ސަރުކާރުން ދޭ އެލަވަންސް ލިބެނީ ގައުމީ ފުޓްބޯޅަ ޓީމުގެ 23 ކުޅުންތެރިންނަށް ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފި އެވެ.

ގައުމީ ޓީމުން ކޮންމެ މެޗަކަށްވެސް 23 ކުޅުންތެރިންގެ ފައިނަލް ސްކޮޑެއް އެކުލަވާލާ ނަމަވެސް، އާންމުކޮށް ފަރިތަކުރުންތައް ކުރިއަށް ގެންދަނީ 30 ކުޅުންތެރިންނަށް ވުރެން ގިނަ ކުޅުންތެރިންގެ ސްކޮޑަކާއެކުއެވެ.

ކުރިއަށް އޮތް 2022 ވަނަ އަހަރުގެ ފީފާ ވޯލްޑް ކަޕާއި 2023 ވަނަ އަހަރުގެ އޭއެފްސީ އޭޝިއަން ކަޕްގެ ޖޮއިންޓް ކޮލިފައިންގައި އަންނަ އޮކްޓޯބަރު މަހާއި ނޮވެމްބަރު މަހު ރާއްޖެއިން ކުޅޭ މެޗުތަކަށް ތައްޔާރުވާން މިހާރު ވަނީ 32 ކުޅުންތެރިންގެ ސްކޮޑެއް އެކުލަވާލާފައެވެ.

އެކަމަކު ހޯމަ ދުވަހު އެފްއޭއެމުން ބޭއްވި ނޫސްވެރިންގެ ބައްދަލުވުމުގައި ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އަލީ ސުޒޭން ބުނީ ސަރުކާރުން ދޭ އެލަވަންސް ލިބެނީ ގައުމީ ފުޓްބޯޅަ ޓީމުގެ 23 ކުޅުންތެރިންނަށް ކަމަށާއި، މި ކަހަލަ އުނދަގޫ ހާލަތެއްގައި ވީހާވެސް ގިނަ ކުޅުންތެރިންނަށް ފައިދާ ކުރާނެ ގޮތަކަށް ބަލަމުން އަންނަ ކަމަށެވެ. އެގޮތުން ކޮންމެވެސް ވަރަކަށް ކުޅުންތެރިން ރޮޓޭޓްކުރުމުގެ ވިސްނުމެއް ގެންގުޅޭ ކަމަށްވެސް ސުޒޭން ބުންޏެވެ.

އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ ގައުމީ ސްކޮޑުގައި އާންމުކޮށް 30 ނޫނީ 35 ވަރަކަށް ކުޅުންތެރިން ތިބޭއިރު އެ ހުރިހާ ކުޅުންތެރިންނަށް ސަރުކާރުން ކަނޑައަޅާފައިވާ އެލަވަންސް ނުދެވޭނެ ކަމަށެވެ. އަދި އެލަވަންސް ދިނުމުގައި ކުޅުންތެރިންގެ ހާލަތަށް ބަލާ ކަމަށާއި، އެލަވަންސް ލިބޭ ކުޅުންތެރިން ނަގަން ޖެހެނީ އެފްއޭއެމުން ކަމަށް ޖަވާޒް ފާހަގަކުރެއްވިއެވެ.

އަންހެން އަދި ފިރެހެން ކުޅުންތެރިން ތަފާތު ކުރުމެއް ނެތި ކޮންމެ މަހަކު 5،000 ރުފިޔާ ދެމުންދާއިރު، ގައުމީ ޓީމުތަކުގެ 328 ކުޅުންތެރިންނަށް ކޮންމެ މަހަކު 1.4 މިލިޔަން ރުފިޔާ އެލަވަންސްގެ ގޮތުގައި ދެމުންދެއެވެ. މީގެ ކުރިން ކޮރޯނާވައިރަސް (ކޮވިޑް-19) އާ ގުޅިގެން ގައުމީ ޓީމުތަކުގެ ކުޅުންތެރިންނަށް އެލަވަންސް ނުދޭކަން ކުޅިވަރާ ބެހޭ ވަޒީރު އަޙްމަދު މަހުލޫފް ހާމަކުރެއްވި ނަމަވެސް، ފަހުން ކުޅިވަރު އެސޯސިއޭޝަންތަކާއި ކުޅިވަރު ކުޅުންތެރިންނާއެކު ކުރިއަށް ގެންދިޔަ މަޝްވަރާތަކަށްފަހު ވަނީ ކުޅުންތެރިންނަށް އެލަވަންސް ދޭން ނިންމާފައެވެ.