެސް ކުރިއަށްގެންދާ އުސޫލުން، އެޗްޕީއޭއިން އެކުލަވާލާފައިވާ ގައިޑްލައިނާއި އެއްގޮތަށް ކަމަށް ކްރިކެޓް ބޯޑުން ބުނެއެވެ.

ގައުމީ ކްރިކެޓް ޓީމު އެންމެ ފަހުން ބައިނަލްއަގުވާމީ މުބާރާތެއްގައި ވާދަކޮށްފައިވަނީ މިއަހަރުގެ ފެބްރުއަރީ މަހުގެ ތެރޭގައެވެ. އެއީ އޭޝިއަން ކްރިކެޓް ކައުންސިލުން އިންތިޒާމުކޮށްގެން އޮމާނުގައި ބޭއްވި ވެސްޓާން ރީޖަން ޓީ20 ކްރިކެޓް މުބާރާތުގައެވެ.

ފިރިހެން ގައުމީ ޓީމުގެ އިތުރުން ފުރަތަމަ ފަހަރަށް ރާއްޖޭގެ އަންހެން ކްރިކެޓް ޓީމެއް ވަނީ މިދިޔަ އަހަރު ސައުތު އޭޝިއަން ގޭމްސްގައި ބައިވެރިވެފައެވެ.