ފަސޭހަކަމާއެކު އެއިބާ ބަލިކޮށް ރެއާލުން ފަރަގު ކުޑަކޮށްފި

ކޮރޯނާވައިރަސް (ކޮވިޑް-19) ށްފަހު ސްޕެނިޝް ލީގުގައި ރެއާލް މެޑްރިޑުން ކުޅުނު ފުރަތަމަ މެޗު ފަސޭހަކަމާއެކު ކާމިޔާބުކޮށްފިއެވެ.

ރެއާލްގެ ރަސްމީ ދަނޑު ސަންޓީއާގޯ ބާނަބައުގައި މަރާމާތުގެ މަސައްކަތްތަކެއް ކުރަމުން ގެންދިޔުމާއެކު، މި މެޗު ކުޅެފައިވަނީ ރެއާލުން ތަމްރީނުކުރަން ބޭނުންކުރާ އަލްފްރެޑޯ ޑި ސްޓެފާނޯ ސްޓޭޑިއަމްގައެވެ. އާދީއްތަ ދުވަހުގެރޭ އެއިބާއާ ދެކޮޅަށް ކުޅުނު މެޗު ރެއާލުން ކާމިޔާބު ކޮށްފައިވަނީ 3-1 ނަތީޖާއަކުންނެވެ.

މި މެޗު ފަށައިގެން ހަތަރުވަނަ މިނެޓުގައި ރެއާލުން ލަނޑު ޖަހާ ލީޑު ނެގިއިރު، މި ލަނޑު އެޓީމަށް ކާމިޔާބުކޮށްދީފައިވަނީ ޖަރުމަންގެ މިޑްފިލްޑަރު ޓޯނީ ކްރޫސްއެވެ. މި ލަނޑަށްފަހު އެއިބާއިން ރެއާލްގެ ހާފަށް ބާރު ބޮޑުކޮށް ގިނަ ހަމަލާތަކެއް އުފައްދަން މަސައްކަތް ކުރިނަމަވެސް، ރެއާލްގެ ޑިފެންޑަރުން ވަނީ އެއިބާގެ ހަމަލާތައް ހުއްޓުވާފައެވެ.

މެޗުގެ ފުރަތަމަ ހާފުގެ ކޮންޓްރޯލް ރެއާލަށް ލިބިގެންދިޔައީ މެޗުގެ 30 ވަނަ މިނެޓުގައި އުފެއްދި ކައުންޓާ އެޓޭކުގައި އެޑެން ހެޒާޑް ތަނަވަސްކޮށްދިން ފުރުސަތަކުން ކެޕްޓަން ސާޖިއޯ ރާމޯސް ކާމިޔާބުކޮށްދިން ލަނޑާ ހިސާބުންނެވެ. އަދި ފުރަތަމަ ހާފު ނިމުމުގެ ކުރިން ރެއާލުން ވަނީ އެޓީމުގެ ތިންވަނަ ލަނޑުވެސް ކާމިޔާބުކޮށްފައެވެ. މެޗުގެ 37 ވަނަ މިނެޓުގައި މި ލަނޑު ޖެހީ ޑިފެންޑަރު މާސެލޯއެވެ.

މެޗުގެ ދެވަނަ ހާފުގައި އެއިބާއިން އެޓީމުގެ ކުޅުން ރަނގަޅު ކުރިއިރު، މި ހާފުގައި ކުރީކޮޅު އެޓީމުން ވަނީ ފަރަގު ކުޑަކޮށްފައެވެ. މެޗުގެ 60 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދީފައިވަނީ ޕެޑްރޯ ބިގާސްއެވެ. މި ލަނޑަށްފަހު ވެސް އެއިބާއިން ގެންދިޔައީ ފުލުފުލުގައި ރެއާލްގެ ގޯލަށް ހަމަލާ ފޮނުވާލަމުންނެވެ. އެކަމަކު ރެއާލުގެ ގޯލްކީޕަރު ތިބައޫ ކޯޓުއާ ވަނީ މެޗުގައި އެއިބާއިން ފޮނުވާލި ގިނަ ހަމަލާތަކެއް ހުޝިޔާރުކަމާއެކު ދިފާއުކޮށްފައެވެ.

މިނަތީޖާ އާއެކު ރެއާލުން ވަނީ އެއްވަނައިގައި އޮތް ބާސެލޯނާގެ ފަރަދު ދެ ޕޮއިންޓަށް ކުޑަކޮށްފައެވެ. ބާސެލޯނާ އެއްވަނައިގައި އޮތީ 61 ޕޮއިންޓާއިއެކުގައެވެ. ދެވަނައިގައި އޮތް ރެއާލަށް ލިބިފައިވަނީ 59 ޕޮއިންޓެވެ. އަދި ތިންވަނައިގައި އޮތް ސެވިއްޔާއަށް ލިބިފައިވަނީ 50 ޕޮއިންޓެވެ.