"މި ސީޒަނުގެ ސްޕެނިޝް ލީގު މެޗުތައް ބަލަން ސަޕޯޓަރުން ދަނޑަށް ވެއްދުން ނާދިރު"

މި ސީޒަނުގެ ސްޕެނިޝް ލީގު މެޗުތައް ބަލަން ސަޕޯޓަރުން ދަނޑަށް ވެއްދުން ނާދިރު ކަމަށް ސްޕެއިންގެ ނެޝަނަލް ސްޕޯޓްސް ކައުންސިލްގެ ރައީސް އިރެނޭ ލޮހާނޯ ބުނެފި އެވެ.

ކޮވިޑާ ގުޅިގެން މެދުކަނޑާލި ސްޕެނިޝް ލީގު މިމަހުގެ 11 ވަނަ ދުވަހު އަލުން ފަށާއިރު، މެޗުތައް ކުޅެން ތާވަލުކޮށްފައިވަނީ ދަނޑަށް ސަޕޯޓަރުން ނުވައްދަ އެވެ.

މީގެ ކުރިން މި ސީޒަނުގެ އިޓާލިއަން ލީގު ނިމުމުގެ ކުރިން ސަޕޯޓަރުންނަށް ދަނޑު ހުޅުވާލެވޭނެ ކަމަށް އުންމީދު ކުރައްވާ ކަމަށް އިޓާލިއަން ފުޓްބޯލް ފެޑެރޭޝަންގެ ރައީސް ގެބްރިއަލީ ގްރަވީނާ ވަނީ ވިދާޅުވެފަ އެވެ.

އެކަމަކު ސްޕެއިންގެ ނެޝަނަލް ސްޕޯޓްސް ކައުންސިލްގެ ރައީސް ލޮހާނޯ ވިދާޅުވީ މި ދަނޑިވަޅުގައި އެންމެ މުހިންމީ އާންމު ރައްޔިތުންނާއި ކުޅުންތެރިންގެ ސިއްހަތު ކަމަށާއި، ފުޓްބޯޅަ މެޗުތައް އަލުން ފަށާއިރު ކަނޑައަޅާފައިވާ އުސޫލުތަކަށް ފުރިހަމަ އަށް ތަބާވާން ޖެހޭނެ ކަމަށެވެ. އަދި މި ސީޒަނުގެ ސްޕެނިޝް ލީގު މެޗުތައް ބަލަން ސަޕޯޓަރުން ދަނޑަށް ވެއްދުމަކީ ބޮޑު ރިސްކެއް ކަމަށާއި، އެކަން އެގޮތަށް ނުކުރާނެ ކަމަށް ވަނީ ބުނެފަ އެވެ.

ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށް މި މަހުގެ 11 ވަނަ ދުވަހު ސްޕެނިޝް ލީގު އަލުން ފަށާއިރު، މިދިޔަ ހޯމަ ދުވަހުން ފެށިގެން ހުރިހާ ކުޅުންތެރިން އެކުގައި ތަމްރީނުކުރުމުގެ ހުއްދަ ސްޕެނިޝް ލީގުގެ ކްލަބުތަކަށް ވަނީ ދީފަ އެވެ.

ސްޕެނޝް ލީގު އަލުން ފަށާއިރު، މީގެ ކުރިން ވަނީ ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ކޮވިޑް-19ށް ޓެސްޓު ކޮށްފަ އެވެ. އެއާއެކު ދެ ޑިވިޝަނުން މީގެ ކުރިން ފަސް ކުޅުންތެރިއަކު ވަނީ ކޮވިޑް-19ށް ޕޮޒިޓިވްވެފަ އެވެ.

ޖޫން މަހުގެ 11 ވަނަ ދުވަހު ސްޕެނިޝް ލީގު އަލުން ފަށާއިރު، އެއްވަނައިގައި އޮތް ބާސެލޯނާ އާއި ދެވަނައިގައި އޮތް ރެއާލް މެޑްރިޑާއި ދެމެދު އޮތީ ދެ ޕޮއިންޓުގެ ފަރަގެކެވެ. ބާސާ އަށް 27 މެޗުން 58 ޕޮއިންޓު ލިބިފައިވާއިރު، ރެއާލަށް ވަނީ 27 މެޗުން 56 ޕޮއިންޓު ލިބިފަ އެވެ.