ކޮރޯނާވައިރަސް (ކޮވިޑް-19) އާ ގުޅިގެން ކެންސަލް ކޮށްފައިވާ ފްރެންޗު ލީގު، ޕްލޭއޮފް ކުޅޭ ގޮތަށް އޮގަސްޓް މަހުގެ ދެވަނަ ދުވަހުގެ ކުރިން ފެށިދާނެ ކަމަށް ޔުއެފާ އިން ބުނެފިއެވެ.

ސެޕްޓެމްބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާއެކު ފްރެންޗު ލީގު ކެންސަލް ކުރީ އޭޕްރީލް މަހުގެ 30 ވަނަ ދުވަހުއެވެ.

ފްރެންޗު ލީގު ކެންސަލް ކޮށް، ޕީއެސްޖީ އަށް ވަނީ ޗެމްޕިއަންކަން ދީފައެވެ. ފްރެންޗު ލީގަކީ ޔޫރަޕުގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ. މީގެ ކުރިން ޖަރުމަން ލީގުގެ ކުޅުން ފަށާފައި ވާއިރު، މި މަހުގެ ތެރޭގައި އިނގިރޭސި ޕްރިމިއާ ލީގާއި ސްޕެނިޝް ލީގުގެ އިތުރުން އިޓާލިއަން ލީގު އަލުން ފެށުމަށް ވަނީ ތާވަލުކޮށްފައެވެ.

ދާދި ފަހުން ޔުއެފާ ރައީސް އަލެކްސަންޑަ ކެފެރިން ވިދާޅުވީ ގައުމުތަކުގެ ލީގުތަކާ މެދު އަމަލުކުރާނެ ގޮތެއް ނިންމާނީ އެ ގައުމެއްގެ ފުޓްބޯޅަ އެސޯސިއޭޝަނަކުން ކަމަށެވެ. އެކަމަކު ފްރެންޗު ލީގު ކެންސަލް ކުރަން ނިންމީ މާ އަވަހަށް ކަމަށާއި، އޮގަސްޓް މަހުގެ ދެވަނަ ދުވަހުގެ ކުރިން ޕްލޭއޮފް ކުޅޭ ގޮތަށް ފްރެންޗު ލީގު އަލުން ފެށުމުގެ ފުރުސަތު އޮންނާނެ ކަމަށްވެސް ވިދާޅުވިއެވެ.

ރިޕޯޓުތައް ބުނާ ގޮތުން ޔުއެފާއިން މަސައްކަތް ކުރަމުން އަންނަނީ ގައުމުތަކުގެ ލީގުތައް ނިންމާ، އޮގަސްޓް މަހުގެ ތެރޭގައި ޗެމްޕިއަންސް ލީގާއި ޔޫރޮޕާ ލީގު އަލުން ފެށުމަށެވެ.

ފްރެންޗު ލީގު ކެންސަލް ކުރުމާ ގުޅިގެން ގިނަ ފަރާތްތަކަކުން ވަނީ ނުރުހުން ފާޅު ކޮށްފައެވެ. އެގޮތުން ލީގުގެ ޗެމްޕިއަންކަން ދިން ޕީއެސްޖީގެ ތަރި އެންހެލް ޑި މާރިއާ އާއި ފްރާންސްގެ ކުރީގެ ކުޅިވަރާ ބެހޭ ވަޒީރު ވެސް ވަނީ ފްރެންޗު ލީގު ކެންސަލް ކުރަން އެ ގައުމުގެ ފުޓްބޯޅަ ފެޑެރޭޝަނުން ނިންމީ މާ އަވަހަށް ކަމަށް ވިދާޅުވެފައެވެ.

ފްރެންޗު ލީގު ކެންސަލް ކުރީ އަންނަ ސީޒަނުގެ ޔޫރަޕް މުބާރާތްތަކަށް ކޮލިފައިވާ ޓީމުތައް ކަނަޑައެޅުމަށް ފަހުއެވެ. އެގޮތުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވީ އެއްވަނައިގައި އޮތް ޕީއެސްޖީއާއި ދެވަނައިގައި އޮތް މާސޭ އަދި ތިންވަނައިގައި ރެނެސްއެވެ. އަދި ޔުއެފާ ޔޫރޮޕާ ލީގަށް ކޮލިފައިވީ ހަތަރުވަނައިގައި އޮތް ލިލް އާއި ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސްއެވެ. އެހެންކަމުން މިއީ 1997 ވަނަ އަހަރަށް ފަހު ޔޫރަޕުގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ.

މީގެ އިތުރުން ލީގު ކެންސަލް ކުރުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ.

އެއާއެކު ލިޔޯން އާއި، އަމިއެންސް އަދި ޓުލޫސް އިން ކޯޓަށް މައްސަލަ ހުށަހެޅި ނަމަވެސް، ކޯޓުން އެ މައްސަލަ ބަލައިގަނެފައެއް ނުވެއެވެ. އެހެންކަމުން ލިޔޯނުގެ ރައީސް ޖިއަން-މިކޭލް އައުލަސް ވަނީ ފްރާންސް ސަރުކާރުގެ އެންގުމަށް ލީގު ކެންސަލްކޮށްފައި ވާތީ އަލުން ލީގު ފަށަން ސަރުކާރުން އިސްނެގުމަށް އެދިފައެވެ.