އެންމެ މޮޅު ކުޅުންތެރިއަކީ މެސީ، ގަދަ ފަހެއްގައި ރޮނާލްޑޯ ނުހިމެނޭ
3 ޖޫން 2020 | ބުދަ 15:49ރޮނާލްޑޯ ނަޒާރިއޯގެ ލިސްޓުގައި މެސީގެ އިތުރުން ހިމެނެނީ ހަޒާޑް، އެމްބާޕޭ، ނޭމާ އަދި ސަލާހު
ލިއޮނެލް މެސީ (ކ)، ކްރިސްޓިއާނޯ ރޮނާލްޑޯ (ވ): ރޮނާލްޑޯ ނަޒާރިއޯގެ ނަޒަރުގައި އެންމެ މޮޅީ މެސީ
މި ވަގުތު ދުނިޔޭގައި ހުރި އެންމެ މޮޅު ފުޓްބޯޅަ ކުޅުންތެރިޔަކީ އާޖެންޓީނާގެ ފޯވާޑް ލިއޮނެލް މެސީ ކަމަށް ބްރެޒިލްގެ ކުރީގެ އެއްވަނަ ފޯވާޑް ލުއިޒް ރޮނާލްޑޯ ނަޒާރިއޯ ބުނެފި އެވެ.
90 ގެ އަހަރުތަކުގައި ވިދާލި ބްރެޒިލްގެ ފޯވާޑް ރޮނާލްޑޯ ނަޒާރިއޯ އަކީ ގިނަ ބަޔެއްގެ ނަޒަރުގައި އަދިވެސް އެންމެ މޮޅު އެއް ފޯވާޑެވެ. ރޮނާލްޑޯ ނަޒާރިއޯ ވަނީ 1993ން 2011ށް ބާސެލޯނާ، އިންޓަ މިލާން، ރެއާލް މެޑްރިޑް އަދި އޭސީ މިލާނުގައި ހުނަރު ސާބިތުކޮށްދީފަ އެވެ. ކެރިއަރުގައި ޗެމްޕިއަންސް ލީގު ފިޔަވައި ރޮނާލްޑޯ ނަޒާރިއޯ ވަނީ ބޮޑެތި ހުރިހާ މުބާރާތެއް ކާމިޔާބުކޮށްފަ އެވެ.
ދާދި ފަހުން ރޮނާލްޑޯ ނަޒާރިއޯ ވަނީ އޭނާގެ ނަޒަރުން މި ވަގުތު ދުނިޔޭގައި ތިބި އެންމެ މޮޅު ފަސް ކުޅުންތެރިންގެ ލިސްޓެއް ހަދާފަ އެވެ. މި ލިސްޓުގެ އެއްވަނަ ލިބެނީ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބަލޮންޑޯ އެވޯޑް އެންމެ ގިނައިން ހޯދާފައިވާ ލިއޮނެލް މެސީ އެވެ. މި ލިސްޓުގައި މެސީއާ އެންމެ ވާދަވެރި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އެއް ނުހިމެނެ އެވެ.
ރޮނާލްޑޯ ނަޒާރިއޯގެ ލިސްޓުގައި މެސީގެ އިތުރުން ދެން ހިމެނެނީ ބެލްޖިއަމްގެ އެޑެން ހަޒާޑާއި، ފްރާންސްގެ ކީލިއަން އެމްބާޕޭ އާއި، ބްރެޒިލްގެ ނޭމާގެ އިތުރުން މިސްރުގެ މުހައްމަދު ސަލާހެވެ.
މި ވަގުތު ދުނިޔޭގައި ތިބި އެންމެ މޮޅު ފަސް ކުޅުންތެރިންގެ ލިސްޓުގައި ކްރިސްޓިއާނޯ ރޮނާލްޑޯ ނުހިމެނި ނަމަވެސް، މީގެ ކުރިން ރޮނާލްޑޯ ނަޒާރިއޯ ވަނީ ކްރިސްޓިއާނޯ ރޮނާލްޑޯ އަށް ތައުރީފުކޮށް ވާހަކަދައްކާފަ އެވެ.
އެގޮތުން އުމުރުން 35 އަހަރުގައި ވެސް ކްރިސްޓިއާނޯ ރޮނާލްޑޯ އަށް ތަފާތު ދެއްކެނީ އޭނާ އެ ފެންވަރުގައި ހުންނަން ކުރާ މަސައްކަތުންކަން ރޮނާލްޑޯ ނަޒާރިއޯ ވަނީ ފާހަގަކޮށްފަ އެވެ. އަދި އޭނާ އަކީ އެންމެ މަތީ ލެވެލްގެ ޕްރޮފެޝަނަލް އެތުލީޓެއް ކަމަށް ވެސް ރޮނާލްޑޯ ނަޒާރިއޯ މީގެ ކުރިން ވަނީ ބުނެފަ އެވެ.
