ލޮކްޑައުންގައި ދެވޭނެ އިތުރު ލުއިތައް މިރޭ ހާމަކުރަނީ

ލޮކްޑައުންގެ ދެވަނަ ފިޔަވަހީގައި ދެވޭ ލުއިތައް ބުދަ ދުވަހުގެ ރޭ (މިރޭ) ހާމަކުރުމަށް ނިންމައިފި އެވެ.

'ލޮކްޑައުން' އަށް ލުއިތަކެއްދީ ފުރަތަމަ ފިޔަވަހީގެ ދެވަނަ ހަފުތާ މާދަމާއަށް ހަމަވާނެ އެވެ. 'ލޮކްޑައުން' އަށް ލުއިތަކެއް ދީފައި ވަނީ މިދިޔަ މަހުގެ 29 ވަނަ ދުވަހު އެވެ. އަދި ފިޔަވަހިތަކަށް ބަހާލައިގެން ލުއިތައް ދިނުމަށް ވަނީ ނިންމާފަ އެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް އަޒީޒު ވިދާޅުވީ، ކުރިއަށް ހުރި ފިޔަވަހިތަކުގައި ދޭނެ ލުއިތައް އެނގި، ތައްޔާރުވާން ބޭނުންވާނެކަން ޤަބޫލުކުރައްވާ ކަމަށާއި، އެގޮތުން އަންގާރަ ދުވަހުގެ ރޭ ވެސް އެ މަޢުލޫމާތު ހިއްސާކުރަން އޮތްނަމަވެސް ޕޮލިސީ ބައްދަލުވުންތަކެއް ކުރިއަށްދާތީ އެ މަޢުލޫމާތު ހިއްސާކުރުން ފަސްކުރެވިފައިވާ ކަމަށެވެ. އަދި އެ ލުއިތައް ބުދަ ދުވަހު (މިރޭ) އިއުލާނު ކުރައްވާނެ ކަމަށް މަބްރޫކް ވިދާޅުވި އެވެ.

'ލޮކްޑައުން' އަށް ލުއިތަކެއް ދިން ނަމަވެސް، ފުރަތަމަ ފިޔަވަހީގައި ރަށްރަށް ދަތުރު ކުރުމާއި، 'ހައިރިސްކް' މީހުންނާއި ކުޑަކުދިން ބޭރަށް ނުކުތުން ވަނީ މަނާކޮށްފަ އެވެ. އަދި ވިޔަފާރި ކުރަން ހުއްދަ ދެވޭ ގަޑިއަށް ބަދަލު ގެނެސް ކޮންމެ ގޭބިސީއަކުން 3 މީހަކަށް 2 ގަޑި އިރަށް 2 ދުވަހު ނުކުމެވޭ ގޮތަށް ހުއްދަ ދީފައި ވެއެވެ.