ޔުއެފާ ޗެމްޕިއަންސް ލީގުގެ ފޯމެޓް މިނީ ޓޯނަމެންޓް ފޯމެޓަށް ބަދަލުކޮށް، އޮގަސްޓް މަހު މުބާރާތް އަލުން ފަށަން ނިންމައިފިއެވެ.

ކޮރޯނާވައިރަސް (ކޮވިޑް-19) އާ ގުޅިގެން ޗެމްޕިއަންސް ލީގު މެދުކަނޑާލީ ދެވަނަ ބުރުގެ މެޗުތަކުގެ ތެރެއިންނެވެ. އެގޮތުން ދެވަނަ ބުރުގައި ރެއާލް މެޑްރިޑާއި މެންޗެސްޓާ ސިޓީ، ޗެލްސީ އާއި ބަޔާން މިއުނިކް، ލިޔޯން އާއި ޔުވެންޓަސް އަދި ނާޕޮލީ އާއި ބާސެލޯނާގެ ދެވަނަ ލެގުގެ މެޗުތައް ކުޅެން އެބައޮތެވެ.

ޔުއެފާއިން ޗެމްޕިއަންސް ލީގުގެ ފޯމެޓަށް ގެނައި ބަދަލާއެކު، ދެވަނަ ބުރުގެ މެޗުތަކަށްފަހު، ކުއާޓާފައިނަލުން ފަށައިގެން މެޗުތައް ކުޅޭނީ ވޯލްޑް ކަޕް ކުޅޭ އުސޫލަށެވެ. އެގޮތުން ދެ ލެގުގެ ބަދަލުގައި އެއް ލެގު ކުޅޭއިރު، ހުރިހާ މެޗެއްވެސް ކުރިއަށް ގެންދާނީ އެއް ސަރަހައްދެއްގައެވެ. އެގޮތުން މެޗުތައް ކުޅެން ޔުއެފާއިން ނިންމާފައިވަނީ ޕޯޗުގަލްގެ ވެރިރަށް ލިޒްބަންއެވެ.

އޮގަސްޓް މަހުގެ ހަތްވަނަ ދުވަހާއި އަށްވަނަ ދުވަހު ދެވަނަ ބުރުގެ މެޗުތައް ކުރިން ވެސް ކުޅެން ތާވަލުކޮށްފައި ހުރި ސްޓޭޑިއަމްތަކުގައި ކުޅޭއިރު، ކުއާޓާފައިނަލް މެޗުތައް ލިޒްބަންގައި ފަށާނީ އޮގަސްޓް މަހުގެ 12 ވަނަ ދުވަހެވެ. އަދި ފައިނަލް މެޗު ކުޅޭނީ އޮގަސްޓް މަހުގެ 23 ވަނަ ދުވަހެވެ.

މީގެ ކުރިން ޔުއެފާއިން ނިންމާފައި އޮތީ މިފަހަރުގެ ޗެމްޕިއަންސް ލީގުގެ ފައިނަލް މެޗު ތުރުކީގެ އިސްތަންބޫލްގައި ކުޅޭ ގޮތަށެވެ. އެކަމަކު މިފަހަރުގެ މެޗުތައް ލިޒްބަންގައި ކުޅެން ބަދަލުކުރުމާއެކު، އަންނަ ސީޒަންގެ ޗެމްޕިއަންސް ލީގުގެ ފައިނަލް މެޗު އިސްތަންބޫލްގައި ކުޅެން މިހާރު ވަނީ ނިންމާފައެވެ.

ޗެމްޕިއަންސް ލީގެކޭ އެއް ގޮތަށް ޔޫރޮޕާ ލީގުގެ މެޗުތައް ވެސް ކުއާޓާފައިނަލާ ހިސާބުން އެއް ސަރަހައްދެއްގައި ކުޅެން މިހާރު ވަނީ ނިންމާފައެވެ. ޔޫރޮޕާ ލީގުގެ މެޗުތައް ކުރިއަށް ގެންދާނީ ޖަރުމަންގެ ހަތަރު ސިޓީއެއްގައެވެ. ޔޫރޮޕާ ލީގުގެ ފައިނަލް މެޗު ކުޅުމަށް ތާވަލުކޮށްފައިވަނީ އޮގަސްޓް މަހުގެ 21 ވަނަ ދުވަހެވެ.

އޮގަސްޓް މަހު ޗެމްޕިއަންސް ލީގާއި ޔޫރޮޕާ ލީގުގެ މެޗުތައް ފަށާއިރު، ގައުމުތަކުގެ ލީގުތައް އޮގަސްޓް މަހުގެ ކުރިން ނިންމުމަށް ޔުއެފާއިން ވަނީ އަންގާފައެވެ.