އަނިޔާގެ ސަބަބުން ޕްރިމިއާ ލީގު އަލުން ފަށާއިރު ޔެރީ މިނާ އަށް ނުކުޅެވޭނެ

އަނިޔާގެ ސަބަބުން އިނގިރޭސި ޕްރިމިއާ ލީގު އަލުން ފަށާއިރު އެވަޓަންގެ ޑިފެންޑަރު ޔެރީ މިނާ އަށް ނުކުޅެވޭނެ ކަމަށް ރިޕޯޓުތައް ބުނެފި އެވެ.

މިމަހުގެ 17 ވަނަ ދުވަހު ޕްރިމިއާ ލީގު އަލުން ފެށުމަށް ތާވަލުކޮށްފައިވާއިރު، މިދިޔަ ހަފުތާގައި ވަނީ ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ހުއްދަ ދީފަ އެވެ. އެގޮތުން އެވަޓަނުން މިދިޔަ ހުކުރު ދުވަހު ކުރިޔަށް ދިޔަ ފަރިތަކުރުންތަކުގައި މީނާގެ ފައިގެ ފަލަމަސް ގަނޑަށް އަނިޔާވެފައިވާ ކަމަށް އެ ކްލަބުން ވަނީ ހާމަކޮށްފަ އެވެ.

ރިޕޯޓުތައް ބުނާ ގޮތުން މި އަނިޔާގެ ސަބަބުން ދެތިން ހަފުތާ އަށް މީނާ ކުޅުމާ ދުރަށް ދާން ޖެހޭނެ އެވެ. އަދި މިހާތަނަށް މި އަނިޔާގެ ތަފުސީލެއް އެވަޓަނުން ހާމަކޮށްފައި ނުވާއިރު، މިނާ އަށް އަލުން ކުޅުމުގެ ތެރެއަށް އާދެވޭނެ ވަކި ތާރީޚެއް ވެސް ހާމަކޮށްފައެއް ނުވެ އެވެ.

ކޮވިޑް-19 އާ ގުޅިގެން މެދުކަނޑާލި ޕްރިމިއާ ލީގު މިމަހުގެ 17 ވަނަ ދުވަހު އަލުން ފަށާއިރު، އެވަޓަނުން އެންމެ ފުރަތަމަ ކުޅޭ މެޗުގައި ނުކުންނާނީ ވާދަވެރި ލިވަޕޫލާ ދެކޮޅަށެވެ. އެހެންކަމުން މި މެޗުގައި މީނާ އަށް ނުކުޅެވުމަކީ އެވަޓަން އަށް ލިބޭނެ ބޮޑު ގެއްލުމެކެވެ.

2018 ވަނަ އަހަރު ބާސެލޯނާ ދޫކޮށް އެވަޓަން އަށް ބަދަލުވި އުމުރުން 25 އަހަރުގެ ކޮލޮމްބިއާގެ ޑިފެންޑަރު އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އެގޮތުން މި ސީޒަނުގައި މިހާތަނަށް މީނާ ވަނީ އެވަޓަން އަށް ކުޅެދިން 25 މެޗުގައި ދެ ލަނޑު ޖަހާފަ އެވެ.