13 ފަހަރު އިޓާލިއަން ކަޕް ކާމިޔާބުކޮށްފައިވާ ޔުވެންޓަސް ބަލިކޮށް ނާޕޮލީން ޗެމްޕިއަންކަން ހޯދައިފިއެވެ.
ބުދަ ދުވަހުގެރޭ ކުޅުނު ފައިނަލް މެޗު ނާޕޮލީން ކާމިޔާބުކުރީ ޕެނަލްޓީގައި 4-2 ން ޔުވެންޓަސް ބަލިކޮށްގެންނެވެ.
މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ކުރީ ކޮޅު ޔުވެންޓަސްގެ ތަރި ކްރިސްޓިއާނޯ ރޮނާލްޑޯއަށް ލަނޑު ޖަހަން ރަނުގެ ފުރުސަތެއް ލިބި ވަނީ ބޭކާރުވެފައެވެ. މެޗުގެ 12 ވަނަ މިނެޓުގައި ރޮނާލްޑޯ ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ.
ފުރަތަމަ ހާފުގައި ނާޕޮލީއަށް ވެސް ވަނީ ލަނޑު ޖަހަން ރަނުގެ ދެ ފުރުސަތެއް ލިބި ބޭކާރުވެފައެވެ. ނާޕޮލީގެ ކުޅުންތެރިން ފޮނުވާލި ހަމަލާތަކުގެ ހުރަހަކަށްވީ ޔުވެންޓަސްގެ ވަރުގަދަ ޑިފެންސެވެ.
މެޗުގެ ދެވަނަ ހާފުގައި ނާޕޮލީން ވަނީ އެޓީމުގެ ކުޅުން ރަނގަޅުކޮށް ޔުވެންޓަސްގެ ހާފަށް ބާރުބޮޑު ކޮށްފައެވެ. އެގޮތުން ނާޕޮލީގެ ހަލުވި ފޯވާޑުން ވަނީ ޔުވެންޓަސްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. މިހާފުގައި ޔުވެންޓަސްގެ ގޯލްކީޕަރު ޖިއަންލުއިޖީ ބުފޮން ވަނީ ނާޕޮލީން ފުލުފުލުގައި ފޮނުވާލި ހަމަލާތައް ހުޝިޔާރުކަމާއެކު ދިފާއުކޮށްފައެވެ.
މެޗުގެ ފުރިހަމަ ވަގުތު ހަމަވުމުން ނަތީޖާ ނެރުމަށް ޖެހި ޕެނަލްޓީގައި ޔުވެންޓަސްގެ ޕައުލޯ ޑިބާލާ އާއި ޑެނީލޯ ފޮނުވާލި ޕެނަލްޓީ ނާކާމިޔާބުވިއިރު، ނާޕޮލީން ވަނީ ހުރިހާ ޕެނަލްޓީއެއް ކާމިޔާބުކޮށްފައެވެ.
މިއީ ޔުވެންޓަސް މި މުބާރާތުގެ ފައިނަލުން ޖެހިޖެހިގެން ބަލިވި ދެވަނަ ފަހަރެވެ. އަދި މިއީ ނާޕޮލީގެ ކޯޗު ޖެނާރޫ ގަޓޫސޯ، އޭނާގެ ކޯޗިން ކެރިއަރުގައި ކާމިޔާބުކުރި ފުރަތަމަ ތައްޓެވެ.
