ސްޕެނިޝް ލީގުގައި އަންގާރަ ދުވަހުގެރޭ ކުޅުނު މެޗުން ލެގަނޭސް ބަލިކޮށް ބާސެލޯނާ ލީގުގެ އެއްވަނައިގައި ލީޑު ފުޅާކޮށްފިއެވެ.

ކޮރޯނާވައިރަސް (ކޮވިޑް-19) ށްފަހު ބާސާގެ ދަނޑު، ކޭމްޕް ނޯގައި ކުޅުނު ފުރަތަމަ މެޗުން އެޓީމު މޮޅުވީ 2-0 ގެ ނަތީޖާއަކުންނެވެ.

އަންގާރަ ދުވަހުގެރޭ ކުޅުނު މެޗުގެ ފުރަތަމަ ހާފުގައި މޮޅަށް ކުޅުނީ ލެގަނޭސްއިންނެވެ. އެގޮތުން މި ހާފުގައި ލެގަނޭސްއިން ވަނީ ބާސާގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލާފައެވެ. އޭގެ ތެރެއިން އެއް ހަމަލާ، ބާސާގެ ޑިފެންޑަރު ކްލެމެންޓް ލޯންގްލޭ ވަނީ ގޯލުގެ ރޮނގު މަތިން ސަލާމަތް ކޮށްފައެވެ.

ލެގަނޭސްއިން ރަނގަޅަށް ކުޅެމުން ދިޔަ ނަމަވެސް، ގޯލާ އަމާޒުކޮށް ފޮނުވާލި ފުރަތަމަ ހަމަލާގައި ބާސާއިން ވަނީ ލީޑު ނަގާފައެވެ. ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް ޖޫނިއޯ ފިރްޕޯ ތަނަވަސްކޮށްދިން ފުރުސަތަކުން މި ލަނޑު ބާސާއަށް ކާމިޔާބުކޮށްދިނީ އުމުރުން 17 އަހަރުގެ އަންސޫ ފަޓީއެވެ. މިއީ މި ފަަހަރު ލީގުގައި އޭނާ ޖެހި ފަސްވަނަ ލަނޑެވެ.

ދެވަނަ ހާފުގައި ބާސާއިން ކުޅުން ރަނގަޅުކުރިއިރު، 64 ވަނަ މިނެޓުގައި ފޯވާޑް އެންޓޮއިން ގްރީޒްމަން ވަނީ އިތުރު ލަނޑެއް ޖަހާފަައެވެ. އެކަމަކު ގްރީޒްމަނަށް އެ ބޯޅަ ޖައްސާލި ބާސާގެ ޑިފެންޑަރު ނެލްސަން ސަމޭޑޯ އޮފްސައިޑުގައި ހުރުމާއެކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ވަނީ އެ ލަނޑު އޮފްސައިޑް ކަމަށް ނިންމާފައެވެ.

އެކަމަކު އޭގެ ފަސް މިނެޓު ފަހުން ބާސާއިން ވަނީ ލީޑު ފުޅާކޮށްފައެވެ. ބާސާގެ ކެޕްޓަން ލިއޮނެލް މެސީއަށް ކުރި ފައުލަކާ ގުޅިގެން ދިން ޕެނަލްޓީއަކުން، މި ލަނޑު ބާސާއަށް ކާމިޔާބުކޮށްދިނީ މެސީއެވެ. މިއީ މި ސީޒަނުގެ ސްޕެނިޝް ލީގުގައި މެސީ ކާމިޔާބުކުރި 21 ވަނަ ލަނޑެވެ. އަދި މިއީ ކްލަބާއި ގައުމީ ޓީމަށް މިހާތަނަށް މެސީ ޖަހައިދިން 699 ވަނަ ލަނޑެވެ.

މި މޮޅާއެކު ބާސާއަށް ވަނީ އެއްވަނައިގައި ފަސް ޕޮއިންޓުގެ ލީޑެއް ލިބިފައެވެ. ބާސާއަށް 29 މެޗުން 64 ޕޮއިންޓު ލިބިފައިވާއިރު، ދެވަނައިގައި އޮތް ރެއާލް މެޑްރިޑަށް ކުޅުނު 28 މެޗުން ލިބިފައިވަނީ 59 ޕޮއިންޓެވެ. ލީގުގައި ބުދަ ދުވަހުގެރޭ ރެއާލް ކުޅޭނީ ވެލެންސިއާއާ ދެކޮޅަށެވެ.