ކަކުލަށް ލިބުނު އަނިޔާއިން ބާސެލޯނާގެ ފޯވާޑް ލުއިސް ސުއަރޭޒް އެއްކޮށް ރަނގަޅު ވެފައިވާކަމަށް އެ ކްލަބުން ބުނެފިއެވެ.

އުމުރުން 33 އަހަރުގެ ސުއަރޭޒްގެ ކަކުލަށް ލިބިފައިވާ އަނިޔާގެ ސަބަބުން އޮޕަރޭޝަނެއް ކޮށްފައިވާއިރު މިހާރު އޭނާ ވަނީ އެއްކޮށް ފިޓްވެފައި ކަމަށް ބާސާއިން ވަނީ ބުނެފައެވެ.

ސުއަރޭޒް އެންމެ ފަހުން ބާސެލޯނާއަށް ކުޅެދިން މެޗަކީ ޖެނުއަރީ މަހު ސްޕެނިޝް ސުޕަ ކަޕް ސެމީ ފައިނަލުގައި އެތުލެޓިކޯ މެޑްރިޑާއި ދެކޮޅަށް ކުޅުނު މެޗެވެ. އެމެޗުން ބާސެލޯނާ ބަލިވީ 3-2 ގެ ނަތީޖާއަކުންނެވެ.

ޖެނުއަރީ މަހު ސުއަރޭޒްއަށް އަނިޔާވިއިރު، މިދިޔަ މެއި މަހުގެ އަށްވަނަ ދުވަހުން ފެށިގެން ސުއަރޭޒް އަންނަނީ ބާސާގެ ފަރިތަކުރުންތަކުގައި ބައިވެރިވަމުންނެވެ.

މިމަހުގެ 11 ވަނަ ދުވަހު ސްޕެނިޝް ލީގު އަލުން ފަށާއިރު، ބާސާ އިން ފުރަތަމަ މެޗެއް ކުޅޭނީ މި މަހުގެ 14 ވަނަ ދުވަހުގެރޭއެވެ. އެ ރޭ ބާސާ ނުކުންނާނީ މަޔޯކާއާ ދެކޮޅަށެވެ. މި މެޗުގައި ސުއަރޭޒް ކުޅޭނެ ކަމަށް ރިޕޯޓުތައް ބުނިއިރު، މިއީ ޖެނުއަރީ މަހު ބާސާގެ ކޯޗުކަމާ ހަވާލުވި ކިކޭ ސެޓިއެންއަށް ސުއަރޭޒް ބޭނުން ކުރަން ލިބޭނެ ފުރަތަމަ މެޗެވެ.

2014 ވަނަ އަހަރު ލިވަޕޫލް ދޫކޮށް ބާސާއަށް ބަދަލުވި ސުއަރޭޒް އަންނަނީ އެޓީމުގައި މޮޅު ކުޅުމެއް ދައްކަމުންނެވެ. އެގޮތުން ސުއަރޭޒް ވަނީ މި ސީޒަނުގައި ބާސާއަށް ކުޅުނު 23 މެޗުން 14 ލަނޑު ޖަހާފައެވެ.

ސްޕެނިޝް ލީގު އަލުން ފަށާއިރު، އެއްވަނައިގައި އޮތް ބާސާ އާއި ދެވަނައިގައި އޮތް ރެއާލް މެޑްރިޑާއި ދެމެދު އޮތީ ދެ ޕޮއިންޓުގެ ފަރަގެކެވެ. ބާސާއަށް 27 މެޗުން 58 ޕޮއިންޓު ލިބިފައިވާއިރު، ރެއާލަށް ވަނީ 27 މެޗުން 56 ޕޮއިންޓު ލިބިފައެވެ.